РЦИ-Аланийы 100 азы бӕрӕгбонмӕ

0
13

Зындгонд куыд у, афтӕмӕй 2024 азы бӕрӕггонд цӕудзӕн Республикӕ Цӕгат Ирыстон-Аланийы сарӕзты 100 азы бӕрӕгбон. Уыцы юбилей сбӕрӕг кӕныны фӕдыл Уӕрӕсейы Президент Владимир Путин бафыста сӕрмагонд Указ. Уыцы Указӕй арӕзт ӕрцыд федералон организацион комитет, йӕ сӕргъы — УФ-йы Хицауады Сӕрдары хӕдивӕг Виталий Мутко, афтӕмӕй.

Знон та уал Дзӕуджыхъӕуы уыдуыцы бӕрӕгбонмӕ цӕттӕгӕнӕг республикон комитеты фыццаг ӕмбырд. Республикӕйы Хицауады Сӕрдары хӕдивӕг Иринӕ Азимова сӕрдариуӕг кӕм кодта, уыцы фембӕлды архайдтой хицаудзинады ӕххӕстгӕнӕг оргӕнты бӕрнон кусджытӕ, районты разамонджытӕ ӕмӕ ӕхсӕнадон организациты минӕвӕрттӕ.

Ӕмбырды архайджытӕ ӕрдзырдтой РЦИ-Аланийы сарӕзты 100 азы юбилейы кадӕн мадзӕлтты рагагъоммӕ пъланы проектыл. Куыд загъдӕуыд, афтӕмӕй пъланы алкӕцы уагӕвӕрдыл дӕр хӕстӕгдӕр рӕстӕг нысангонд ӕрцӕудзӕн бӕрнон ведомствӕ, уыимӕ, афойнадыл хъуамӕ бӕлвырдгонд ӕрцӕуой бӕрӕгбоны мадзӕлтты хӕрдзты бӕрцытӕ дӕр.

Ныридӕгӕн куыд сбӕрӕг, афтӕмӕй 2024 азы ӕмӕ уымӕйразмӕ ӕмгъуыд Цӕгат Ирыстоны юбилейы кадӕн арӕзт цӕудзысты бирӕ алыхуызон культурон, рухстауӕн, наукон ӕмӕ спортивон мадзӕлттӕ. Уымӕй уӕлдай, бӕрӕгбонмӕ бындурон ӕгъдауӕй цалцӕггонд ӕрцӕудзысты бирӕ ахсджиаг зӕрдылдарӕн объекттӕ. Ӕппӕт уыцы хъуыддӕгтыл ӕмбырды архайджытӕ бӕстон ӕрдзырдтой.

Боны фӕткы фарстыты фӕдыл сӕ хъуыдытӕ загътой ӕмӕ фӕндӕттӕ бахастой Цӕгат Ирыстоны Ветеранты советы сӕрдары хӕдивӕг Бедойты Руслан, ӕхсӕнадон змӕлд «Иры Стыр Ныхас»-ы координацион советы сӕрдар Кучиты Руслан ӕмӕ иннӕтӕ.

Ӕмбырдӕн хатдзӕгтӕ кӕнгӕйӕ, Иринӕ Азимова куыд фӕнысан кодта, афтӕмӕй республикон организацион комитеты фӕндӕттӕ фӕстӕдӕр лӕвӕрд ӕрцӕудзысты профилон федералон министрадтӕ ӕмӕ ведомствӕтӕм. Уыдоны ӕркасты фӕстӕ бӕрӕгбоны мадзӕлтты кӕронбӕттӕн пълан сфидар кӕндзӕн федералон цӕттӕгӕнӕг комитет.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here