«Ничи ферох, ницы ферох!»

0
13

2020 азы нӕ бӕстӕйы цӕрджытӕ бӕрӕг кӕндзысты цытджын бӕрӕгбон — 75 азы размӕ советон адӕм Фыдыбӕстӕйы Стыр хӕсты фӕуӕлахиз сты фашистон Германыл. УФ-йы Президент Владимир Путины Указмӕ гӕсгӕ 2020 аз нымад у мысӕн, зӕрдылдарӕн азыл — «Ничи ферох, ницы ферох!»

Фыдыбӕстӕйы Стыр хӕст ӕппӕт советон адӕмӕн дӕр ссис иумӕйаг фыдбылыз, стыр бӕллӕх. Алы адӕмыхӕттытӕ ӕнгом ӕрбалӕууыдысты кӕрӕдзимӕ ӕмӕ иумӕ тыхджын ныхкъуырд радтой знагӕн. Цы зиан ӕрхаста уыцы сау хӕст нӕ бӕстӕйы адӕмӕн, уый абон дӕр дисы ӕфтауы йӕ ӕвирхъаудзинадӕй. Милуангай адӕмтӕ ӕбӕрӕгӕй фесӕфтысты, дӕсгай милуантӕ та сӕ цард радтой хӕсты быдыры.

Куыд хъуамӕ ферох кӕнӕм, Райгуырӕн бӕстӕ чи бахъахъхъӕдта, фидӕны фӕлтӕрты сӕрвӕлтау йӕ цард чи радта, уыдоны рухс нӕмттӕ?.. Нӕ кӕстӕртӕ: нӕ сабитӕ, нӕ цоты цот хъуамӕ зоной ӕмӕ сӕ зӕрдыл дарой, цы стыр аргъӕй ӕрцыд ӕлхӕд уыцы Уӕлахиз! Рӕзгӕ фӕлтӕр хъуамӕ сӕрыстыр уой советон адӕмӕй, уый фӕуӕлахиз, йӕ ӕгъатырдзинадӕй дунейы абарӕн кӕмӕн нӕй, ахӕм цыфыддӕр знагыл.

Республикон хӕдзар-интернат «Узӕлд»-ы знон ацыд мысӕн бон, ныссагътой 75 дыргъ бӕласы. Йӕ директор Хъӕцмӕзты Фатимӕ куыд зӕгъы, афтӕмӕй «интернаты алы рӕстӕджыты цардысты, уыцы уӕззау тохы чи архайдта, ахӕм 147 ветераны. Абон цы кадджын мадзал бацӕттӕ кодтой, уый ӕвдисӕн у, уыцы хӕстонты сгуыхтдзинӕдтӕ рох кӕй не сты, сӕ рухс нӕмттӕ сын абон дӕр кӕй мысӕм, уымӕн. Алы ветераны номыл дӕр ныссадздзыстӕм иу дыргъ бӕлас. Бӕлас у цард ӕмӕ фӕлтӕрты ‘хсӕн бастдзинады нысан. Цы Уӕлахизы дыргъдон садзӕм, уый ӕнусты дӕргъы адӕмы зӕрдыл лӕууын кӕндзӕн хъӕбатыр хӕстонты кад ӕмӕ цыт».

Кадджын мадзалы архайдтой республикӕйы Ветеранты советы, хӕрзаудӕн фондтӕ «Ӕххуысы къух» ӕмӕ «Адӕмӕн хорздзинад»-ы минӕвӕрттӕ, Слестгӕнӕг комитеты кусджытӕ, 26-ӕм скъолайы ахуырдзаутӕ, волонтертӕ, 1-ӕм ӕмӕ 3-ӕм колледжты ахуырдзаутӕ ӕмӕ ӕндӕртӕ.

Алы бӕласмӕ дӕр фидаргонд ӕрцыд, ветераны ном кӕм фыст у, ахӕм нысан. Уымӕй уӕлдай ма бӕлас сагъд ӕрцӕудзӕн ӕнӕном салдаты номыл ӕмӕ, ныртӕккӕ цардӕгас чи у, уыцы хӕсты ветеранты номыл. Уыдоны ‘хсӕн сты Гулуты Хизир, Иван Матаров, Карсанаты Владимир, Арутюн Хачикян, Василий Володин, Салхъазанты Ефим, Фидараты Мария ӕмӕ иннӕтӕ.

Номарӕн бӕлас сагъд ӕрцыд Сталинграды ӕмӕ Курскы, Прагӕ ӕмӕ Берлины тохты архайӕг, интернат «Узӕлд»-ы фыццаг директор Дзатцеты Ибрагимы номыл.

Фыццаг бӕлас ныссадзыны бар лӕвӕрд ӕрцыд Фыдыбӕстӕйы Стыр хӕсты ветеран Гулуты Хизирӕн.

Макуыуал уӕд хӕст! Ӕппӕт адӕмтӕ дӕр курынц Хуыцауӕй сабырдзинад. Уадз, ӕмӕ ацы дыргъдон йӕ хӕрзад дыргътӕй ӕхсызгондзинад хӕссӕд интернаты цӕрджытӕн ӕмӕ фидӕны фӕлтӕртӕн, сӕ зӕрдыл сын лӕууын кӕнӕд, цъӕх арвы бын кӕй фӕрцы цӕрӕм, уыдоны нӕмттӕ.

Хъойбайты Галинӕ

Къамтӕ систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here