Ӕргом ныхас — цардыуаджы фарстытыл

0
13

РЦИ-Аланийы Сӕргълӕууӕг Битарты Вячеслав фембӕлд Рахизфарсы районы Хуымӕллӕджы хъӕуы цӕрджытимӕ. Ӕмбырды ма архайдтой республикӕйы министрадтӕ ӕмӕ ведомствӕты разамонджытӕ, Рахизфарсы районы хицау Фрайты Сослан ӕмӕ бынӕттон хиуынаффӕйады администрацийы разамонӕг Беркъаты Константин.

Фыццагдӕр уал республикӕйы разамонӕг фӕсидт хъӕуы цӕрджытӕм, цӕмӕй сӕ хъуыдытӕ ӕргомӕй дзурой. Йӕ ныхасмӕ гӕсгӕ, Хуымӕллӕг у стыр хъӕу, ӕмӕ дзы иннӕ хъӕуты ӕмхуызон ахсджиаг у донӕфсисады фарста.

«Рахизфарсы районы цалдӕр хъӕуы донӕфсисады хызӕг бындуронӕй раивыны нысан хаст ӕрцыдис сӕрмагонд пъланмӕ. Уый фӕрцы ивд ӕмӕ бындурон цалцӕг ӕрцӕудзысты доны хӕтӕлтӕ горӕты ӕмӕ хъӕуты мидӕг. Зонын, заууат уавӕры ис бынӕттон амбулатори, уӕдӕ спортивон зал дӕр домы цалцӕггӕнӕн куыстытӕ. Кӕд ӕмӕ нын сӕйраг зындзинӕдтӕ бӕрӕггонд сты, уӕддӕр мӕ фӕндид, цӕмӕй уӕхӕдӕг ӕппӕт хъуыддӕгтыл ӕргом ӕрдзурат», — загъта Битарты Вячеслав.

Хъӕуы цӕрджытӕ рӕгъмӕ рахастой фӕндӕгты уавӕр ӕмӕ уӕгъд рӕстӕг ӕрвитынӕн бынӕттӕ кӕй нӕй, уыцы фарстытӕ. Нысантӕм гӕсгӕ, 2020 азы «Уӕрӕсейы Федерацийы 2016-2020 азты физикон культурӕ ӕмӕ спорты рӕзт»-ы программӕйы фӕлгӕты Хуымӕллӕджы сараздзысты бирӕфадатджын хъазӕн фӕз сывӕллӕтты спортивон дзӕбӕхгӕнӕн комплексимӕ. Зӕронд скъолайы фӕзуаты бӕрӕггонд ӕрцыдис, хӕстӕгдӕр рӕстӕг парк кӕм сараздзысты, ахӕм зӕххы хай.

Хуымӕллӕггӕгтӕн республикӕйы фӕндаггон хӕдзарады комитеты сӕрдар Солиты Тариэль куыд радзырдта, афтӕмӕй ног азы цалцӕггонд ӕрцӕудзӕн Безайы-фырты уынг. Хъӕуы администрацийы бӕстыхайы цалдӕр уаты радих кодтой ӕмӕ дзы ныртӕккӕ йӕ куыст кӕны амбулатори, йӕхи агъуыстытӕ ахӕм заууат уавӕры сты ӕмӕ санитарон эпидемиологон домӕнтӕн дзуапп нал дӕттынц. Уымӕ гӕсгӕ, республикӕйы ӕнӕниздзинад хъахъхъӕнынады министрад уыцы зӕронд агъуыст цалцӕг кӕнын нӕ банымадта растыл, рахаста уынаффӕ, цӕмӕй 2022 азы федералон центры ӕххуысӕй арӕзт ӕрцӕуа ног амбулатори.

Хъӕуккӕгтӕн фембӕлды рӕстӕг сӕ бон сӕ фарстытӕ фыстӕджы хуызы бадӕттын дӕр уыдис. РЦИ-Аланийы Сӕргълӕууӕджы ӕмӕ Хицауады администрацийы сӕм бӕстон ӕркӕсдзысты, дарддӕр сӕ арвитдзысты, сӕ алыг кӕнын цы министрадтӕ ӕмӕ ведомствӕтӕм хауы, уыдонмӕ.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here