Паддзахадон лӕггӕдтӕ — нывыл уавӕрты

0
20

Цӕгат Ирыстон хаст ӕрцыд, паддзахадон ӕмӕ муниципалон лӕггӕдты бирӕфадатджын центрты рӕзт бӕрзонд ӕвӕрд кӕм у, уыцы регионты номхыгъдмӕ. Бирӕфадатджын центрты нӕ республикӕйы цӕрджытӕй алы адӕймаджы бон дӕр у, минӕй уӕлдӕр сӕ нымӕц кӕмӕн у, ахӕм паддзахадон лӕггӕдтӕ исын.

Ацы ног технологон уавӕртӕй пайда кӕнынц Ирыстоны цӕрджыты нӕуӕдз проценты. Ӕмӕ разыйӕ баззадысты центрты куыстӕй. Сӕ нымӕц нӕ республикӕйы фылдӕрӕй-фылдӕр кӕй кӕны, уый та дзурӕг у, Ирыстон нӕ бӕстӕйы Президенты Указтӕ бӕрнонӕй кӕй ӕххӕст кӕны, ууыл.

Цалдӕр боны размӕ РЦИ-Аланийы Информацион технологиты управленийы разамынд нӕ республикӕйы журналисттӕн сарӕзта пресс-тур. Бабӕрӕг кодтой Уӕллаг Фыййагдоны бирӕфадатджын центр «Мӕ документтӕ». Поселочы хицау Гуыриаты Валерийы ныхасмӕ гӕсгӕ, ацы ногдзинад куы фӕзынд, уӕдӕй абонмӕ комы цӕрджыты уавӕртӕ фӕрогдӕр сты.

— Хохӕй быдырмӕ араст кӕнын цавӕрдӕр справкӕ кӕнӕ ӕндӕр паддзахадон лӕггад райсыны тыххӕй, уый ӕнцон нӕ уыд. Фӕлӕ ныр уавӕр цӕхгӕр аивта ног центры куысты фӕрцы, — загъта Гуырийы-фырт. Ӕмӕ хохӕгтӕ дӕр тынг разыйӕ баззадысты.

— Нӕдӕр фӕндаггаг, нӕдӕр справкӕтӕн — ницӕмӕн мӕ бахъуыд фидын. Ӕрмӕстдӕр ӕрбахастон мӕ гӕххӕттытӕ ӕмӕ сӕ уый фӕстӕ бӕрӕг кӕцыдӕр бон цӕттӕйӕ райстон. Тынг удӕнцойдзинад у центры куыст, — загъта бынӕттон цӕрӕг Хъалӕгаты Аллӕ.

Ацы аз ма центры куысты ноджыдӕр иу ногдзинад фӕзынд. Конд дзы ӕрцыд сӕрмагонд сайт. Паддзахадон лӕггӕдты фӕдыл куырдиат центры чи ныффысса, уымӕн базоныны фадат ис, кӕцы бон ӕмӕ цал сахатмӕ ис бацӕуӕн центрмӕ ӕмӕ цӕттӕйӕ райсӕн гӕххӕттытӕ. Алы гӕххӕттӕн дӕр ис номыр. Уыцы номырмӕ гӕсгӕ сайты сбӕлвырд кӕнӕн ис, хӕдзарӕй ма рацу, афтӕмӕй лӕггӕдтӕ цы уавӕры сты, уый.

Пресс-туры фӕстӕ, РЦИ-Аланийы Информацион технологиты управленийы сӕргълӕууӕг Сӕлбиты Алан бӕлвырд радзырдта, бирӕфадатджын центрты лӕггӕдты рӕзты тыххӕй.

— Паддзахадон лӕггӕдты хуызтӕ электронон уавӕры фылдӕргӕнгӕ цӕуынц. Нӕ республикӕ дӕр дӕлдӕр никӕмӕй лӕууы. Цӕуӕм разӕй, хуыздӕртимӕ стӕм. Ӕртӕ азы размӕ сӕххӕст кодтам нӕ бӕстӕйы Президенты майы Указтӕ ӕмӕ абон сӕрыстырӕй нӕ бон зӕгъын у: нӕ республикӕйы фылдӕр адӕм пайда кӕнынц паддзахадон электронон лӕггӕдтӕй. Уыимӕ паддзахадон лӕггӕдты хуызтӕ минӕй фӕфылдӕр сты. Ам ис райсӕн фӕсарӕйнаг ног хуызы паспорт дӕр.

Кӕддӕр адӕймаг паддзахадон лӕггӕдты фӕдыл кӕд мӕйгай рады лӕууыд, уӕд уыцы рӕстӕджытӕ фӕсте баззадысты. Бирӕфадатджын центры фынддӕс минутӕй фылдӕр адӕймаг йӕ рӕстӕг куы схардз кӕна, уӕд уый центрӕн ӕгъдаухӕлдыл нымад у. Махӕн та нӕ хӕс у, нӕ республикӕйы Сӕргълӕууӕг Битарты Вячеслав нын нӕ размӕ цы нысантӕ ӕвӕры, уыдон бӕрнонӕй ӕххӕст кӕнын, цӕмӕй паддзахадӕн адӕмимӕ хӕстӕгдӕр ӕмӕ ӕнгомдӕр бастдзинад уа. Уый ахсджиаг хъуыддаг у. Хӕстӕгдӕр дыууӕ азы ӕппӕт лӕггӕдтӕ дӕр конд цӕудзысты центры. Никӕцы ведомствӕмӕ, министрадмӕ хъӕудзӕн цӕуын, справкӕ кӕнӕ гӕххӕтт исынмӕ.

Биноныг цӕстдард цӕуы центртӕн кадртӕ ӕвзарыны хъуыддаджы. Суанг психологон ӕгъдауӕй дӕр бӕрӕггонд цӕуынц кусджытӕ. Центры ис хорз фадӕттӕ инвалидтӕн ӕмӕ, сывӕллӕттимӕ чи ӕрбацӕуы, уыцы сылгоймӕгтӕн. Цалынмӕ сылгоймаг йӕ лӕггӕдты фӕдыл центры кусӕгимӕ ныхас кӕна, уӕдмӕ сывӕллонӕн ис фадат хъазӕнтӕй хъазынӕн, нывтӕ кӕнынӕн. Уый дӕр у сӕрмагонд проект, ӕмӕ йӕ ӕххӕст кӕнӕм, куыд ӕмбӕлы, афтӕ, — загъта Сӕлбиты Алан.

Ирыстон сабыргай нымӕцон технологитӕм кӕй хизы, уый стыр ӕнтыстдзинад у. Уыдон дӕттынц алы адӕймагӕн дӕр нывыл уавӕртӕ ӕмӕ бирӕ фадӕттӕ хуыздӕр цардӕн.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here