Дзуццаты Сослан: “Ӕнӕ фӕндыр зарӕг нӕ фидауы”

0
18

Адӕймаг удварнӕй хъӕздыг куы уа, йӕ бӕллицтӕ ӕмӕ ӕнкъарӕнтӕ ӕнӕкӕрон куы уой, уӕд зӕрдӕйӕ ӕввахсдӕр, ӕнгомдӕр вӕййы йӕ уарзон дзыллӕтӕм. Уый фӕархайы исты хорздзинад фӕуыныл йӕ Фыдыбӕстӕйӕн.

Абон газет «Рӕстдзинад»-ы уазӕг у РЦИ-Аланийы адӕмон ӕмӕ Республикӕ Хуссар Ирыстоны сгуыхт артист, фӕндырдзӕгъдӕг, эстрадон зарӕггӕнӕг Дзуццаты Сослан.

— Сослан, дӕ ном хъуыстгонд у аивадуарзджытӕн ӕрмӕст Ирыстоны нӕ, фӕлӕ ма Уӕрӕсейы ӕмӕ фӕсарӕнты дӕр. Зӕгъ-ма, адӕймаг цӕмӕн цӕры зӕххыл: хӕдзар сараза, бӕлас ныссадза, сывӕллон схъомыл кӕна… Ӕрыдойнаг лӕппумӕ та куыд кӕсы ацы фарст?

— Раст куы зӕгъон, уӕд се ‘ппӕт дӕр сӕххӕст кӕнын мӕ хъуыдыйы ис. Адӕмимӕ цӕрын, семӕ ӕмдзу кӕнын нӕ алкӕй хӕс дӕр у. Ныййарджыты фӕндиаг-иу уӕнт нӕ кӕстӕртӕ.

Мӕхицӕй куы зӕгъон, уӕд мӕ мад ӕмӕ мӕ фыды тынг фӕндыд, цӕмӕй суыдаин экономист. Скъолайы ахуыр кӕнгӕйӕ, уарзтон математикӕ, фӕстӕдӕр мӕ гӕххӕттытӕ балӕвӕрдтон Хетӕгкаты Къостайы номыл паддзахадон университеты экономикон факультетмӕ. Цыдӕр тых мӕ фӕстӕмӕ здӕхта, зӕрдӕ ӕхсайдта аивадмӕ… Бацыдтӕн ныры Дзӕуджыхъӕуы аивӕдты училищӕмӕ фӕндырдзӕгъдджыты къласмӕ. Мӕ фыццаг ахуыргӕнӕг уыд Гӕздӕнты Булат. Фӕстӕдӕр та ахуыр кодтон Краснодары Культурӕ ӕмӕ аивӕдты академийы адӕмон инструментты факультеты, мӕ ахуыргӕнӕг уыд УФ-йы сгуыхт артист, профессор Михаил Еськин.

Ныййарджытӕ ӕмӕ ахуыргӕнджытӕ мӕ сахуыр кодтой фӕллой кӕныныл. Ӕнӕ кусгӕйӕ цард нӕй, уый раджы бамбӕрстон. Мӕ бӕллицтӕй кӕд алцы мӕ къухы нӕма бафтыд, уӕддӕр архайын исты равдисыныл, мӕ ныййарджыты, нӕ Ирыстоны цӕрджыты зӕрдӕтӕ барухс кӕныныл.

— Сослан, ды дӕ фӕндырдзӕгъӕдӕг, стӕй ма эстрадон зарӕггӕнӕг дӕр. Зонӕм ӕй, уыцы куыстӕй ныры рӕстӕджы ӕнцон нӕу цӕрын. Уӕддӕр дӕ дӕсныдзинады фӕрцы адӕмы ‘хсӕн дӕ, сӕ размӕ, сӕ тӕрхонмӕ хӕссыс фӕндырдзӕгъдӕджы, стӕй ма эстрадон зарӕггӕнӕджы ӕвӕджиауы курдиат. Уыцы фыдӕбонӕй фӕразыс дӕ уды фӕндиаг цӕрын?

— Уарзын мӕ дӕсныйад, мӕ куыст. Уый мӕ разӕнгард кӕны, ӕмӕ та багуыбыр кӕнын, дарддӕр фӕархайын дысвӕлдӕхтӕй. Хорзӕй мын цы бантысы, уый ӕнӕвгъауӕй адӕммӕ хӕссын. Мӕ бон цӕмӕй у балӕггад кӕнын, уый нымайын нӕ адӕмы, нӕ Фыдыбӕстӕйы раз мӕ комкоммӕ хӕсыл. Мӕ цин семӕ дих кӕнын, мӕ бон куыд у, афтӕ, мӕ гӕнӕнтӕй пайда кӕнгӕйӕ.

Раст куы зӕгъон, уӕд мӕ архайд бамбардзӕн, фыццаджыдӕр, фӕндырдзӕгъдӕг. Фӕндырӕй цӕгъдын цы у, уый мӕ бирӕ хӕлӕрттӕ, сӕхиуыл ӕй чи ӕвзары, уыдон зонынц. Ӕнцонӕй ницы ис, куыст куыст у. Зӕххыл хид куы нӕ ӕртадзай, уӕд уӕлӕнгӕйтты къухы ницы ӕфты. Царды уылӕнтӕ, денджызы уылӕнтау, тыхджын сты. Хъуамӕ фӕразай, архайай. Куыст — цардӕн фӕрӕз!

Цыфӕндыйӕ дӕр мӕ дӕсныдзинад цӕстуарзонӕй хӕссын адӕммӕ. Вӕййын республикӕйы, стӕй нӕ бӕстӕйы ӕппӕтадӕмон аивадон ӕркастыты. Цалдӕр хатты сдӕн конкурсты уӕлахиздзау. 2000 азы Мӕскуыйы архайдтон Аивад ӕмӕ культурӕйы кусджыты ӕппӕтадӕмон ӕркаст «Дельфийаг хъӕзтыты». Архайдтой дзы 42 номинацийы бирӕ бӕстӕтӕй, рамбылдтон мӕ фӕндырдзагъдӕй сыгъзӕрин майдан.

— Цӕмӕй цӕры, куыд архайы адӕмы ‘хсӕнмӕ нӕртон лӕппу фидар къахдзӕфтӕй цӕуыныл? Тырнындзинад, дам, адӕймаджы хорз миниуӕг у. Нӕ дзыллӕтӕ, нӕ фӕллойгӕнӕг адӕм тырнынц культурӕмӕ. Уый стыр ахъаз у национ химбарынад ӕмӕ царды рӕзтӕн…

— Ӕцӕг артист цӕры, йӕ аивад ын чи уарзы, уыдоны уарзондзинадӕй… Хицӕн концерттӕй уӕлдай ма кусын ансамбл «ӕфсати»-имӕ, вӕййӕм Ирыстоны алы кӕрӕтты циндзинӕдты: куывдты, чындзӕхсӕвты. Адӕм нӕм фенхъӕлмӕ кӕсынц. Уый ууыл дзурӕг у, ӕмӕ сӕ кӕй фӕнды нӕ удварны хӕрзтӕ ӕмӕ хӕзнатӕй хайджын уӕвын, иронау цӕрын, царды рухсмӕ тындзын.

— Дӕ архайдӕй концертдзауты зӕрдӕтӕ кӕнынц ныфсджындӕр, уарзондӕр. Цы фӕндтӕ дӕм ис дарддӕры куысты ирон аивады?

— Фӕндтӕ — бирӕ, цардмӕ сӕ нӕма рауагътон. Ме ‘нкъарӕнтӕ куы стыхджын вӕййынц, уӕд райгуыры ног уацмыс. Фӕнды мӕ адӕмӕн лӕггад кӕнын, нӕ культурӕйы ахсджиаг бынат ахсын. Бирӕ арфӕтӕ райсын адӕмӕй. Иу хаттӕй иннӕмӕ нӕ ансамбл «ӕфсати»-имӕ дӕр нӕхиуыл бакусӕм, нӕ программӕ баххӕст кӕнӕм, фӕхъӕздыгдӕр вӕййы ног уацмыстӕй.

Куыд рахатыдтон, афтӕмӕй адӕмон зарджытӕ нӕ дзыллӕтӕ фылдӕр уарзынц. Тынгдӕр та сӕм хъары ирон фӕндыры цагъд, уымӕн ӕмӕ ирон фӕндыры зӕлтӕ, иннӕтӕй уӕлдай, ӕндӕр тоналон регистртыл арӕзт сты: бӕстон, бындурон ӕвӕрд. Уыцы зӕлты ис, ӕлутонау, стыр национ разӕнгардгӕнӕн тых ӕвӕрд удӕн.

— Кӕцӕй цӕуы аивадон кусӕгмӕ уӕлмонц архайды разӕнгардгӕнӕн хъомыс?

— Нӕ фыдӕлты фарнӕй, стӕй уарзтӕй! Уарзт та алыхуызон у! Нӕ алӕмӕты ӕрдз, нӕ урссӕр, бӕрзонд хӕхтӕ, не ‘гъдӕуттӕ, нӕ ирон фарн, нӕ домбай адӕм.

— Цавӕр у дӕ уарзондӕр ирон зарӕг, дӕхӕдӕг кӕй зарыс, ном дын чи скодта? Зӕгъӕм, зындгонд эстрадон кӕсгон зарӕггӕнӕг Ефрем Амирамовӕн — «Молодая», Аллӕ Пугачевайӕн — «Миллион алых роз». Дӕуӕн та?

— Мӕнӕн мӕ зарджытӕ иухуызон уарзон сты, иуы дӕр дзы фӕхъулон кӕнӕн нӕй…

— Сценӕмӕ рахизыны размӕ дӕм дӕ зӕрдӕ цы фӕдзуры, цавӕр бӕллиц, цавӕр фӕнд дӕм вӕййы?

— Фыццаг мыл бахӕцы катай: цавӕр адӕм бады залы, стӕй мӕхӕдӕг сарӕхсдзынӕн ӕви нӕ? Куы ӕрсабыр вӕййын, уӕд сценӕйы мӕхи фенкъарын фидардӕр, уӕндондӕрӕй фӕархайын. Ӕмӕ мын вӕййы алы хатт дӕр залы уӕвджытимӕ ӕнгом бастдзинад. Уый бӕрӕг вӕййы сӕ къухӕмдзӕгъд, сӕ бирӕ арфӕтӕй.

— Дӕ зарджытӕ сты уарзон, цымыдисаг, рӕсугъд, бӕллиццаг хъуыдытимӕ. Чи дын сӕ фыссы?

— Мӕ зарджыты ис адӕмонтӕ, ис мӕм ирон классик Цӕрукъаты Алыксандры фыст зарӕг «Гуызмайы чызджытӕ», Цӕгӕраты Гигойы фыст — «О, мӕ уарзон чызг!», «Ӕвӕццӕгӕн дӕ бауарзтон», «Райхӕлд зӕрдӕйы уарзт»; Кокайты Тотрадзы фыст зарджытӕ — «Мӕ арфӕтӕ», «Сослан ӕмӕ Эльвирӕйы зарӕг», «Уалдзыгон хур».

Нырыккон поэттӕй мӕм ис Гаглойты Анатолийы, Хабӕты Риммӕйы, Гаглойты Индирӕйы, Гӕбуаты Галинӕйы ӕмдзӕвгӕтыл зарджытӕ, мӕхӕдӕг сын ныффыстон мелодитӕ. Уыдон зарынц эстрадон зарӕггӕнджытӕ Илурты Риммӕ, Гӕбуты Жаннӕ, Хъуысаты Эльвирӕ, Дойаты Стас, Зӕнджиаты Мӕдинӕ, Гӕбуты Светланӕ, Хадыхъаты дыууӕ Аллӕйы.

— Сослан, вӕййыс балцы Уӕрӕсейы бирӕ горӕтты, фӕсарӕйнаг бӕстӕты. Цы сӕм федтай бӕллиццагӕй, уыдоны рӕсугъддзинадӕй Ирыстоны адӕмӕн цы бахай кӕнис?

— Уыдтӕн бирӕ рӕтты: Китайы, Швейцарийы, Италийы, Турчы, Шотландийы, Англисы, Францы, Гречъы, Польшӕйы, Чехийы, Венгрийы, Австрийы, Словенийы, Мысыры, Тайваны…

Ирыстонӕй хуыздӕр адӕм — уындӕй, кондӕй, бакастӕй, уӕздандзинадӕй, курдиатӕй дӕр нӕй! Нӕ кӕрӕдзийӕн аргъ нӕ кӕнӕм, ӕндӕр ницы хъуаг стӕм.

— Фӕндырӕй цӕгъдын фылдӕр уарзыс ӕви зарын?

— Фӕндырӕй цӕгъдын! ӕпппӕт инструменттӕй фылдӕр фӕндыр уарзын ӕмӕ йӕ хорз ӕнкъарын. Ӕнӕ фӕндыр зарӕг нӕ фидауы. Уӕлдайдӕр ирон зарӕг. Цагъд ӕмӕ зарӕг иумӕ баст сты. Мӕ цӕгъдтытӕ «Ирон хонгӕ», «Ханты цагъд», «Заманхъуйлаг», «Ӕрыдойнаг», «Бирӕгъзӕнггаг хонгӕ», «Куырттатаг хонгӕ» — се ‘ппӕт дӕр сты ирддӕр, зӕллангдӕр, хъӕздыгдӕр, зӕлаивдӕр. Фӕндырдзӕгъдӕг мелодийы бавӕры йӕ зӕрдӕйы арт, йӕ удцырын. Куы райхъуысы фӕндыры зӕлаив хъӕлӕс, уӕд уый вӕййы фӕндырдзӕгъдӕджы зӕрдӕйы ахаст адӕммӕ — йӕ уарзт, йӕ уды фарн! Афтӕ куы нӕ уа, уӕд ӕй ничи бамбардзӕн, хъусӕг дӕр ӕм нӕ уыдзӕн. Мӕ программӕйы ма вӕййы сыхаг республикӕты цӕгъдтытӕ дӕр: «Черкесаг хъафӕ», «Кӕсгон цагъд», «Абхазаг», «Аджайраг», «Цӕцӕйнаг» ӕмӕ иннӕ адӕмыхӕттыты мелодитӕ дӕр.

— Цы хъӕндзинӕдтӕ ис Сосланмӕ?

— Ардыгӕй суанг Мӕздӕгмӕ, фӕлтау сӕ ма ранымай… Ирыстоны кӕройнагдӕр горӕт у Мӕздӕг, ӕмӕ цалынмӕ уырдӕм хӕццӕ кӕнай, уӕдмӕ сӕ нымай ӕмӕ нымай…

— Цы ис царды рӕсугъддӕр?

— Ӕппӕтӕй рӕсугъддӕр — ӕвзонг зӕрдӕты сыгъдӕг уарзт — уӕлӕрвтау бӕрзонд, сыгъдӕг, ӕнӕфау, ӕнӕкӕрон. Ӕмӕ уым ис алцыдӕр …

— Цы у ирон уӕздандзинад?

— Уӕздандзинад… Уый иу ныхасӕй зӕгъӕн нӕй. Уыцы ныхас тынг бӕрзонд, сыгъдӕг у. Лӕг хъуамӕ уа зондджын, хъуыды кӕна, ӕмбара, йӕ фыдӕлты ном, уа ӕгъдаухӕссӕг, хиуылхӕст, цӕмӕй, йӕ цард цы миниуджытӕй аразы, уыдон уой удӕй цӕугӕ, сыгъдӕг, раст. Цӕстытӕ бынмӕ чи ‘руадзы, фӕлӕ уыимӕ гӕдывад, кӕнгӕ митӕ чи кӕны, цӕсты фӕныкъуылдмӕ ӕвзӕр чи акӕндзӕнис, стӕй та, цыма ницы уыдис, йӕхи афтӕ чи акӕны, ахӕмтӕй цард фыдуынд, ӕнад кӕны.

— Цы нӕ уарзыс ирон фынгыл?

— Мӕ мӕрдты емынӕ — ӕдзӕлгъӕддзинад, ӕнӕуаг дзыхӕй, ӕнӕуаг ӕвзагӕй куы фӕдзурынц бирӕ куы бануазынц. Бӕрцӕй алцыдӕр хорз у.

— Газет «Рӕстдзинад» исыс, искуы йӕм ӕркастӕ?

— Уый та куыд? Ирон бинонтӕ — ӕнӕ ирон зарӕг, ӕнӕ фӕндыр, ӕнӕ газет, ӕнӕ ӕртӕ кӕрдзынӕй, ӕнӕ Къостайы «Ирон фӕндыр»-ӕй у ӕнӕххӕст хӕдзар, Хуыцауы фарнӕй ӕмӕ тӕвагӕй хъуаг. Уыцы бинонтӕм дард сты не ‘гъдӕуттӕ, нӕ бӕрӕгбӕттӕ. Уыдон та, ӕнӕмӕнг, сты табуйаг — нӕ нацийы цӕсгом.

— Цавӕр хъуамӕ уа ирон чызг, цӕмӕй Сосланы зӕрдӕмӕ фӕцӕуа?

— Нӕма йыл фӕхӕст дӕн, ӕмӕ йӕ нӕ зонын…

— Сослан, мӕ зӕрдӕ дын зӕгъы стыр амонд! Дӕ фӕндтӕ дӕ къухы бафтӕнт!

Ныхас ныффыста Бызыккаты Земфирӕ

ОСТАВЬТЕ ОТВЕТ

Please enter your comment!
Please enter your name here