Рӕзынц нӕм фидӕны гроссмейстертӕ

0
14

Дӕс боны дӕргъы 1-11 ноябры Цӕцӕны республикӕйы сӕйраг горӕт Грознайы шахмӕттӕй цыдысты Цӕгат Кавказы федералон зылды фыццаг бынат бацахсыныл ерыстӕ сывӕллӕтты, ӕрыгӕтты ӕмӕ чызджыты ‘хсӕн. Ерысты архайджытӕ сӕ кармӕ гӕсгӕ дихгонд уыдысты ӕхсӕз къордыл.

Ӕдӕппӕтӕй 300 ӕрыгон шахматисты кӕм ерыс кодтой, уым ирыстойнаг лӕппутӕ ӕмӕ чызджытӕ рамбылдтой 2 сыгъзӕрины, 4 ӕвзисты ӕмӕ дыууӕ бронзӕ майданы. Нӕ шахматисттӕй уӕлдай ӕнтыстджындӕр хъазт акодтой Лианӕ Цамалаидзе ӕмӕ ӕгкацаты Альберт.

Лианӕ ерыс кодта, 15 азӕй хистӕр чызджытимӕ ӕмӕ, цы аст ныхмӕлӕууӕгимӕ фембӕлд, уыдонӕй рамбылдта фондзы, дыууӕ хатты фӕци хӕрӕгсаст, иу хатт та — хӕрд, афтӕмӕй бацахста 1-аг бынат.

Тынг лӕмбынӕг архайд кодта нӕ 10-аздзыд шахматист ӕгкацаты Альберт. Уый ерыс кодта, 13 азы онг кӕуыл цӕуы, уыцы лӕппутимӕ ӕмӕ фараст ныхмӕлӕууӕгӕй фӕуӕлахиз авдыл, иу хатт фӕци хӕрӕгсаст, иу хатт та хӕрд ӕмӕ ӕрӕмбырд кодта 7,5 очкойы. Уыйбӕрц ӕрӕмбырд кӕнын йӕ ныхмӕлӕуджытӕй никӕмӕн бантыст, ӕмӕ бацахста 1-аг бынат. Альбертӕн йӕ хистӕр ӕфсымӕр Феликс дӕр ерыс кодта ацы кары ӕмӕ бацахста 3-аг бынат.

Иу 3-аг бынат ма бацахста Баситы Георги. Уый ерыс кодта 11 азы онг кӕуыл цӕуы, уыцы лӕппутимӕ.

Нӕ шахматисттӕ ӕппӕты фылдӕр рамбылдтой ӕвзист майдантӕ. Дыккаг бынӕттӕ чи бацахста, уыдонӕй ӕртӕ уыдысты нӕ сӕрӕн чызджытӕ: Хуыгаты Ланӕ (9 азы онг), Дриаты Ланӕ (15 азы онг) ӕмӕ Дзуццаты Ланӕ (19 азы онг). Цыппӕрӕм ӕвзист майдан та рамбылдта Колыты Ирлан (19 азы онг).

Уыдонӕй уӕлдай ма сӕ карӕнты ‘хсӕн хорз ахъазыдысты Танделаты Людмилӕ ӕмӕ Мамыхъаты Данӕ. Уыдон бацахстой цыппӕрӕм бынӕттӕ, фӕлӕ сӕ бӕрӕггӕнӕнтӕм гӕсгӕ конд ӕрцыдысты Цӕгат Кавказы иугонд командӕмӕ ӕмӕ иннӕ фӕсивӕдимӕ сӕхи цӕттӕ кӕндзысты Уӕрӕсейы ӕрыгӕтты чемпионатмӕ. Уыцы ерыстӕ цӕудзысты иннӕ аз апрелы Сочийы.

Не ‘взонг шахматистты ерыстӕм бацӕттӕ кодтой тренертӕ: Игорь Хрипков, Ларисӕ Чемоданова, Сергей Мкртчян ӕмӕ Тигран Назаретян.

Нӕ шахматисттӕ дӕсӕй Уӕрӕсейы чемпионаты кӕй хъаздзысты, уый банымайын хъӕуы хорз ӕнтыстыл. Уырны нӕ, шахмӕттӕй дӕр нӕм ӕцӕг гроссмейстертӕ кӕй сырӕздзӕн, уый.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here