«Культурӕ»: ахсджиаг объектты арӕзтад ӕмӕ цалцӕг…

0
25

Фидӕн азы дарддӕр куыст цӕудзӕн культурӕйы ахсджиаг объектты арӕзтад ӕмӕ бындурон рацарӕзтыл. Уыцы куыстытӕн азы дӕргъы дихгонд ӕрцӕудзӕн 90 милуан сомӕй фылдӕр.

Ахӕм бӕрӕггӕнӕнтӕ фехъусын кодтой национ проект «Культурӕ»-йы уагӕвӕрдтӕ ӕххӕст кӕныны фӕдыл РЦИ-Аланийы Хицауады цы уӕрӕх ӕмбырд уыд, уый архайджытӕ. Сӕрдариуӕг дзы кодта республикӕйы премьер-министр Тускъаты Таймураз.

Ныхасы архайдтой Хицауады Сӕрдары хӕдивӕг Иринӕ Азимова, культурӕйы министр Къубалты Эльбрус, экономикон рӕзты министр Томайты Хъазыбег, РЦИ-Аланийы Парламенты депутаттӕ ӕмӕ культурӕйы кусӕндӕттӕ ӕмӕ сфӕлдыстадон иугӕндты разамонджытӕ.

Ӕмбырды сӕйраг доклад скодта Къубалты Эльбрус. Йӕ ныхасмӕ гӕсгӕ, 2019 азы кӕронмӕ ахӕццӕ уыдзысты цалцӕггӕнӕн куыстытӕ Культурӕйы хӕдзӕртты Фарныхъӕуы, Мызуры, стӕй ӕндӕр цалдӕр хъӕуы. Ӕхсӕрысӕр ӕмӕ Заманхъулы та кусын райдайдзысты Культурӕйы ног хӕдзӕрттӕ. Фидӕн азы республикон бюджеты фӕрӕзтӕй цалцӕггонд ӕрцӕудзӕн ӕрыдоны Культурӕйы галуан дӕр. Куыд нысангонд цӕуы, афтӕмӕй 2022-2023 азты та Дигорайы арӕзт ӕрцӕудзӕн культурон центр (проекты аргъ у 150 милуан сомы бӕрц).

Къубалты Эльбрус куыд радзырдта, афтӕмӕй фыццаградон национ проект «Культурӕ»-йы уагӕвӕрдтӕ ӕнтыстджынӕй ӕххӕст кӕныны нысанимӕ арӕзт ӕрцыдысты сӕрмагонд мадзӕлттӕ ӕртӕ дӕлпрограммӕйы хуызы — «Культурон алфамбылай», «Курдиатджын адӕм» ӕмӕ «Нымӕцон культурӕ».

Зӕгъӕм, проект «Курдиатджын адӕм» ахъаз уыдзӕн культурӕйы къабазы специалистты дӕсныдзинад бӕрзонддӕр кӕнынӕн. Ӕмӕ ацы куысты ныридӕгӕн бӕлвырд ӕнтыстытӕ ис.

— Зӕгъӕм, 2019 азы профессион дӕсныдзинад бӕрзонддӕр кӕныны курсыты архайдтой 30 адӕймаджы. Фӕлӕ ахӕм ахуырты архайыны фӕдыл бирӕ куырдиӕттӕ кӕй ӕрбарвыстӕуыд, уымӕ гӕсгӕ ахӕм курсыты архайджыты квотӕтӕ фӕфылдӕр кодтам. Афтӕмӕй 2024 азы онг профессион дӕсныдзинад бӕрзонддӕр кӕныны курсыты архайджыты нымӕц схӕццӕ уыдзӕн 1075 адӕймагмӕ, — загъта министр.

Ахӕм бӕлвырд мадзӕлттӕ арӕзт цӕуы иннӕ дӕлпрограммӕты фӕлгӕты дӕр. Проект «Нымӕцон культурӕ»-йы нысан та у виртуалон концертон залтӕ гом кӕнын, стӕй мультимедиа-равдыстытӕ аразын. Уыцы куысты зӕрдиагӕй архайы РЦИ-Аланийы Информацион технологиты управлени дӕр. Уыцы управленийы специалистты ӕххуысӕй ацы аз республикӕйы Национ наукон библиотекӕйы байгом уыдзӕн мультимедиа-равдыстыты центр. Уымӕй уӕлдай, министры ныхасмӕ гӕсгӕ, бӕлвырд куыст цӕуы чингуыты фонд нымӕцон технологитӕм раивыныл дӕр.

Сӕрмагонд цӕстдард ис культурӕйы кусӕндӕттӕ хъӕугӕ дзаумӕттӕй ифтонг кӕнынмӕ дӕр. Зӕгъӕм, 2024 азы онг ӕхсӕз ахуырадон кусӕндонӕн 14 милуан сомӕй балхӕндзысты музыкалон инструменттӕ ӕмӕ ӕндӕр ахуырадон ӕрмӕджытӕ. 2020 азы райдайдзӕн театр «Саби»-йы бындурон рацарӕзт дӕр. Цалцӕджы проекты фӕдыл ӕппӕт хъӕугӕ документаци дӕр афойнадыл ӕрвыст ӕрцыд УФ-йы Культурӕйы министрадмӕ. Цалцӕджы проекты аргъ у 32,5 милуан сомы.

Боны фӕткы фарстыты фӕдыл сӕ хъуыдытӕ загътой ӕмӕ фӕндӕттӕ бахастой Национ наукон библиотекӕйы директор Хайманты Иринӕ, Аивӕдты республикон лицейы хореографион хайады хицау Зыгъуытаты Лидия ӕмӕ иннӕ кусджытӕ.

Ӕмбырдӕн хатдзӕгтӕ скодта Тускъаты Таймураз. «Фыццаградон национ проектты мадзӕлттӕ куыд ӕххӕстгонд цӕуынц, уымӕ амӕй фӕстӕмӕ дӕр уыдзӕн уӕлдай лӕмбынӕг цӕстдард», — фӕнысан кодта республикӕйы премьер-министр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here