Самбойы бӕрӕгбон — Беслӕны

0
17

Ӕппӕтуӕрӕсеон «Самбойы бон» а фӕстаг азты нӕ бӕстӕйы алы рӕтты фӕцӕуынц алыхуызон ерыстӕ.

Уыцы хорз ӕгъдау ныффидар нӕ республикӕйы дӕр ӕмӕ самбойы бӕрӕгбоны кадӕн арӕзт ӕрцӕуынц Цӕгат Ирыстоны фыццаг бынат бацахсыныл ерыстӕ ӕрыгӕтты ‘хсӕн. Фылдӕр хатт ахӕм ерыстӕ фӕцӕуынц Беслӕны.

Ацы аз дӕр та 16 ноябры Беслӕны «Спортивон-дзӕбӕхгӕнӕн комплекс»-ы сӕ арӕхстдзинад ӕвдыстой Цӕгат ӕмӕ Хуссар Ирыстоны ӕвзонг самбисттӕ.

Ӕдӕппӕтӕй ерысты архайдтой 2007-2008 азты гуырд 110 лӕппуйы.

Ерыстӕ гом кӕнгӕйӕ, ӕвзонг спортсментӕн зӕрдиаг арфӕтӕ ракодтой: РЦИ-Аланийы Парламенты депутат Гуытъиаты Вячеслав, Рахизфарсы районы самбойы федерацийы сӕрдар Уарзиаты Валери, нӕ республикӕйы самбойы иугонд командӕйы сӕйраг тренер Гаситы Петр, самбойы спортивон скъолайы директор Гаситы Тимур ӕмӕ ерысты сӕйраг тӕрхонгӕнӕг Илья Циклаури.

Ерыстӕ байгом кӕныны размӕ Уӕрӕсейы сгуыхт тренер Гаситы Петр кадджын уавӕры Уӕрӕсейы спорты мастермӕ кандидатты ӕвдисӕндартӕ радта ӕрыгон курдиатджын самбисттӕ: Кодзырты Солӕман, Кодзаты Хетӕг ӕмӕ Хуыгаты Олегӕн.

Ерыстӕ рауадысты тынг зӕрдӕмӕдзӕугӕ. Спортуарзджытӕ дӕргъвӕтин къухӕмдзӕгъд иу ӕмӕ дыууӕ хатты нӕ сарӕзтой ӕвзонг самбисттӕн сӕ сӕрӕн архайды тыххӕй.

Ерыстӕ цыдысты дӕс уӕзы ӕмӕ дзы алкӕцыйы дӕр уыд, ныридӕгӕн йӕ курдиат ирдӕй кӕмӕн зыны, ахӕм цалдӕргай лӕппутӕ. Сӕ уӕзты фыццаг бынӕттӕ бацахстой: 27 кг — Дзылыхты Сослан, 31 кг — Статенко Ростислав, 34 кг — Владимир Садовничий, 38 кг — Михаил Чониашвили, 42 кг — Къодоты Барсӕг (РХИ), 46 кг — Владимир Портнягин, 50 кг — Хъуылымбегты Феликс (РХИ), 55 кг — Уалыты Гермӕн (РХИ), 60 кг — Карсанаты Тамерлан (РХИ), +60 кг — Кокойты Таймураз (РХИ).

Куыд уынӕм, афтӕмӕй фондз уӕзы уӕлахиздзаутӕ систы Хуссар Ирыстоны минӕвӕрттӕ. Сӕ тренертӕ Хъоцыты Тамерлан ӕмӕ Хъотайты Дмитри сӕ хъомылгӕнинӕгты ӕнтыстджын архайды тыххӕй бузныг сты сӕ цӕгатаг ӕмбӕлттӕй. Хуссар Ирыстоны Парламенты депутат, тренер Хъотайты Дмитри зӕгъы:

«Ардӕм нӕ хъомылгӕнинӕгтимӕ мах фыццаг хатт не ‘рбацыдыстӕм. Нӕ лӕппуты нын ныр цалдӕр хатт фӕхуыдтой, Цӕгат Ирыстоны цы ерыстӕ фӕцӕуы, уыдонмӕ, ӕмӕ сын уый тынг фӕпайда. Нӕ кӕстӕртӕ кӕрӕдзиимӕ арӕхдӕр куы ӕмбӕлой, уӕд уый уыдзӕн хорз хъуыддаг.

Мах бузныг зӕгъӕм Гаситы Петр, Хуыгаты Юри, Козаты Алан ӕмӕ иннӕ тренертӕн. Уыдон кӕдфӕндыдӕр мах нӕ рох кӕнынц. Ныр мах дӕр нӕ зӕрдӕ дардзыстӕм, иннӕ аз Хуссар Ирыстоны цы ерыстӕ саразынмӕ хъавӕм, уырдӕм нӕм нӕ цӕгатаг ӕфсымӕртӕ кӕй сӕмбӕлдзысты, ууыл».

Ерысты бӕрӕггӕнӕнтӕй разыйӕ баззад Уӕрӕсейы сгуыхт тренер Гаситы Петр дӕр: «Нӕ кӕстӕрты сӕрӕн архайдӕй мах разы стӕм. Кӕй зӕгъын ӕй хъӕуы, ацы кары сывӕллӕттӕй домӕн нӕй, ас спортсментӕм цӕмӕ фенхъӕлмӕ кӕсӕм, ахӕм бӕрӕггӕнӕнтӕ. Сӕйрагдӕр у, сывӕллӕттӕ самбойы рӕсугъддӕр фӕзылдтытӕ равдисынмӕ кӕй тырнынц, уый. Мӕн уӕлдай арфӕ ракӕнын фӕнды Рахизфарсы районы разамонджытӕ ӕмӕ бӕрнон кусджытӕн, спортмӕ хорз цӕстӕнгас кӕй дарынц, уый тыххӕй. Самбойы бӕрӕгбон Беслӕны арӕх кӕй аразӕм, уый дӕр у уыдоны фӕрцы.

Гуытъиаты Вячеслав, Уарзиаты Валери ӕмӕ се ‘ххуысгӕнджытӕ кӕдфӕндыдӕр бацархайынц ерыстӕн хорз уавӕртӕ саразыныл, ӕмӕ сын мах зӕгъӕм стыр бузныг. Хорз цӕст нӕм дарынц нӕ республикӕйы самбойы федерацийы президент Фидараты Таймураз ӕмӕ вице-президент Залеты Витали дӕр. Уыдоны фӕрцы сарӕхсӕм, ерыстӕ аразгӕйӕ цы фарстытӕ сӕвзӕры, уыдон бахынцынмӕ».

Иу дзырдӕй, «Самбойы бон» рауад ӕцӕг бӕрӕгбонау зӕрдӕмӕдзӕугӕ.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here