Хъомылгӕнджытӕ ӕмӕ сабитӕн — ног лӕвар

0
21

Ирон  литературӕйы нӕ дзырдаивады зӕрдиагдӕр архайджытӕй у газет «Рӕстдзинад»-ы хайады сӕргълӕууӕг, УФ-йы Фысджыты цӕдисы уӕнг,  РЦИ-Аланийы культурӕйы сгуыхт кусӕг Бызыккаты Земфирӕ. 

Йӕ поэтикон сфӕлдыстад у алывӕрсыг. Фыссы уарзты кӕлӕнгӕнӕг ӕнкъарӕнтыл, ныййарӕгыл, нӕ Ирыстоны номдзыд фырттыл, царды ӕмӕ ӕхсӕнады фӕзындтытӕй йын йе ‘нкъараг зӕрдӕ цы цаутӕ бацагайынц, уыдоныл дӕр йе ‘мдзӕвгӕты ма фӕсагъӕс кӕна, афтӕ никуы вӕййы.

Уӕдӕ дзы сабитӕ дӕр рох никуы сты. Ныффыста ӕмӕ сын мыхуыры рауагъта ӕмдзӕвгӕты ӕмӕ радзырдты ӕмбырдгӕндтӕ.  ӕхсызгонӕй сӕ пайда кӕнынц куыд ныййарджытӕ, афтӕ рӕвдауӕндӕтты ӕмӕ райдайӕн скъолаты ахуыргӕнджытӕ.

Земфирӕ хорз ӕнкъары  сабиты миддуне, сӕ сыгъдӕг зӕрдӕты уаг, сӕ хъуыдытӕ. Ӕрӕджы та нӕ кӕстӕртӕн бацӕттӕ кодта ног чиныг «ӕгас цу, Ног аз!». Бахаста йӕм афӕдзы афонты рӕсугъддӕр бӕрӕгбӕтты тӕккӕ уарзондӕр — Ног азы тыххӕй, бирӕ азты кӕй фембырд кодта, ахӕм адӕмон зарджытӕ, йӕхи ӕмӕ нӕ поэтты фыст ӕмдзӕвгӕтӕ, зымӕг ӕмӕ уыимӕ баст ӕрдзон фӕзындтыты тыххӕй “базон-базонтӕ”.  Чиныг бакастӕй рауад тынг аив. Алы текст дӕр дзы фидаргонд у йӕ хъуыдымӕ гӕсгӕ  аив нывтӕй. Уымӕй уӕлдай чиныджы ӕрмӕг фыст у ӕнцонбахъуыдыгӕнӕн,  аив, ӕнцонӕмбарӕн   литературон ӕвзагӕй.  Рухс федта  РЦИ-Аланийы Культурӕйы министрады гранты фӕрцы.  Хорз ӕххуыс уыдзӕн рӕвдауӕндӕтты ӕмӕ скъолаты хъомылгӕнджытӕн, методисттӕн ӕмӕ ахуыргӕнджытӕн.

Гасанты Валери

ОСТАВЬТЕ ОТВЕТ

Please enter your comment!
Please enter your name here