Республикӕйы Сӕйраг закъоны кадӕн

0
18

12 ноябры Республикӕ Цӕгат Ирыстон-Аланийы Конституцийыл сӕххӕст 25 азы. Бирӕ у ӕви чысыл, уый хаты ӕрмӕст Ирыстоны «зӕрдӕ», уымӕн ӕмӕ нӕ республикӕйы Конституци у ӕппӕты фыццаг ӕмӕ сӕйрагдӕр закъон, уый фӕрцы Ирыстон бахызт ног рӕзты къӕпхӕнмӕ.

Кадджын боны кадӕн РЦИ-Аланийы Сӕргълӕууӕг Битарты Вячеслав Дзӕуджыхъӕуы, Национ музейы Уӕрӕсейы Федерацийы гражданины паспорттӕ радта нӕ республикӕйы алы районтӕй 25 скъоладзауӕн, иттӕг хорз бӕрӕггӕнӕнтӕ канд ахуыры нӕ, фӕлӕ ӕхсӕнадон царды, спорты ӕмӕ культурӕйы алыхуызон ерысты уӕлахизтӕ кӕй къухы бафтыд, уыцы цыппӕрдӕсаздзыд сывӕллӕттӕн.

Битары-фырт рӕзгӕ фӕлтӕры минӕвӕрттӕн бӕрӕгбоны фӕдыл рӕсугъд арфӕтӕ дӕр ракодта ӕмӕ сын бафӕдзӕхста, нӕ чысыл Ирыстон ӕмӕ нӕ бӕстӕйӕн аккаг хъӕбултӕ куыд уой, уый тыххӕй:

— Фыццаг хатт уӕ къухтӕм райстат паспорттӕ ӕмӕ абонӕй фӕстӕмӕ сымах стут нӕ бӕстӕйы гражданинтӕ ӕмӕ уыл цы хӕстӕ ӕвӕрд ис, уыдон нӕ республикӕйы Конституцийы фыст сты. Уӕ хӕс у нырма уал ахуыр кӕнын ӕмӕ уӕ ныййарджытӕн коммӕгӕс уӕвын. Ацы миниуджытӕ уӕ акӕндзысты амондджын фӕндӕгтыл. Ирыстоны ӕмӕ нӕ бӕстӕйы фӕрныгадыл кӕй кусдзыстут, рӕсугъд фидӕн аразыныл кӕй архайдзыстут, ууыл мах, хистӕртӕ, нӕ зӕрдӕ дарӕм, — загъта нӕ республикӕйы Сӕргълӕууӕг.

Кадджын мадзӕлттӕ дарддӕр уыдысты Хицауады хӕдзары. РЦИ-Аланийы Сӕргълӕууӕг ацы ран бӕрӕгбоны арфӕтӕ ракодта нӕ республикӕйы цӕрджытӕн, хицауиуӕггӕнӕг оргӕнты разамонджытӕн, Парламенты депутаттӕн, муниципалон скондты разамонджытӕн.

— Абон бӕрӕг кӕнӕм нӕ республикӕйы сӕйраг закъон — Конституцийы 25 азы бон. Цӕгат Ирыстоны Сӕйраг Совет 1994 азы 12 ноябры сфидар кодта, уыцы рӕстӕг нӕ царды зынгӕ социалон-политикон ивддзинӕдтӕ хыгъд кӕм ӕрцыдысты ӕмӕ республикӕйы бирӕнацион адӕмы дарддӕры хъысмӕтаразӕг чи сси, Цӕгат Ирыстоны уыцы Сӕйраг закъон. Уыцы цау нӕ республикӕйы историйы бацахста ахсджиаг бынат. Уӕрӕсейы Федерацийы Конституцийыл ӕнцой кӕнгӕйӕ, уӕд фӕзынд ног барадон системӕ ӕмӕ аразын райдыдтам демократи ӕмӕ адӕмон хицаудзинады бындуртыл ног ахастдзинӕдтӕ федералон центримӕ.

Бӕрӕгбоны фӕдыл Ирыстоны цӕрджытӕн мӕ зӕрдӕ зӕгъы сабырдзинад ӕмӕ амонд, фидӕнӕй ныфсджын куыд уӕм ӕмӕ нӕ Сӕйраг закъон ӕнгом куыд кӕна, Ирыстоны фӕрныгадыл ӕмзондӕй, ӕмдыхӕй куыд архайӕм ӕмӕ уыцы куысты бӕрӕггӕнӕнтӕй нӕ зӕрдӕтӕ куыд райой, — загъта Битарты Вячеслав.

Мадзалы архайджытӕн зӕрдиаг арфӕтӕ ракодта РЦИ-Аланийы Конституцион тӕрхондоны сӕрдар Къесаты Станислав дӕр.

— Фондз ӕмӕ ссӕдз азы Конституци кусы ӕмӕ цӕры. Чи йӕ сарӕзта, уыцы къамисы уӕнгтӕ уал азы дӕргъы бирӕ фембӕлдтытӕ ӕмӕ лекцитӕ арӕзтой нӕ республикӕйы ӕхсӕнады. Стыр ӕххуыстӕ нын бакодта РЦИ-Аланийы Ахуырад ӕмӕ наукӕйы министрад, Фӕсивӕды комитет ӕмӕ нӕ республикӕйы Сӕйраг Архивон службӕ. Алкӕй куыстӕй дӕр разыйӕ баззадыстӕм. Ӕмӕ уыцы архайд нымайын ӕппӕты хуыздӕр ӕнтыстдзинадыл, — загъта Къесайы-фырт.

РЦИ-Аланийы Архивон службӕ бацӕттӕ кодта егъау равдыст нӕ республикӕйы Конституцийы фӕдыл. Уыдис хъӕздыг ӕмӕ цымыдисаг, Ирыстоны алы ахуырадон кусӕндӕттӕй сывӕллӕттӕ сӕхи къухтӕй кӕй сныв кодтой, Конституцийы ӕмбарынад сӕхи хъуыдымӕ гӕсгӕ цавӕр у, ахӕм нывтӕ. Алы уацмысы дӕр фенӕн уыд хур ӕмӕ нӕ бӕстӕйы тырыса. Архивон службӕ адӕмы рӕгъмӕ рахаста, 1937 азы Цӕгат Ирыстоны Автономон Советон Социалистон республикӕйы Конституци чи сфидар кодта ӕмӕ 1994 азы ног Конституци чи сарӕзта, уыцы къамисты къамты равдыст. Къесаты Станислав ӕмӕ Архивон службӕйы сӕргълӕууӕг Тебиаты Галинӕ бӕлвырд радзырдтой равдысты ӕмӕ Конституцийы историйы тыххӕй цымыдисаг хабӕрттӕ.

Саутӕты Тамилӕ

Къамтӕ систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here