Рамбылдтой авд хӕрзиуӕджы

0
65

Иугонд Араббаг Эмиратты, горӕт Дубайы ивгъуыд къуыри рог атлетикӕйӕ цыдысты, йе ‘нӕниздзинад хъыгдард кӕмӕн у, уыцы спортсменты ‘хсӕн дунеон чемпионаты ерыстӕ.

Уӕрӕсейы иугонд командӕйы цы ӕхсӕз ирыстойнаг спортсмены уыд, уыдонӕн Дубайы бантыст авд хӕрзиуӕджы рамбулын.

Сӕ низы ахастмӕ гӕсгӕ, спортсментӕ дихгонд вӕййынц алыхуызон  кълӕстыл.

Кълас 37-ы ерыс кодтой, йӕ къух сахъат кӕмӕн у, уыцы спортсментӕ. Уыдоны ‘хсӕн ӕфсӕйнаг къори фехсынӕй фесгуыхт Хынцӕгты Альберт. Уый 5 кг  къори фехста 15,25 метрмӕ ӕмӕ бацахста 1-аг бынат. Альберты ерыстӕм бацӕттӕ кодтой тренертӕ Хъороты Барис ӕмӕ Гаглойты Валери. Хъороты Барис куыд зӕгъы, афтӕмӕй Альбертӕн йӕ гӕнӕнтӕ сты фылдӕр ӕмӕ, иннӕ аз Олимпаг хъӕзтытӕм цӕттӕ кӕнгӕйӕ, нӕ нысан уыдзӕн 17 метрмӕ ‘ввахс бӕрӕггӕнӕн равдисын.

Дубайы дыууӕ ӕвзисты ӕмӕ иу бронзӕ майдан рамбылдта Кобесты Чермен. Уый 2-аг бынӕттӕ бацахста, 100 ӕмӕ 200 метрмӕ згъоргӕйӕ, 400 метрмӕ та уыд 3-аг.

Дӕргъмӕ гӕпп кӕнынӕй Хынцӕгты Хетӕг равдыста 6,42 метры ӕмӕ бацахста 2-аг бынат.

Ӕфсӕйнаг къори фехсынӕй ма 3-аг бынат бацахста Кокойты Алан, Сланты Виктория та бронзӕ майданӕй хорзӕхджын ссис 4х100 м. эстафетӕйы згъоргӕйӕ.

Хӕрзиуӕг рамбулынмӕ тынг хӕстӕг уыд Мӕргъиты Георги дӕр. Хӕрдмӕ сгӕпп кодта 1,92 м ӕмӕ бацахста 4-ӕм бынат, фӕлӕ йын ахӕм бӕрӕггӕнӕн бар дӕтты иннӕ аз Олимпаг хъӕзтытӕм балцӕг райсынӕн.

Куыд уынӕм, афтӕмӕй не ‘хсӕз спортсмены дӕр сӕхи цӕттӕ кӕндзысты Олимпаг хъӕзтытӕм.

Нӕ сӕрӕн фӕсивӕды ерыстӕм бацӕттӕ кодтой тренертӕ: Гаглойты Валери, Хъороты Владимир, Хъороты Барис, Хуыгаты Гочӕ ӕмӕ Къуымӕриттаты Валери.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here