Къостайы номыл — фӕлтӕрты лӕвар

0
11

1964 азы нӕ республикӕйы Хицауады уынаффӕмӕ гӕсгӕ нысангонд ӕрцыд Хетӕгкаты Къостайы номыл паддзахадон преми. Уӕдӕй фӕстӕмӕ дзы хорзӕхгонд цӕуынц, литературӕ ӕмӕ аивады  стырдӕр ӕнтыстдзинӕдтӕ чи ӕвдисы, уыцы фысджытӕ, поэттӕ, музыканттӕ ӕмӕ артисттӕ.  2000-ӕм азты райдайӕны ЦИПУ-йы профессор Тедтойты Зинаидӕ ӕмӕ  доцент Дзаццеты Неля бацӕттӕ кодтой  Хетӕгкаты Къостайы номыл паддзахадон премийы лауреатты тыххӕй  мидисджын чиныг. Бахастой йӕм алы азты лауреатты тыххӕй биографион бӕрӕггӕнӕнтӕ ӕмӕ сӕ уацмыстыл цыбыр афӕлгӕстытӕ.

Чиныг «Лауреаты государственной премии имени  К. Л. Хетагурова» дыккаг хатт мыхуыры рацыд  2015 азы. Нӕ цытджын поэты 160 азы юбилеймӕ  ацы чиныг ӕххӕстдӕрӕй рухс федта ӕртыккаг хатт. Знон Национ наукон библиотекӕйы скодтой йӕ ног рауагъды презентаци. Архайдтой дзы, ацы хорзӕх алы азты чи райста, уыцы лауреаттӕ, ЦИПУ-йы ӕмӕ ЦИГСИИ-йы   ахуыргӕндтӕ, сфӕлдыстадон интеллигенцийы минӕвӕрттӕ.

Презентацийы райдайӕны уӕрӕх экраныл ӕвдыст ӕрцыдысты  лауреатты къамтӕ. Уый фӕстӕ раныхас кодтой зындгонд композитор, УФ-йы аивӕдты сгуыхт архайӕг Магкоты Ацӕмӕз, кинорежиссер, УФ-йы культурӕйы сгуыхт кусӕг Гулуты Вячеслав,  зындгонд скульптор Дзбойты Михал,  Дзӕуджыхъӕуы Евгений Вахтанговы номыл уырыссаг академион театры артист Вячеслав Вершинин, Уф-йы адӕмон нывгӕнӕг Челӕхсаты Магрез,  фыссӕг, газет «Рӕстдзинад»-ы бӕрнон редактор Цомартаты Изӕтбег,  чиныгуадзӕн «Ир»-ы редактор Будайты Милуся.

Се ‘ппӕт дӕр сӕ раныхӕсты банысан кодтой, Тедтойты Зинаидӕйы удвӕллой кӕй у алы азты ирон аивады, культурӕйы, литературӕйы рӕзт ӕвдисӕг  мидисджын чиныг-энциклопеди. Кадджын изӕры Къостайы ӕмдзӕвгӕтӕ аив бакастысты Цӕгат Ирыстоны адӕмон артисттӕ: Колыты Аксойы номыл премийы лауреат Мелыкаты Замирӕ ӕмӕ   Николай Поляков.

Презентацийы архайджытӕ ӕмӕ уазджыты зӕрдӕтӕ сӕ аивадӕй барухс кодтой Цӕгат Ирыстоны адӕмон артисттӕ: фӕндырдзӕгъдӕг Дзуццаты Сослан ӕмӕ зарӕггӕнӕг Гӕбуты Жаннӕ, РЦИ-Аланийы сгуыхт артисткӕ Дзахоты Зӕлинӕ ӕмӕ ансамбл «Чысыл джигит»-ы кафджытӕ. Номдзыд уырыссаг ӕмӕ фӕсарӕйнаг композиторты  уацмыстӕ фортепианойӕ ацагъта Тедтойты Эмин.

Кадджын изӕры кӕрон  уазджытӕн ӕмӕ Къостайы премийы лауреаттӕн зӕрдиаг арфӕ ракодта профессор Тедтойты Зинаидӕ.

Гасанты Валери

ОСТАВЬТЕ ОТВЕТ

Please enter your comment!
Please enter your name here