Адӕмон зарӕгӕй — оперӕмӕ

0
64

Ирыстоны профессионалон музыкалон аивадмӕ йӕхи сӕрмагонд хуынтӕ чи хӕссы, нӕ культурӕйы уыцы номдзыд архайджытӕм хауы Цӕгат Ирыстоны ӕмӕ УФ-йы адӕмон артист, оперон зарӕггӕнӕг Бӕцӕзаты Юри.

Нӕ республикӕйы Оперӕ ӕмӕ балеты театр (ныр — Бетъырбухы Марияйы театры филиал) куы байгом, уӕд дзы нӕ бӕстӕйы уӕлдӕр аивадон ахуыргӕнӕндӕттӕй Ирыстонмӕ ӕрцӕугӕйӕ, нӕ адӕмӕн йӕ аивад лӕвар кӕнын чи райдыдта ӕмӕ сын сӕ зӕрдӕтӕм уайтагъд фӕндаг чи ссардта, уый уыд заманхъуйлаг зарӕггӕнӕг. Хъӕуы ныхасы, куывдты, чындзхаст, чызгӕрвыстты-иу ацӕргӕ урсбоцъо лӕгтӕ адӕмон зарджытӕ куы кодтой, уӕд сӕм-иу Юри хъусынӕй не ‘фсӕст. Фӕстӕдӕр йӕхӕдӕг дӕр зарын райдыдта. Хъӕуы астӕуккаг скъолайы ахуыры рӕстӕг та архайдта хихъӕппӕрисадон къорды. Уыцы рӕстӕг хъӕуы Культурӕйы хӕдзары цы кинонывтӕ ӕвдыстой, уым цы зарджытӕ зарыдысты, уыдон-иу бахъуыды кодта ӕмӕ сӕ зарыд. Уыцы кинонывтӕй йӕ зӕрдӕмӕ тынг дӕр фӕцыдысты индиаг номдзыд режиссер ӕмӕ актер Радж Капуры кинонывтӕ «Бродяга» ӕмӕ «Господин 420». Иу ахӕмы хъӕумӕ ӕрцыд зыдгонд музыкант ӕмӕ дирижер Леон Давыдов. Бацагуырдта ӕрыгон лӕппуйы, ӕмӕ йын уый азарыд цалдӕр зарӕджы.

— Мӕнӕ фидӕны оперон зарӕггӕнӕг, — загъта Давыдов ӕмӕ йӕ йӕ хъӕбысы ӕрбакодта. Аивады сусӕгдзинӕдтӕ Юри йӕхицӕн ӕргом кодта йӕ ахуыргӕнӕг Павел Брядихины фӕрцы. Уый йын вокалы сусӕгдзинӕдтӕ амыдта музыкалон училищӕйы. Мӕскуыйы Чайковскийы номыл консерваторимӕ та Юри ацыд, училищӕйы ӕртыккаг курс нӕма фӕцис каст, афтӕмӕй. Уым та йын вокалон аивады сусӕгдзинӕдтӕ ӕргом кодта профессор Оксана Свешникова. Юрийӕн дзы, йӕ царды уавӕртӕм гӕсгӕ, кӕронмӕ ахуыр кӕнын нӕ бантыст, бахъуыд ӕй йӕ ахуыр ныууадзын ӕмӕ иуцастӕр рӕстӕджы фӕстӕ йӕ ахуыр адарддӕр кодта Саратовы паддзахадон консерваторийы.

Ивгъуыд ӕнусы 70-ӕм азты нӕ республикӕйы байгом Оперӕ ӕмӕ балеты паддзахадон театр. Уый уыд стыр цау нӕ республикӕйы культурӕйы. Рагӕй йӕм ӕнхъӕлмӕ кастысты. Театры сӕйраг режиссер, УФ-йы адӕмон артист Лекъты Юри ӕрӕмбырд кодта, ирон фӕсивӕдӕй Мӕскуыйы ӕмӕ нӕ бӕстӕйы ӕндӕр стыр горӕтты чи ахуыр кодта, уыцы фӕсивӕды. Семӕ уыд Бӕцӕзаты Юри дӕр. Уый Ирыстонмӕ ссӕуыны размӕ иуцасдӕр рӕстӕг уыд Саратовы оперон театры солист.

Нӕ республикӕйы музыкалон театримӕ баст ӕрцыд йӕ цард ӕххӕстӕй. Сарӕзта дзы амӕй-ай хуыздӕр сурӕттӕ: Чайковскийы «Пиковая дама»-йы — Томский, «Евгений Онегин»-ы — Онегин, Вердийы «Аидӕ»-йы — Амонасро, «Иолантӕ»-йы — Эбн-Хаки, » Кармен»-ы — Искамильо.

Сӕдӕ сурӕтӕй фылдӕр сарӕзта Юри йӕ уарзон театры сценӕйы. Сӕ иуӕй-иннӕ аивдӕр ӕмӕ зӕрдӕагайгӕдӕр. Уӕдӕ йын ирон композиторты оперӕты ӕмӕ опереттӕты дӕр бантыст бирӕ рӕсугъд сурӕттӕ саразын. Уыимӕ, се ‘ппӕты дӕр сарӕзта сӕйраг сурӕттӕ: Гӕбӕраты Ильяйы оперӕ «Азау ӕмӕ Таймураз»-ы — Таймураз, Хаханты Дудары «Ханты цагъд»-ы — Бӕтӕхъо, Гӕбӕраты Ильяйы «Оллана»-йы — Амыран. Афтӕ зӕгъӕн ис, Бӕцӕзы-фырт ацы оперӕты цы партитӕ азарыдис, уыдон систы нӕ музыкалон аивады ӕвидигӕ хӕзнатӕ.

Зындгонд зарӕггӕнӕгӕн йе сфӕлдыстадон биографи хъӕздыг ӕмӕ бирӕвӕрсыг у. Фӕлӕ дзы уӕддӕр, ӕвзист фӕрдгуыты астӕу сыгъзӕрин куыд ӕрттива, афтӕ бӕрӕг дары Плиты Христофоры оперӕ «Къоста». Юри дзы ахъазыд Къостайы ролы.

— Нӕ театры разамынд ӕмӕ сӕйраг режиссер УФ-йы адӕмон артист Лекъты Юри мын ацы оперӕйы Къостайы сурӕт саразын куы бахӕс кодтой, уӕд фырцинӕй мӕхицӕн бынат нал ардтон, — дзырдта мын Юри. — Иннӕмӕй та мӕхимидӕг тыхсӕгау кодтон. Сценӕйы мӕ ирон адӕм нӕ номдзыд поэты фӕлгонцы куы феной, уӕд сӕ зӕрдӕмӕ фӕцӕудзӕн ӕви нӕ, уыцы сагъӕс мын ӕнцой нал лӕвӕрдта. Ӕмӕ йӕ фыццаг хатт куы равдыстам, уӕд рауад иттӕг хорз. Суанг ма йӕ Мӕскуымӕ Немирович-Данченкойы номыл театрмӕ дӕр аластам. Уым та йӕ дирижер уыд Советон Цӕдисы адӕмон артисткӕ Дудараты Вероникӕ. Ӕз ӕй тынг нымадтон, уый дӕр мын, куыд зарӕггӕнӕгӕн, афтӕ аргъ кодта. Спектакл куы фӕцис, уӕд мӕм гримгӕнӕн уатмӕ бауад, йӕ мидбылты бахудт ӕмӕ мын арфӕтӕ кӕнынмӕ фӕцис. Ӕз дӕр ын йӕ зӕрдиаг ныхӕсты тыххӕй уӕзданӕй бузныг загътон. Уатӕй тыргъмӕ куы ахызт, уӕд ма фӕзылд ӕмӕ ӕнӕдызӕрдыгӕй загъта:

— Юри, ацы партийы тыххӕй дын Хетӕгкаты Къостайы номыл паддзахадон преми, ӕнӕмӕнг, ратдзысты.

Бӕцӕзаты Юри нӕ оперӕ ӕмӕ балеты театры нӕ аивадуарзджытӕн удуӕлдайӕ лӕггад кӕны 50 азӕй фылдӕр. Къорд азы ахуыргӕнӕгӕй бакуыста Гергиты Валерийы номыл аивӕдты колледжы. Йӕ курдиаты рухсӕй цы фӕсивӕды зӕрдӕтӕ фӕхайджын кодта, уыдон абон сты зындгонд зарӕггӕнджытӕ. Сӕ аивадӕй рухс кӕнынц мингай адӕмы зӕрдӕтӕ. Ӕнтыстджынӕй кусынц Ирыстоны ӕмӕ Уӕрӕсейы оперон театрты, вокалон ансамблты.

— Мӕнӕн профессионалон музыкалон аивадмӕ уӕрӕх фӕндаг байгом ирон адӕмон зарӕджы фӕрцы, — зӕгъы Юри. — Мӕ бар куы уаид, уӕд ын хицӕн сахӕттӕ радих кӕнин нӕ бӕстӕйы уӕлдӕр музыкалон ахуыргӕнӕндӕтты. Уымӕн ӕмӕ нӕ мадӕлон ӕвзаджы цы мыртӕ ис, уыдон се ‘ппӕт дӕр хорз ахадынц, зарӕггӕнджытӕн сӕ хъӕлӕстӕ раст ӕвӕрыны хъуыддагыл.

Нӕ уарзон зарӕггӕнӕгӕн нӕ зӕрдӕ зӕгъы фидар ӕнӕниздзинад. Царды хорзӕхтӕй райгонд уӕд. Зындзинад ӕмӕ хъыг макуыуал бавзарӕд.

Гасанты Валери

ОСТАВЬТЕ ОТВЕТ

Please enter your comment!
Please enter your name here