Хъӕбатырты ингӕнтӕм базылдысты

0
20

Нӕ республикӕйы фӕсивӕды ӕфсӕддон-патриотон хъомылады центры активисттӕ: Цыбырты Хетӕг, Калоты Анелия ӕмӕ Дианӕ Павлиашвили проект «Экологон десант»-ы фӕлгӕты сӕхи хъӕппӕрисӕй сарӕзтой чысыл зиу. Зымӕджы къӕсӕрыл базылдысты Дзӕуджыхъӕуы Намысы Аллейы Советон Цӕдисы хъӕбатырты цыртдзӕвӕнтӕм. Ӕрыгон чызджытӕ ӕмӕ лӕппутӕ бафснайдтой Калоты Георгийы, Бицаты Сергейы, Александр Юльевы, Сергей Шиловы ӕмӕ иннӕты ингӕнтӕ.

Калоты Анелия куыд радзырдта, афтӕмӕй ацы хъуыддаг суыдзӕн традицион.

— Махӕн нӕ хӕс у бацархайын, ӕрыгон фӕлтӕрӕй цӕмӕй рох ма уой нӕ хъӕбатыртӕ. Ӕртыккаг хатт сарӕзтам ацы хъуыддаг, фӕлӕ фидӕны, цӕмӕй традицион суа, ууыл кусдзыстӕм. Кӕстӕртӕ хъуамӕ зоной, сабыр дунейы кӕй фӕрцы цӕрӕм, уыдоны нӕмттӕ, — загъта уый.

Советон Цӕдисы Хъӕбатыртӕй бирӕтӕн мемориалон къӕйтӕ йӕхи хъару ӕмӕ хардзӕй сарӕзта Дзебойты Станислав. Уый бирӕ кусы, Фыдыбӕстӕйы Стыр хӕсты Ирыстоны зӕххыл хӕдтӕхджыты чи басыгъд, уыцы хъӕбатыр хӕстонты фӕд агурыныл. Чысыл ӕххуыстӕ нӕ бакӕны Фыдыбӕстӕйы Стыр хӕсты ветерантӕн дӕр.

Сергей Шилов райгуырд ӕмӕ схъомыл Сыбыры. Йӕ хӕстон фӕндӕгтӕ йӕ акодтой украинаг ӕмӕ белорусаг фронттӕм, хӕцыдис Польшӕ гитлеронтӕй ссӕрибар кӕныны тохты. 1945 азы Советон Цӕдисы Хицауад Шиловы схорзӕхджын кодта Ленины орден ӕмӕ «Сыгъзӕрин Стъалы»-йы майданӕй.

Хъӕбатыр хӕстон хӕсты фӕстӕ цардис Дзӕуджыхъӕуы. Ӕфсӕддон кафедрӕйы сӕргълӕууӕг ӕмӕ ахуыргӕнӕгӕй куыста Хӕххон-металлургон институты. Йӕ цардӕй ахицӕн 1979 азы, ӕмӕ йӕ ӕфсӕддон кадимӕ бавӕрдтой Ирыхъӕуы пантеоны. Центры активисттӕ уымӕ дӕр базылдысты.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here