Дзуармӕ кувӕн къуыри

0
120

Райдыдта та не стыр бӕрӕгбон — Уастырджийы кувӕн къуыри. Хонынц ма йӕ Джеоргуыба дӕр. Куыд сӕмбӕлӕм ацы стыр бӕрӕгбоныл, цы хъуыдытимӕ, цы зӕрдӕимӕ? Куыд арвитӕм Уастырджийы кувӕн къуыри, айдагъ хӕргӕ ӕмӕ нуазгӕйӕ ӕви ӕцӕг ӕппӕтадӕмон бӕрӕгбонау?

Нӕ фыдӕлтӕ йӕм абоны цӕстӕй куы кастаиккой, уӕд ӕй рахуыдтаиккой «Фынгыл бадӕн, кӕнӕ цӕлгӕнӕн къуыри». Фӕлӕ кӕд «Уастырджийы кувӕн къуыри» хуыйны, уӕд дзы нӕ фыдӕлтӕ арфдӕр мидис ӕвӕрдтой.

Фынг нӕ ирон царды ахсы стыр бынат. Кувгӕ дӕр фӕкӕнӕм ӕртӕ кӕрдзынӕй, ӕмӕ уыцы фынджы ӕвӕрд, йӕ бацӕттӕ кӕнын, хорз фӕтк, хорз ӕгъдау дзы сӕвӕрын, сты бӕрӕгбонӕн йӕ сӕйраг домӕнтӕ. Уым алы сыхбӕстӕ дӕр хъуамӕ равдиса йӕ сӕрӕндзинад. Фарон къуырисӕры дыууӕ сахаты фӕзылдтӕн БАМы кӕртытыл, фарстон цӕрджыты, ӕмӕ куыд рабӕрӕг, афтӕмӕй бирӕ сыхты бӕрӕгбон кӕнынмӕ уӕвгӕ дӕр нӕ хъавыдысты. Кӕмдӕрты сӕ иумӕйаг хъӕдзӕрттӕ бырӕттӕй байдзаг сты, бӕрӕг у, пайда дзы нӕ кӕнынц. Уый ууыл дзурӕг у, ӕмӕ нӕ сыхбӕсты Фарн ӕмӕ бастдзинад сӕфынц. Кӕй аххосӕй?

Чидӕр йӕхи бинонтыл, йӕхи ӕхсызгондзинадыл тыхсы, ӕмӕ уый нымайы фагыл. Нӕ йӕ хъӕуынц сых, ӕрвадӕлтӕ, хиуӕттӕ. Уыдӕттӕ тынгдӕр хауынц хистӕртӕм, уыдон хъуамӕ райсой сӕхимӕ сыхбӕсты мидӕг иумӕйаг хъуыддӕгтӕн уынаффӕ кӕныны хӕс. Зонӕм ӕй не ‘ппӕт дӕр, Дзӕуджыхъӕуы бирӕ стыр хӕдзӕртты хистӕр бӕрӕг нал ис. Ахӕм рӕтты-иу кӕстӕртӕ размӕ куы ракъахдзӕф кӕниккой, ӕмӕ уыцы хӕс сӕхимӕ куы райсиккой, уӕд уаид хуыздӕр. Рагон кадӕджы, хӕхбӕстӕм знаг куы ныббырста, ӕмӕ нӕлгоймӕгтӕ бынаты куы нӕ разындысты, уӕд уайсадӕг чындз йӕ уайсадын фӕуагъта ӕмӕ йӕ зӕронд хицауимӕ знӕгты ныхмӕ ӕрлӕууыдис. Гъе, ахӕм рӕстӕг ӕркодта абон дӕр, ӕмӕ нӕ ирон ӕгъдауыл тохы кӕмӕн куыд йӕ бон у, афтӕ архайӕд.

Фарон “Иры Стыр Ныхас”-ы куырдиатмӕ гӕсгӕ, ноябры фӕстаг ӕххӕст къуырийӕн йӕ къуырисӕр Парламенты ӕмӕ республикӕйы Сӕргълӕууӕджы бардзырдмӕ гӕсгӕ, фидаргонд ӕрцыд официалон бӕрӕгбон — фӕлладуадзӕн бонӕй. Мах уӕд фӕсидтыстӕм адӕммӕ, цӕмӕй уыцы бонӕй спайда кӕной айдагъ фынгтӕ бацӕттӕ кӕнынмӕ нӕ, фӕлӕ кӕртыты кӕстӕртӕн дӕр бӕрӕгбон саразынмӕ. Бирӕ сыхтӕ байхъуыстой, сарӕзтой ерыстӕ, хъӕзтытӕ, радтой сывӕллӕттӕн зӕрдылдарӕн лӕвӕрттӕ дӕр. Уыцы кӕстӕртӕ сӕ зӕрдыл бадардтой, бӕрӕгбон уыдоны дӕр кӕй у, дардзысты йӕм раст цӕстӕнгас, ӕмбардзысты йын йӕ мидис. Мӕхи кӕрты дӕр цалдӕр хорз хъӕппӕрисджын лӕджы фӕрцы уыдис ахӕм бӕрӕгбон. Цыдис дзы алыхуызон ерыстӕ кӕстӕрты ‘хсӕн, ӕмӕ дзы уыдон цингӕнгӕ тынг зӕрдиагӕй архайдтой. Кӕртӕй бон-изӕрмӕ дардмӕ хъуыстис ирон фӕндыры цагъд ӕмӕ хъазты уынӕр. Фӕстӕдӕр, бадты рӕстӕг, хистӕртӕ фӕдзырдтой ерысты архайӕг фӕсивӕдмӕ ӕмӕ сын ракодтой зӕрдиаг арфӕ. Уый тынг хорз хъуыддаг у. Нӕ сагъӕс ӕдзухдӕр кӕстӕртыл у, кувгӕ дӕр уыдоны хорздзинадмӕ бӕлгӕйӕ фӕкӕнӕм, ӕмӕ хъуамӕ не стырдӕр бӕрӕгбоны дӕр уой нӕ фарсмӕ, архайой сӕ фыдӕлты Фарнӕй фӕхайджын уӕвыныл ӕмӕ йӕ кадимӕ дарддӕр хӕссыныл.

Уӕ хорзӕхӕй, бафӕзмут ахӕм сыхбӕсты. Саразут иумӕйаг куывдтӕ, фӕсидут уӕ кӕстӕртӕм дӕр ӕмӕ сын бацамонут хорз зонд, хорз ӕгъдау. Уыдон хъуамӕ комкоммӕ архайой уыцы бӕрӕгбоны, хӕдзары компьютертӕ ӕмӕ телефонтыл бадыны бӕсты саразой ерыстӕ, ирон хъазтизӕртӕ.

Ӕппӕт дӕр аразгӕ у ныййарджытӕй, уыдоны хорз хъӕппӕрисӕй. Чи йӕ равдиса, уыдонӕн Иунӕг Кадджын Стыр Хуыцау ӕмӕ Уастырджи хуыздӕр арфӕ ракӕнӕнт! Уе’ппӕты дӕр сӕ хорзӕх уӕд!

Кучиты Руслан,

«Иры Стыр Ныхас»-ы координацион советы сӕрдар

 

Бӕрӕгбоны ракуывд

Уӕларвӕй нӕм, цӕхӕртӕкалгӕ, буцӕй,

Табу йӕхицӕн, Уастырджи ӕрхӕццӕ.

Ӕмӕ йӕ фидар базырты ныррухсӕй

Нӕ Иры дзыллӕ а изӕр фӕсӕццӕ.

 

Сыгъзӕрин дзуар, дӕ ӕрткъах бӕхӕй рахиз,

Дӕ номыл махмӕ ис рӕсугъд бӕрӕгбон.

Дӕ фарн нӕ уӕд, фыдбылызӕй нӕ бахиз,

Нӕ куывд та-иу ӕдзух фӕкӕн уӕларвон.

 

Дӕ тӕхӕн — дуне, Уаза хох — дӕ кӕсӕн,

Дӕ уындӕй та нӕ Ирыстоныл рахур.

Ӕмӕ дӕуӕн зӕрдиагӕй фӕдзӕхсӕм —

Хуыцауӕй ма нын хорздзинӕдтӕ ракур.

 

Бӕрзонд Уастырджи, арвы цъӕхы бадӕг,

Дӕуӕй сӕрыстыр — рагӕй дӕр нӕ адӕм.

Нӕ кӕстӕртӕ дӕ бар фӕуӕнт, дӕ уазӕг,

Дӕ рахиз къабазы бын-иу сӕ бакӕн.

 

Дӕ лӕггад — бирӕ, зонӕм дын дӕ ахаст,

Ды куы дӕ махӕн хорз ӕмбал, ӕгъдӕнцой.

Нӕ бӕлццӕтты ӕдзухдӕр кӕн фӕндараст,

Сӕ къонатӕм сӕрӕгасӕй куыд цӕуой.

 

Хуыцауӕн ды йӕ минӕвар — нӕ Иры,

Нӕ адӕмы ӕрвыст лӕг та — Хуыцаумӕ.

Ӕмӕ нӕ зонд сыгъдӕг фӕндтӕ кӕд пиры

Фӕхӕсс сӕ уӕд ӕппӕтӕй дӕр цъӕх арвмӕ.

 

Тӕхгӕ барӕг, нӕ сӕртӕ уӕнт дӕ нывонд,

Ӕмӕ фӕу ды ахӕм дзуар — ӕрдхӕрӕн,

Нӕ Ир куыд уа дӕ хӕрзтӕй дзаг ӕрвылбон,

Дӕ номыл мах нӕл кусӕрттӕ куыд кӕнӕм.

Тохсырты Къоста

ОСТАВЬТЕ ОТВЕТ

Please enter your comment!
Please enter your name here