Ӕрбаласӕггаг продукцийы бӕрц фӕкъаддӕр кӕнын

0
19

Республикӕйы Сӕргълӕууӕг домы ӕппӕт къабӕзты разамонджытӕй, цӕмӕй алы ахсджиаг хъуыддагӕн дӕр нысангонд цӕуа бӕлвырд ӕмгъуыдтӕ, адӕмы цардыл хорзӕрдӕм чи фӕзындзӕн, алы ахӕм хъуыддаг дӕр хъуамӕ ӕххӕстгонд цӕуа афоныл.

Ныр ӕртӕ азы нӕ республикӕйы кусы нӕ регионы райрӕзты агентад, кӕнӕ та Проектон офис. Республикӕйы социалон-экономикон райрӕзты ӕппӕт къабӕзты ӕнтыстджын куыстӕн аразынц бирӕ мадзӕлттӕ. Ахуырад ӕмӕ медицинӕ, туризм ӕмӕ хъӕууон хӕдзарад, культурӕ ӕмӕ спорт — алы къабаз дӕр ахсджиаг у, дзуапп ыл дӕттынц ӕмӕ ӕрвылбон кусынц бӕрнон адӕм.

Нӕ редакцийы уазӕг — Проектон офисы хъӕууон хӕдзарады фыццаградон программӕйы разамонӕг, республикӕйы хъӕууон хӕдзарады управленийы хицау  Кадзаты Игорь:

— Алы ӕнтыст дӕр райдайы бӕрнондзинадӕй. Проектон офисы архайды дзуапп цы фарстытӕн дӕттын, уыдон иууылдӕр баст сты хъӕууонхӕдзарадон хи продукци уадзынӕн фадӕттӕ аразынимӕ, йӕ бӕрц ын фӕфылдӕр кӕнынимӕ, ӕрбаласӕггаг хойраджы бӕрц фӕкъаддӕр кӕнынимӕ. Ахӕм бӕрнон хӕс ӕвӕры нӕ размӕ республикӕйы Хицауад.

Ис федералон ӕмӕ регионалон программӕтӕ, лӕмбынӕгӕй сӕм ӕркӕсгӕйӕ, хъуамӕ равзарӕм, фыццаградон кӕй хонынц, нӕхи уавӕрты пайдадӕр, ахадгӕдӕр чи уыдзӕн, уыдон. Проектон офис ӕмӕ министрадӕн ӕнгом ӕмгуыстад ис. Иумӕйаг сты нӕ хъуыдытӕ, нӕ фидӕны нысантӕ. Ӕмӕ уый раст у. Агропромышленнон комплексы райрӕзтӕн бацӕттӕ кодтам 30 программӕйы, ӕркастыстӕм алы лыстӕг фарстытӕм дӕр. «Хӕххон бынӕтты райрӕзт»-ӕн цы 12 проекты ис, уыдоны бындурыл хӕхбӕсты бафӕлвардзыстӕм дыргъдӕттӕ скӕнын, ныртӕккӕ уал сбӕлвырд кодтам цыппар фӕзуаты, тала бӕлӕстӕ, дӕсны специалисттӕ, хъӕугӕ техникӕ ис. Иннӕ проекттӕ баст сты картофы, халсарты, хосгӕнӕн кӕрдӕджыты куыстимӕ. Бирӕ мадзӕлттӕ арӕзт цӕуы стурвос дарыны къабаз фӕхъомысджындӕр кӕнынимӕ, хъӕууонхӕдзарадон кооперативтӕ саразынимӕ. Ахсджиаг у, фӕстаг рӕстӕг фысы фыд тынгдӕр агуырд кӕй цӕуы, уый. Ис Цӕгат Кавказы социалон-экономикон рӕзты программӕ ӕмӕ уыцы ран фыстӕ ӕмӕ сӕгътӕ дарынмӕ се ‘ргом аздӕхтой, фӕрӕзтӕ дзы бавӕрдтой.

Хохӕй-быдырмӕ, Ирыстоны алы районты хъӕууон хӕдзарады продукци уадзынӕн цы хуыздӕр гӕнӕнтӕ ӕмӕ уавӕртӕ ис, уыдон нымайгӕйӕ, арӕзт цӕуынц ног проекттӕ.

«РЦИ-Аланийы Хъӕууон хӕдзарады райрӕзт»-ы программӕйы бындурыл тагъд рӕстӕг сӕ тыхы бацӕудзысты 16 цымыдисаг проекты, бакуыстой сыл Проектон офисы ӕмӕ министрады специалисттӕ.

Нӕ хъуыдымӕ гӕсгӕ, стӕй ахуыргӕндты хатдзӕгтӕм гӕсгӕ, Ирыстоны дӕттӕ иттӕг хорз сты балер ӕмӕ ӕндӕр кӕсаджы куыст кӕнынӕн. Уыимӕ, афӕдзы алы афоны дӕр, уымӕн ӕмӕ нӕ цӕугӕдӕттӕ, нӕ суӕрттӕ сӕлгӕ нӕ кӕнынц. Ахӕм хӕдзарӕдтӕн уыдзӕн алывӕрсыг ӕххуыс. Проектты номхыгъдмӕ куы ӕркӕсӕм, уӕд дзы ис дзидзайы ӕмӕ ӕхсыры куыст, фысвос ӕмӕ мӕргътӕ дарынад, хӕрзмыггаг фос ӕмӕ холлӕгтӕ цӕттӕ кӕныны хъуыддаг, халсарты куыст, нӕхи садзинӕгтӕ ӕмӕ тауинӕгтӕ цӕттӕ кӕнын, дыргъдӕттӕ ӕмӕ сӕндӕттӕ аразын, хъӕууонхӕдзарадон техникӕ ӕлхӕнын, фӕлхасадон коопераци ӕмӕ базарад рапарахат кӕнын, хъӕууон фӕзуӕттӕ ӕмӕ хи хӕдзарӕдты райрӕзтыл кусын. Ацы проекттӕ ныридӕгӕн дӕр сӕ ахадындзинад равдыстой. Нӕ размӕ сӕвӕрдтам хӕс — ӕрбаласӕггаг хойраджы бӕрц фӕкъаддӕр кӕнын, йӕ бӕсты нӕхи хъӕууонхӕдзарадон продукци уадзджыты тыллӕг бавӕрын.

Ныхас ныффыста Цӕгӕраты Жаннӕ

ОСТАВЬТЕ ОТВЕТ

Please enter your comment!
Please enter your name here