Цӕрджыты сфыст: цӕттӕдзинады фарстытӕ

0
59

Адӕмы ӕппӕтуӕрӕсеон сфыст райдайдзӕн 2020 азы 1 октябры. Фӕлӕ ныртӕккӕ дӕр Цӕгат Ирыстоны бирӕ цӕрджыты тыхсын кӕны иу фарст. Цымӕ уыдон ацы рӕстӕг сӕ хӕдзӕртты къӕсӕртыл цӕстфӕлдахджыты нӕ фендзысты сфысджыты хуызы? Ацы ӕмӕ республикӕйы цӕрджытӕй цы бирӕ ӕндӕр фарстытӕ цӕуы, уыдонӕн дзуапп радта Цӕгат Кавказы статистикӕйы управленийы РЦИ-Аланийы хайады разамонӕг Олег Быкадоров:

— Цӕрджыты сфыст кӕдӕй кӕдмӕ арӕзт цӕуы, стӕй цавӕр сты раздӕры сфысты бӕрӕггӕнӕнтӕ?

— Уӕрӕсейы цӕрджыты сфыст, йӕ тыхы цы закъонад ис, уымӕ гӕсгӕ арӕзт цӕуы 10 азмӕ иу хаттӕй арӕхдӕр нӕ. Цӕрджыты раздӕры ӕппӕтцӕдисон сфыст та ацыд 2010 азы. Росстаты бӕрӕггӕнӕнтӕм гӕсгӕ УФ-йы цӕрджыты нымӕц 2010 азы сфысты нымадӕй рауад 143,4 милуан адӕймаджы. Адонӕй 66,4 милуаны сты нӕлгоймӕгтӕ ӕмӕ 76,9 милуаны сылгоймӕгтӕ. РЦИ-Аланийы цӕрджыты нымӕц рауад 712980 адӕймаджы. Адонӕй 331011 — нӕлгоймӕгтӕ (46,4 проценты), сылгоймӕгтӕ — 381969 адӕймаджы (53,6 проценты). Горӕтаг цӕрджытӕ рауадысты 454560 адӕймаджы. Адонӕй нӕлгоймӕгтӕ — 207945 адӕймаджы (45,7 проценты), сылгоймӕгтӕ — 246615 адӕймаджы (54,3 проценты). Хъӕууон цӕрджытӕ рауадысты 258420 адӕймаджы. Адонӕй нӕлгоймӕгтӕ — 123066 адӕймаджы (47,6 проценты), сылгоймӕгтӕ — 135,354 адӕймаджы (52,4 проценты).

— Олег, куыд базонӕн уыдзӕн сфыссӕджы?

— Ныртӕккӕ республикӕмӕ цӕуын райдыдтой Цӕрджыты ӕппӕтуӕрӕсеон сфысты бӕрӕггӕнӕнтӕ (атрибуттӕ). Сфысджытыл уыдзӕн сӕрмагонд уӕлӕдарӕс, ӕмӕ сӕ ӕнцонӕй базонӕн уыдзӕн «Всероссийская перепись населения 2020» фыст кӕуыл уа, ахӕм ӕрвхуыз хызынӕй, стӕй сӕ ӕрвхуыз хъуырбӕттӕнтыл дӕр фыст уыдзӕн «Всероссийская перепись населения 2020». Уымӕй уӕлдай, сфысджытӕм уыдзӕн ӕвдисӕндар фидаргонд хуызӕгмӕ гӕсгӕ мыхуыр ӕмӕ Росстаты разамонӕджы къухӕвӕрдимӕ, фӕлӕ сыл ӕууӕндӕн ис, паспорт равдисгӕйӕ.

— Цӕрджыты сфысты куыд архайӕн уыдзӕн 2020 азы?

— 2020 азы 1 октябрӕй 30 октябрмӕ 1267 рӕстӕгмӕ кусӕджы зилдзысты Республикӕ Цӕгат Ирыстон-Аланийы цӕрджыты фатертыл. Республикӕйы цӕрджытӕй йӕ хӕдзармӕ сфысджыты бауадзын кӕй нӕ бафӕнда, уыдонӕн фадат уыдзӕн 212 стационарон бынаты сфысты архайынӕн. Республикӕйы цӕрджытӕй идентификаци ӕмӕ аутентификацийы Иугонд системӕйы стандартон хыгъдон фыст кӕмӕн ис, уыдонӕн та хӕдбарӕй сӕ бон уыдзӕн интернет-сфысты портал «Госуслуги»-йы ацӕуын, лӕггад «Пройти перепись населения» равзаргӕйӕ. Уыимӕ, электрон анкетӕ байдзаг кӕнӕн ис канд дӕхиуыл нӕ, фӕлӕ дӕ бинонтӕй алкӕуыл дӕр.

Цӕрджыты 2020 азы сфысты архайын кӕй фӕнды сфыссӕджы хуызы, уыдонӕн та 2020 азы июлы-августы сӕ бон ӕрхатын у Цӕгат Кавказстаты РЦИ-Аланийы управленимӕ.

ОСТАВЬТЕ ОТВЕТ

Please enter your comment!
Please enter your name here