Уӕндон къахдзӕфтӕ

0
292

Ирон адӕмӕн аивадмӕ уарзт ӕрдзӕй лӕвӕрд у. Йӕ зӕрдӕйы арфы кафынмӕ, зарынмӕ, музыкалон инструменттӕй цӕгъдынмӕ зӕрдӕргъӕвддзинад чи нӕ рахӕссы, уыдон хӕрз стӕм сты. Фыдӕлты заманӕй абонмӕ нӕ зарӕггӕнджыты ӕмӕ композиторты фӕрцы сырӕзт ирон классикон музыкалон аивад. Ныр дӕр нӕм ис, аивады йе ‘нтыстытӕй Ирыстонӕн кад чи кӕны, ахӕм фӕсивӕд.

Къадзты Эдуард райгуырд Цхинвалы. Йӕ царды уавӕртӕ афтӕ рауадысты, ӕмӕ Хуссар Ирыстонӕй йӕ ныййарджытимӕ афтыд Бетъырбухмӕ. Иу ахӕмы йӕ мадимӕ уыд Мариинаг театры. Федта Чайковскийы балет «Щелкунчик». Спектакл куы фӕци, уӕд сӕхимӕ фӕндагыл лӕппу йӕ мадмӕ иу ныхас дӕр не скодта. Йӕ цӕстытыл уадысты сценӕйы цы артистты федта, уыдоны сурӕттӕ, сӕ аив ӕмӕ рог фезмӕлд. Сӕхимӕ куы ӕрбахӕццӕ сты, уӕд Эдуарды йӕ ныййарӕг бафарста:

— Спектакл дӕ зӕрдӕмӕ фӕцыд?

Лӕппу цыма уыцы фарстмӕ ӕнхъӕлмӕ касти, уыйау цинхуызӕй сдзырдта:

— О! Балеты артистыл сахуыр кӕнын мӕ фӕнды!

Йӕ ныхасыл ын дыууӕ нал загъта мад. Ӕмӕ Эдуард йӕ гӕххӕттытӕ радта Вагановайы номыл балеты академимӕ. Уыцы уӕлдӕр скъоламӕ афтӕ ӕнцон бахауӕн кӕй нӕу, уый Эдуард йӕхиуыл бавзӕрста. Къамисы уӕнгтӕ йын куы ӕркастысты йӕ гуырыкондмӕ ӕмӕ асмӕ, уӕд ӕй исынмӕ нӕ хъавыдысты, фӕлӕ дзы хорз кафӕг кӕй рауайдзӕн, ууыл къамисы уӕнгты баууӕндын кодта Мариинаг театры балеты труппӕйы сӕргълӕууӕг, не ‘мзӕххон, УФ-йы сгуыхт артист Уазиты Махар. Ӕмӕ дзы у тынг бузныг. Эдуард ын йе ‘ууӕнк нӕ фӕсайдта.

Академийы алы студент дӕр ахуыр куы фӕвӕййы, уӕд сӕрмагонд къамисы уынаффӕмӕ гӕсгӕ ӕрвыст ӕрцӕуы нӕ бӕстӕйы горӕтты оперӕ ӕмӕ балеты театртӕй искӕцымӕ, суанг ма сӕ фӕсарӕнтӕм дӕр арвитынц. Эдуардӕн йӕ хъул сах абадт. Ӕвзӕрст ӕрцыд Мариинаг театры кусынмӕ.

— Ме сфӕлдыстадон фӕндаг ацы театры кӕй райдыдта, уымӕй дӕн бузныг. Хорз ӕвӕрд дзы у сфӕлдыстадон ӕгъдау. Фӕлтӕрты ӕхсӕн дзы ис фидар бастдзинад. Алы ӕрыгон кафӕгӕн дӕр, спектаклыл кусгӕйӕ, кафджыты хистӕр фӕлтӕр тынг ӕххуыс кӕны, — зӕгъы Эдуард.

Уӕнгты алы фезмӕлдӕй дӕр балеты архайӕг, сӕйраг уа ӕви фӕрссаг — уӕлдай нӕу, залы чи бады, уыцы адӕмы хъуамӕ ӕууӕндын кӕна, кӕй фӕлгонд аразы, уый ӕцӕгдзинадыл. Ахӕм хъуыдыйыл хӕст у Эдуард. Ӕмӕ ныр дӕс азӕй фылдӕр уыцы зондимӕ уӕндон къахдзӕфтӕ кӕны балеты аивады, архайы фӕсарӕйнаг ӕмӕ уырыссаг композиторты балетты, кафы куыд сӕйраг, афтӕ фӕрссаг партиты дӕр. Цы спектаклты кафы, уыдоны ‘хсӕн ис, йе ‘взонгӕй Мариинаг театр ӕмӕ балет кӕй фӕрцы бауарзта, уыцы «Щелкунчик» дӕр.

Театры режиссертӕ йын фылдӕр бабар кӕнынц характерон сурӕттӕ. Ӕмӕ, уыдоныл кусгӕйӕ, йӕ хъарутыл никуы бацауӕрды. Фӕлӕ йӕм хиуыл фервӕссыны хъуыды никуы уыд. Театры уа, хӕдзары, уӕддӕр фӕхъуыды кӕны йӕ ног партийы архайӕджы сурӕтыл. Алы спектаклы фӕстӕ дӕр йӕхицӕн хатдзӕгтӕ скӕны, сценӕйы куысты абон цы хуызы рацыд аивадуарзджыты размӕ, уыцы фӕлгонцы цавӕр ӕнтыстдзинӕдтӕ ӕмӕ аиппытӕ уыд, уымӕй. Ахӕм зондыл хӕст куы уай, уӕд та ӕппынӕдзухдӕр сфӕлдыстадон адӕймаг аивады ног фӕндӕгтӕ кӕй агуры, уый бӕлвырд у.

Эдуард кӕд Бетъырбухы цӕры, уӕддӕр нӕ рох кӕны йӕ мадӕлон ӕвзаг, йӕ фыдӕлты ӕгъдӕуттӕ. Йӕ хӕдзары йӕ мад ӕмӕ йӕ бинойнагимӕ, йӕ кӕстӕримӕ фӕдзуры иронау. Уӕдӕ ахӕм ирон бӕрӕгбон нӕй ӕмӕ Эдуард йӕ хӕдзары йӕ хорз ӕмбӕлттимӕ ӕмӕ бинонтимӕ ӕртӕ уӕливыхы ма скува.

— Мариинаг театры ма балеты ӕнтыстджын къахдзӕфтӕ кӕны Дзалеты Давид дӕр. Курдиатджын ӕмӕ ӕгъдауджын лӕппу у. Коллективы ‘хсӕн ын ис кад ӕмӕ аргъ. Ӕхсызгон мын у, ныртӕккӕ дӕр Вагановайы номыл балеты академийы ирон фӕсивӕд кӕй ахуыр кӕнынц, уый, ӕмӕ сӕм, мӕ бон куыд у, афтӕ мӕ цӕст дарын. Арӕх вӕййынц нӕ театры спектаклты, сфӕлдыстадон ӕгъдауӕй сӕхиуыл зӕрдиагӕй кӕй кусынц, уый бӕрӕг у, — зӕгъы Эдуард.

Цӕй амондджын у уыцы кӕстӕр, дард ӕцӕгӕлон горӕты цӕргӕйӕ, йӕ райгуырӕн уӕзӕг чи нӕ рох кӕны. Кӕд Эдуард иудадзыгдӕр ӕнӕвдӕлон вӕййы, Уӕрӕсейы ӕмӕ фӕсарӕнты гастролтӕй йын фылдӕр хатт йӕ бинонты феныны амал дӕр нӕ вӕййы, уӕддӕр алы сӕрд дӕр ссӕуы Ирыстонмӕ ӕмӕ бабӕрӕг кӕны йӕ хӕстӕджыты. Ацӕуы хӕхтӕм, йӕ риуыдзаг сулӕфы сӕ уӕлдӕфӕй, йӕ дойны суадзы зӕлланггӕнаг, царддӕттӕг суадӕттӕй ӕмӕ ӕхсӕрдзӕнтӕй.

Царды де стырдӕр бӕллиц цы у, зӕгъгӕ, йӕ куы бафарстон, уӕд мын ахӕм дзуапп радта:

— Фӕнды мӕ Хуссар Ирыстоны балеты скъола байгом кӕнын.

Царды ӕмӕ йӕм сфӕлдыстады цы фӕндтӕ ис, уыдон иууылдӕр куыд сӕххӕст уой, уый йын нӕ зӕрдӕ зӕгъы.

Гасанты Валери

ОСТАВЬТЕ ОТВЕТ

Please enter your comment!
Please enter your name here