Ӕфсадмӕ, лӕппутӕ!

0
27

Цӕуы Уӕрӕсейы ӕфсадмӕ радон фӕззыгон ӕрсидт. Дзӕуджыхъӕуы ӕфсӕддон комиссарад бӕстӕйы Гӕрзифтонг тыхты службӕ кӕнынмӕ ныридӕгӕн арвыста цалдӕр къорды. Горӕты ӕфсӕддон комиссарадмӕ ӕрбацӕуынц сидтон кары фӕсивӕдӕй кӕнӕ сӕ ныййарджытӕй бирӕтӕ сӕ фарстытимӕ. Уымӕ гӕсгӕ Дзӕуджыхъӕуы ӕфсӕддон комиссар Беджызаты Роберт йӕ хӕсыл банымадта дзыллон информацийы фӕрӕзты руаджы адӕмӕн иуӕй-иу ахсджиаг фарстытӕ бамбарын кӕнын:

— Хъыгагӕн, куыстуӕтты, кусӕндӕтты ӕмӕ организациты ӕфсӕддон хыгъдыл дзуапдӕттӕг кусджытӕ ӕмӕ сидтонты ныййарджытӕ, стӕй сӕхӕдӕг дӕр фаг нӕ зонынц ӕфсӕддон хыгъды ӕмӕ ӕрсидты тыххӕй закъонтӕ. Хъуыддаг уый мидӕг ис, ӕмӕ уыцы закъонты сӕйраг уагӕвӕрдтӕ ивгӕ нӕ кӕнынц. Кӕд дзы ногӕй исты фӕзыны, уӕд ӕй бамбарын кӕнӕм, ӕфсӕддон хӕс бафидыны афон кӕмӕн ралӕууыд, уыцы сидтон кары лӕппутӕн, гӕнӕн ӕмӕ амалӕй — сӕ ныййарджытӕн дӕр. Фӕлӕ йӕ ныййарджытӕй бирӕтӕ нӕ бамбарынц, растдӕр зӕгъгӕйӕ та нӕ ныхӕстӕ иу хъусы бауадзынц ӕмӕ сӕ иннӕ хъусӕй рауадзынц, — загъта комиссар.

— Фылдӕр фарстытӕ сӕм цавӕр хъуыддаджы фӕдыл вӕййы? — афарстон дӕлбулкъон Беджызы-фырты.

— Ныртӕккӕ сидтонты ныййарджытӕм ӕмӕ сидтонтӕн сӕхимӕ фылдӕр фарстытӕ вӕййы службӕ кӕныны ӕмгъуыд фӕстӕдӕрмӕ аргъӕвыны фӕдыл, уӕлдайдӕр, колледжты ӕмӕ техникумты чи ахуыр кодта, уыдоны ныййарджытӕм ӕмӕ сӕхимӕ дӕр. Ахуыры азты сын службӕ кӕныны ӕмгъуыд иу хатт кӕй аргъӕвтой, уый сӕ, ӕвӕццӕгӕн, ферох вӕййы, ӕмӕ ахуыр фӕуыны фӕстӕ уӕлдӕр ахуыргӕнӕндӕттӕм куы бахауынц, уӕд дӕр ма фӕдомынц службӕйы ӕмгъуыд  ноджыдӕр ма иу хатт фӕстӕдӕрмӕ аргъӕвын. Мах сын закъоны домӕн бамбарын кӕнӕм. Уыцы домӕнӕн халӕн кӕй нӕй, уый сӕм кӕддӕр-уӕддӕр бахъары ӕмӕ сразы вӕййынц немӕ. Уыцы уагӕвӕрд иунӕг хатт дӕр хӕлд никуы ‘рцыдис.

2008 азы ӕфсӕддон службӕйы ӕмгъуыд иу азмӕ куы раивтой, уӕд, уымӕй размӕ сидтонтӕн цы льготӕтӕ уыд, уыдонӕй бирӕтӕ ивд ӕрцыдысты, зӕгъӕм, фӕкарздӕр кодтой ӕнӕниздзинады уавӕрмӕ гӕсгӕ сидтонтӕн сӕ службӕйы ӕмгъуыд фӕстӕдӕрмӕ ӕргъӕвыны хъуыддаг. Раздӕр-иу, зӕгъӕм, гыццыл сывӕллон кӕмӕн уыд, уыцы сидтоны бинойнагӕн, цалынмӕ йӕ лӕг службӕ кодта, уӕдмӕ йын Хъахъхъӕнынады министрад ӕрвылмӕйон пособи фыста. Уый, кӕй зӕгъын ӕй хъӕуы, баст уыд бӕлвырд хӕрдзтимӕ, ӕмӕ фӕстӕдӕр уыцы уагӕвӕрд ист ӕрцыд службӕйы тыххӕй закъонӕй.

— Ӕндӕр ма цы ис ногдзинадӕй ӕфсӕддон службӕмӕ ӕрсидыны хъуыддаджы?

— Ис ахӕм ӕмбарынад — мобилизацион адӕймагон фӕрӕз. Цы амоны уый? ӕфсӕддон службӕйӕ чи ссӕрибар вӕййы, уыдон иууылдӕр ӕфсӕддон комиссарады лӕууынц хыгъды, ӕмӕ сты мобилизацион адӕймагон фӕрӕз. Хуыцау бахизӕд, фӕлӕ, зӕгъӕм, хӕст райдыдта, уӕд уыдонӕй хӕсты спайдагӕнӕн кӕмӕй ис, уыдон хаст цӕуынц фӕсауӕрцы хыгъдмӕ, ӕмӕ сын фидынц мызд. Махмӕ, нӕ бӕстӕйы, ахӕмтӕ нырма хӕрзчысыл ис, фӕлӕ уыцы мадзалӕй фӕсарӕнты бирӕтӕ пайда кӕнынц. Дзӕуджыхъӕуы ахӕмтӕ (резервисттӕ) ис ӕрмӕстдӕр фӕраст. Фӕлӕ фӕстагмӕ сӕ нымӕц фӕфылдӕр уыдзӕн.

— Цы карӕнмӕ ист цӕуынц ахӕм резервисттӕ?

— Федералон закъоны куыд амынд ис, афтӕмӕй фӕсауӕрцы хыгъдмӕ сержантты ӕмӕ афицерты райсӕн ис, дыууиссӕдз ӕмӕ ноджы фылдӕргай азтӕ кӕуыл цӕуы, ахӕмты дӕр, 50-аздзыдтӕй бынтондӕр ист ӕрцӕуынц ӕфсӕддон хыгъдӕй.

— Цӕмӕй ма дӕ бафӕрсынц ӕрбацӕуджытӕ?

— Цӕмӕдӕр гӕсгӕ сӕм тынг арӕх вӕййы ахӕм фарст: службӕйы ӕмгъуыд фӕфылдӕр уыдзӕн ӕви нӕ? Хъуыддаг уый мидӕг ис, ӕмӕ абоны онг службӕйы ӕмгъуыд фӕфылдӕр кӕнын пълангонд нӕ цӕуы.

— Бадзырдмӕ гӕсгӕ службӕ кӕныны хабӕрттӕ та?..

— Уыцы хъуыддаг къорд азы размӕ лӕвӕрд ӕрцыд сӕрмагонд организацимӕ, ис Титовы уынджы ӕмӕ контрактон службӕмӕ исыны куыст уым кӕнынц. Мӕн та нӕ ныхасы кӕронбӕттӕны фӕнды, сидтон кары чи ис, уыцы лӕппутӕм фӕсидын: ма фӕстиат кӕнут, науӕд азтӕ тагъд цӕуынц ӕмӕ ӕфсӕддон билеты бӕсты хуымӕтӕджы справкӕ куы райсат, уӕд искӕд бон, гӕнӕн ис, ӕмӕ уӕ карьерон рӕзты бахъыгдара. Ныййарджытӕ, ам сымахӕй дӕр бирӕ аразгӕ у ӕмӕ уӕ кӕстӕрты сӕхи тылиф кӕнын ма уадзут.

Ныхас кодта Багаты Аврам

ОСТАВЬТЕ ОТВЕТ

Please enter your comment!
Please enter your name here