Ерыстӕ — хӕсты архайджыты номыл

0
58

Дзӕуджыхъӕуы Терчы был цы мотодром ис, уым ӕрвылаз мотоциклетон спортӕй фӕцӕуынц Фыдыбӕстӕйы Стыр хӕсты архайджыты номыл ерыстӕ. Ацы ерыстӕ цалдӕр азы размӕ арӕзт ӕрцыдысты нӕ республикӕйы автомотоспорты федерацийы кадджын президент Хъӕдохты Аркадийы хъӕппӕрисӕй ӕмӕ фӕцӕуынц Джеоргуыбайы бӕрӕгбоны къуыри.

Ацы аз ерысты архайдтой: Цӕгат Ирыстоны, Стъараполы, Белгороды, Краснодары, Сочийы, Черкесскы, Астраханы, Элистайы, Минводы, Налцыччы, Грознайы, Пятигорскы, Буденновскы, Невинномысскы, Каспийскы мотоциклисттӕ.

Ӕдӕппӕт сӕ арӕхстдзинад ӕвдыстой 50 спортсмены.

Ерыстӕ гом кӕнгӕйӕ, спортсментӕ ӕмӕ спортуарзджытӕн зӕрдиаг арфӕтӕ ракодтой: РЦИ-Аланийы автомотоспорты федерацийы кадджын президент Хъӕдохты Аркади, РЦИ-Аланийы Ветеранты советы сӕрдары хӕдивӕг, авиацийы инӕлар-майор Бедойты Руслан, нӕ республикӕйы мотоспортӕй фыццаг спорты мастер Юрий Гиреев, Белгороды облӕсты мотоспорты федерацийы президент Валерий Антюфеев ӕмӕ Цӕгат Кавказы федералон зылды мотоспорты федерацийы президент Вячеслав Фисенко.

Мотоциклисттӕ равдыстой стыр сӕрӕндзинад ӕмӕ сӕ архайдӕй дисы бафтыдтой спортуарзджыты.

Ерыстӕ цыдысты авд хуызы кълӕсты ӕмӕ дзы алкӕцыйы дӕр уыд, йӕ дӕсныдзинад дунеон ерысты хъуыстгонд кӕмӕн у, ахӕм мастертӕ.

Уӕлахиздзаутӕ систы: кълас 50 см3 — Арсений Перепилицин (Стъараполы край), кълас 65 см3 — Юрий Трофимов (Белгород), кълас 85 см3 — Елхъанаты Ацӕмӕз (СК «Кавдоломит» РЦИ-Алани), кълас 125 см3 — Илья Илюхин (Белгород), кълас 250 см3 — Александр Кива (СК «Бавари», РЦИ-Алани), кълас «Мастер» — Сырхауты Артур. Ацы къласы ма дыккаг бынат бацахста Елхъанаты Эдуард (СК «Кавдоломит»). Кълас «Хобби»-йы фӕуӕлахиз Денис Байдуаз (Элиста).

Командон ерысты 1-аг бынат бацахста СК «Бавари» (Дзӕуджыхъӕу), 2-аг бынатмӕ рацыд Белгороды командӕ «Пилот», Астраханы спортивон клуб «Искра» та бацахста 3-аг бынат.

Уӕлахиздзаутӕ ӕмӕ призон бынӕттӕ бацахсджытӕ хорзӕхджын систы майдантӕй, кубоктӕй, дипломтӕй ӕмӕ ӕхцайы лӕвӕрттӕй. Уый тыххӕй ерысаразджытӕ зӕрдиаг арфӕ кӕнынц Хъӕдохты Аркадийӕн, компаниты къорд «Бавари”-йӕн ӕмӕ нӕ республикӕйы Ветеранты советӕн.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here