Фӕндаг уыдзӕн ӕдасдӕр

0
34

Нӕ республикӕйы бирӕ хӕххон ӕмӕ быдырон фӕндӕгтӕй махӕн абон уӕлдай ахсджиагдӕр у Уӕлладжыры комы фӕндаг. Уый Уӕрӕсейы хуссар хай бӕтты Фӕскавказимӕ, ӕмӕ йын ис стратегион ахадындзинад. Фӕлӕ кӕд Дзӕуджыхъӕуӕй Алагирмӕ, ардыгӕй та Тӕмискъмӕ федералон фӕндаг у уӕрӕх ӕмӕ дзуапп дӕтты фӕндӕгты арӕзтады нырыккон домӕнтӕн, уӕд афтӕ зӕгъӕн нӕй, фӕндагӕн хӕхбӕсты цы хай цӕуы, уымӕй.

Нӕ ныхас куы фӕбӕлвырддӕр кӕнӕм, уӕд бирӕ змӕлд баййӕфтам Уӕлладжыры комы дымӕджы. Уавӕр афтӕ у, ӕмӕ донвӕд ам кӕй фӕнарӕгдӕр ис, уымӕ гӕсгӕ ивылд уылӕнтӕ бахордтой фӕндаджы галиуварс, тӕссаг у ӕрлӕбырынӕй ӕмӕ ныртӕккӕ фӕндаг фӕуӕрӕхдӕр кӕныны куыстытӕ цӕуынц 300 метры дӕрддзӕджы. Чи сӕ ӕххӕст кӕны, уыдон та сты ӕнӕххӕст бӕрнондзинады ӕхсӕнад «Владтранстрой»-ы аразджытӕ.

Ахӕм куысты ӕнӕ экскаваторӕй ницы бакӕндзынӕ, ӕмӕ Хестанты Эльбрус йӕ хъомысджын техникӕйӕ хуыр фӕйлыдта цӕугӕдон ӕрыдоны галиу былыл, бынӕй та Сохъуырты Ацӕмӕз, Созӕты Тотрадз, Мӕрзойты Азӕмӕт арматурӕ ӕвӕрдтой. Рӕхджы арӕзтадон объект бетонгонд куы ‘рцӕуа, уӕд Уӕлладжыры комы фӕндаг ацы ран фӕуӕрӕхдӕр уыдзӕн 6-7 метры, ӕмӕ йыл автомашинӕтӕ дыууӕрдӕм кӕндзысты ӕдасӕй.

Ныртӕккӕ канд былгӕрӕттӕ фидаргӕнӕн куыстытӕ нӕ цӕуынц Уӕлладжыры комы фӕндагыл. Ӕрдзы ӕууӕлтӕ афтӕ сты, ӕмӕ хӕххон тыхджын дымгӕты, къӕвдаты ӕмӕ митуарынты рӕстӕг къӕдзӕхтӕй дуртӕ фезгъӕлы, кӕм та хохы фахс дӕр ӕрлӕбыры. Фӕндагыл цӕуӕг бӕлццӕтты ӕдасдзинады тыххӕй ӕнӕххӕст бӕрнондзинады ӕхсӕнады кусджытӕ аразынц хъахъхъӕнӕн къултӕ дӕр. Ныронг уал сӕ дӕргъ 100 ӕмӕ уымӕй фылдӕр метртӕ кӕмӕн у, сӕ бӕрзӕнд та 5 метры ӕмӕ 20 сантиметры, ахӕм къултӕ 4 раны арӕзт ӕрцыдысты къӕдзӕхты фӕхстыл.

Фӕлӕ аразджыты архайд ууыл нӕ банцад. Фӕндагыл федтам, кусджытӕ Бесолты Алыксандр, Персаты Виктор, Хӕбӕлаты Сергей ӕмӕ иннӕтӕ хъахъхъӕнӕн къулты арӕзтадӕн опалубкӕ куыд ӕвӕрдтой, уый, Дзоцъиты Хъазыбег та сын уӕзӕгтӕисӕн техникӕйӕ ӕххуыс кодта.

Куыд загътам, афтӕмӕй Уӕлладжыры комы фӕндаг базилинаг у йӕ хӕхххон хайы, ӕмӕ уый дӕр «Владтранстрой»-ы аразджытӕй нӕу рохуаты. Уыналмӕ ӕввахс 19-ӕм километрыл мах фембӕлдыстӕм аразджыты иу къордыл. Рӕстӕгӕй-рӕстӕгмӕ-иу ардӕм «КамАЗ»-тӕ фӕзындысты лыстӕг хуырӕй дзаг гуыффӕтимӕ. Куы сӕ-иу ӕркалдтой, уӕд та-иу сӕ грейдерыл кусӕг Таймазты Мӕирбег апырх кодта фӕндагыл.

«Нӕ куыстуаты коллектив йӕхимӕ хӕс райста Тӕмискъӕй Мызурмӕ асфальты ног фӕлтӕр ӕрӕвӕрын Уӕлладжыры комы фӕндагыл. Ӕдӕппӕт йӕ дӕргъ у 24 километры, ӕмӕ куыстытӕ рӕвдздӕр цӕмӕй цӕуой, уый тыххӕй нӕ коллектив фӕдихтӕ цалдӕр къордыл. Махмӕ дзы цы 6 километры хауы, уыцы дӕрддзӕджы хъуамӕ асфальт ӕрӕвӕрӕм дыууӕ фӕлтӕры. Уымӕй уӕлдай фӕндаг уӕрӕхдӕргонд цӕуы 13 метры онг, йӕ дыууӕ кӕроны дӕр арӕзт цӕуы дондзӕуӕн къанӕуттӕ», — загъта ӕнӕххӕст бӕрнондзинады ӕхсӕнады мастер Андрей Вашаев.

Ӕнӕзивӕгӕй архайынц мастер Зӕнджиаты ӕхсары бригады уӕнгтӕ дӕр: асфальтӕвӕрӕн машинӕйыл кусӕг Цӕгӕраты Валери, йе ‘ххуысгӕнджытӕ Мӕрзойты Давид, Агънаты Батрадз, Хохты Владислав ӕмӕ Хестанты Давид. Чысыл аныхас кӕныны фӕстӕ, уыдон ногӕй кусын райдыдтой ӕмӕ асфальты хыссӕйы хуызӕн фӕлмӕн уадздзаг задис фӕндагыл, катоктыл кусджытӕ Гиоты Махар, Годжыцаты Роберт, Цгъойты Витали та сыл уӕззау машинӕтӕй дыууӕрдӕм цӕуын райдыдтой.

Афтӕ Уӕлладжыры комы фӕндаг бонӕй-бонмӕ рӕвдздӕр кӕны, цӕмӕй йыл бӕлццӕттӕ цӕуой ӕдасӕй.

Тохсырты Къоста

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here