Куысты ног бынӕттӕ ӕмӕ фылдӕр хъалонтӕ — инвестициты фӕрцы

0
26

2025 азмӕ Цӕгат Кавказы федералон зылды социалон-экономикон рӕзты паддзахадон программӕмӕ хаст цы инвестицион проекттӕ ӕрцыд, уыдон куыд ӕххӕстгонд цӕуынц, ууыл цыд ныхас, республикӕйы Хицауады Сӕрдар ТУСКЪАТЫ Таймураз цы ӕмбырд амыдта, уым.

Ӕмбырды архайдтой РЦИ-Аланийы экономикон рӕзты министры хӕдивӕг Дзоблаты Зураб, акционерон ӕхсӕнад «РЦИ-Аланийы рӕзты инвестицион корпораци»-йы генералон директор Гугкаты Таймураз ӕмӕ инвестицион проекттӕн сӕ амидингӕнджытӕ.

Хицауады Сӕрдар куыд бафиппайдта, афтӕмӕй паддзахады ӕмӕ бизнесы ӕмархайд хорзӕрдӕм зыны инвестицион проекттӕ ӕххӕст кӕныныл.

— Инвестицион проектты фӕрцы нӕм фӕзындзӕн, ерысхъом чи уа, ахӕм ног куыстуӕттӕ ӕмӕ ног куысты бынӕттӕ, бюджетмӕ та цӕудзӕн фылдӕр ӕфтиӕгтӕ. Инвестицион проекттӕ ӕмӕ хъӕппӕристӕ ӕххӕст кӕнынӕн паддзахад цы ӕхцатӕ дӕтты, уыдон хъуамӕ фӕстӕмӕ здӕхой корпорацимӕ ӕмӕ ногӕй «кусой» ӕндӕр проекттӕ ӕххӕст кӕныныл, — загъта Тускъаты Таймураз.

Дзоблаты Зураб куыд радзырдта, афтӕмӕй хицаудзинады ӕххӕстгӕнӕг ӕмӕ бынӕттон хиуынаффӕйады оргӕнты ӕмӕ инвестицион рӕзты корпорацийы ӕмархайд, стӕй паддзахадон ӕххуысы механизмтӕ ахъаз уыдзысты фондз инвестицион проекты царды рауадзынӕн. Компани «Диг-Агро» сарӕзта хоргуыстгӕнӕн комплекс, стӕй машинӕты-технологон станцӕ. Сӕ дыууӕ дӕр архайынц сӕ нысанмӕ гӕсгӕ — ӕхсӕвӕй-бонӕй кусы хусгӕнӕн, уыцы-иу рӕстӕг дзы дарӕн ис 14 мин тоннӕйы хор. Дыууӕ объекты фӕрцы арӕзт ӕрцыд 30 куысты бынаты.

Алагиры районы ӕнтыстджынӕй кусы ӕнӕххӕст бӕрнондзинады ӕхсӕнад «Владкӕ». 122 гектарыл сарӕзтой дыргъдӕттӕ. Цы тыллӕг ӕрӕмбырд кодтой — фӕткъуытӕ дыууӕ мин тоннӕйӕ фылдӕр, — уый дарынӕн сӕм ис сӕрмагондӕй арӕзт бынат.

— Ацы проекты фӕрцы фӕзынд 30 куысты бынаты, стӕй ма фӕткъуытӕ ӕмбырдгӕнӕн афон рӕстӕгмӕ куыстмӕ райсынц 100 адӕймаджы. Фӕнд кӕнынц сӕхи фӕрӕзтӕй дыргъты 2,5 мин тоннӕйы дарынӕн дыккаг ахӕм бынат саразын, стӕй «Сен-Жермен» кӕрдо бӕлӕстӕ ныссадзынӕн ног дыргъдон саразын, — загъта министры хӕдивӕг.

Куырттаты комы компани «СТК-59» сарӕзта, 50 бынаты кӕм ис, ахӕм фысымуат. Ныридӕгӕн ног туристон объект у цӕттӕ, ныртӕккӕ цӕттӕ кӕнынц, чи дзы кусдзӕн, ахӕм специалисттӕ, уыдон уыдзысты 100 адӕймагӕй фылдӕр.

Компани «Сигма Премиум» сарӕзта дзидзакуыстгӕнӕн цех, кӕнынц дзы алыхуызон къалбӕстӕ ӕмӕ дзидзайы продукци. Кусы дзы 40 адӕймаджы.

Дзоблаты Зураб бавдыста, паддзахады ӕххуысӕй 2019 азы цы проекттӕ ӕххӕстгонд цыд ӕмӕ цӕуы, уыдоны номхыгъд. Уыцы инвестортӕ сты: ӕнӕххӕст бӕрнондзинады ӕхсӕнадтӕ «Фундук-Алани», «Колос-2019», «Грин», «Иугонд арӕзтадон компани 21 ӕнус».

Ӕмбырды архайджытӕ лӕмбынӕг ӕркастысты, 2019 азы паддзахадон ӕххуысмӕ цы проекттӕ ӕнхъӕлмӕ кӕсынц, уыдонмӕ. Проекттӕ конкурсы цӕмӕй архайой, уый тыххӕй республикӕйы Экономикон рӕзты министрады бацӕттӕ кӕнын хъӕугӕ гӕххӕттытӕ. Конкурсы архайджытӕй сӕ хуыздӕрты равзары Цӕгат Кавказы хъуыддӕгты фӕдыл министрад, ӕмӕ уал хорз аргъ скодта ӕртӕ проектӕн.

Ӕмбырды кӕронбӕттӕны Тускъаты Таймураз куыд загъта, афтӕмӕй нӕ республикӕйы хицаудзинады ӕххӕстгӕнӕг оргӕнтӕ ӕмӕ федералон структурӕтӕн, бӕлвырддӕр зӕгъгӕйӕ, Цӕгат Кавказы хъуыддӕгты фӕдыл министрадӕн се ‘мгуыстадӕн ис хорз фӕлтӕрддзинад. Уый фӕрцы 2016-2019 азты инвестицион проекттӕ ӕнтыстджынӕй ӕххӕстгонд цыдысты.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here