Мӕ ныхасӕмбал — «Рӕстдзинад»

0
40

Газет «Рӕстдзинад» мын мӕ зӕрдӕйы бирӕ азты гуырын кӕны хорз ӕнкъарӕнтӕ. Иры дзыллӕты ахуыр кӕны рӕстудӕй цӕрыныл, уарзын сын кӕны сӕ мадӕлон ӕвзаг. Зонгӕ нӕ кӕны нӕ фыдӕлты царды хабӕрттимӕ. Абоны царды хорзӕй цы ис, уыдон дӕр нӕ рох кӕнынц редакцийы кусджытӕ. Кӕддӕриддӕр нӕ зонгӕ кӕнынц ӕхсӕнадон, политикон, экономикон, социалон фарстытимӕ. Газеты ирдӕй ӕвдыст цӕуы нӕ рагфыдӕлты истори. Бирӕ цымыдисаг ӕрмӕджытӕ дзы ис бакӕсӕн культурон, спортивон царды тыххӕй. Йӕ арфхъуыдыджын уацтӕ разӕнгард кӕнынц рӕзгӕ фӕлтӕры ахуыры, наукӕйы, аивады, спорты бӕрзӕндтӕм схизынмӕ. Ахуыр сӕ кӕнынц нӕ куырыхон фыдӕлты хуыздӕр ӕгъдӕуттыл: лӕгдзинад, хъӕбатырдзинад, уӕздандзинад, адӕймагдзинад, ирон ӕфсармыл; хистӕрӕн кад ӕмӕ лӕггад кӕнын. Гуырын сӕм кӕнынц, ирон лӕджы намысджын цы ӕвӕджиауы миниуджытӕ кӕнынц, уыдон. Газет «Рӕстдзинад» не ‘ппӕтыл дӕр тауы ирон фарн. Ӕппӕт хъарутӕй дӕр архайы ууыл, цӕмӕй, дунейы цардимӕ ӕмдзу кӕнгӕйӕ, нӕ адӕм сӕ ирондзинад бахъахъхъӕной. Нӕ ирон, нӕ уарзон газет стыр ӕргом здахы нӕ мадӕлон ӕвзаг, нӕ удварны хӕзнатӕ бахъахъхъӕнынмӕ. Цыбыр дзырдӕй, ничи дзы рох кӕны, ницы дзы рох кӕны.

Газет канд зондамонӕг нӕу, фӕлӕ йӕ иузӕрдион газеткӕсджыты фарсхӕцӕг, се ‘ххуысгӕнӕг. Дӕ цин дӕр ын зӕгъ, дӕ маст дӕр ын радзур. Фӕлӕ мӕ дисы дӕр, сагъӕсы дӕр ӕфтауы уый, ӕмӕ нӕ иуӕй-иутӕ (растдӕр зӕгъгӕйӕ та — бирӕтӕ) куыдфӕндыйы цӕстӕй кӕй кӕсынц нӕ царды айдӕн — газет «Рӕстдзинад»-мӕ. Уый тыххӕй мӕ уарзон газетӕн зӕгъын, мӕ зӕрдӕйы арфы цы маст ӕрбынат кодта, уый.

Цӕвиттон, ӕрӕджы сӕмбӕлдтӕн Алагиры районы газет «Сӕуӕхсид»-ы мыхуыргонд ӕрмӕджы тыххӕй. Бауырнӕд уӕ, хорз адӕм, ахӕм стыр сыхбӕсты цӕрджытӕй ӕрмӕстдӕр иу, дыууӕ хӕдзары исынц районы газет «Сӕуӕхсид». Хуыздӕр уавӕры нӕй «Рӕстдзинад» дӕр.

— Ау, уый та куыд? Дӕ районы цы хабӕрттӕ цӕуы, уыдон ма зон, уӕдӕ ирон дзырды хъомыс цы газетӕй ӕнкъарӕм, ирондзинадмӕ, иудзинадмӕ нӕм чи сиды, уыцы фарнхӕссӕг, нӕ ирон газет ма кӕс, уымӕн уӕвӕн куыд ис, зӕгъгӕ, сын куы бауайдзӕф кодтон, уӕд сӕхи сраст кодтой:

— Омӕ нӕм постхӕссӕг нӕй, ӕмӕ нӕм газеттӕ нӕ хӕццӕ кӕнынц.

Куыд ис уымӕн уӕвӕн, ӕмӕ постхӕссӕг кӕй нӕй, уый тыххӕй адӕм зивӕг кӕной газеттӕ рафыссынмӕ. Ныры рӕстӕджы ӕгуыст адӕм бирӕ куы ис, уӕд афтӕ зын ссарӕн цӕмӕн у, газеттӕ хӕдзӕрттӕм чи хӕсса, ахӕм адӕймаг? Уӕвгӕ та, афӕстаг рӕстӕг ахӕм уавӕры канд ацы хъӕу нӕй. Постхӕссӕг сӕм кӕй нӕй, уый тыххӕй бирӕ хъӕуты цӕрджытӕ тыхсынц. Мӕ хъуыдымӕ гӕсгӕ, ацы уавӕр банывыл кӕнын хауы хъӕуты ӕмӕ постты хайӕдты разамонджытӕм. Цӕмӕй ахӕм къуырцдзӕвӕны уавӕрӕй фервӕзой хъӕуты цӕрджытӕ, уый тыххӕй хъуамӕ уыдон ссарой мадзал. Ӕвӕстиатӕй бацархайын хъӕуы ацы фарст алыг кӕныныл, науӕд та 2020 азы фыццаг ӕмбисы дӕр адӕм ӕнӕ газеттӕй баззайдзысты. Ацы маст радзырдтон Алагиры районы газет «Сӕуӕхсид»-ы редакцийы кусджытӕн дӕр. Кӕд, зӕгъын, ӕй районы хицауад бакӕсиккой ӕмӕ уыдон уӕддӕр исты уынаффӕ бакӕниккой, ахӕм ӕнӕраст хъуыддагыл бакусиккой.

Мӕнӕ та ныр дӕр йӕ тӕмӕны ис 2020 азы фыццаг ӕмбисӕн газеттӕ рафыссыны рӕстӕг, гъемӕ, цӕй ӕмӕ ӕмхуызонӕй рафыссӕм нӕ районты газеттӕ ӕмӕ нӕ адӕмон газет «Рӕстдзинад» ӕмӕ сӕ не ‘ппӕт дӕр кӕсӕм хъӕлдзӕг зӕрдӕтимӕ.

Фӕрниаты Рая,

газет «Рӕстдзинад»-ы иузӕрдион хӕлар

ОСТАВЬТЕ ОТВЕТ

Please enter your comment!
Please enter your name here