Хид рацараздзысты

0
16

Куырттаты комы Нӕлгоймӕты Алайнаг моладзандонмӕ хӕстӕг цы хид ис, уый 2020 азы бындуронӕй рацараздзысты. Фыййагдоны сӕрты хид у рагон, фӕндзай азӕй йыл фылдӕр цӕуы, ӕмӕ иунӕг техникон домӕнӕн дӕр дзуапп нӕ дӕтты. Ахӕм уавӕртӕ арӕх расайынц фӕндаггон фыдбылызтӕ, уӕдӕ дзы фистӕгӕйцӕуджытӕн къахвӕндӕгтӕ кӕй нӕй, уый дӕр тӕссагдзинад хӕссы.

Уавӕр бынаты фенынмӕ ӕмӕ нысангонд куыстытимӕ базонгӕ уӕвыны тыххӕй Куырттаты коммӕ ацыдысты РЦИ-Аланийы Сӕргълӕууӕг Битарты Вячеслав, фӕндаггон хӕдзарады комитеты сӕрдар Солиты Тариэль ӕмӕ республикӕйы разамонӕджы ӕххуысгӕнӕг Хъуыссӕты Мӕирбег. Уым сӕ размӕ рацыди моладзандоны хистӕр, фыд Стефан.

Солиты Тариэль куыд радзырдта, афтӕмӕй хид рацаразыны проект ныридӕгӕн у цӕттӕ, арвыстой йӕ экспертизӕмӕ. Проектмӕ гӕсгӕ, хид уыдзӕн нырыккон, парахат, йӕ дӕргъ — 24 метры, йӕ уӕрх — 10 метры. Уыдзӕн дзы уӕрӕх тротуартӕ дӕр, ацы ран нымад ӕрцыд, бынатмӕ тынг бирӕ адӕм кӕй ӕмбӕлы, уый. Ӕрмӕст нӕ республикӕйы цӕрджытӕ нӕ, фӕлӕ ма иннӕ регионтӕй дӕр моладзандонмӕ дингӕнджытӕ ӕрбацӕуынц ӕмӕ сын хъуамӕ уа ӕппӕт фадӕттӕ дӕр, суанг машинӕ сӕвӕрынӕн дӕр.

Ног хид аразгӕйӕ, нымад ӕрцыд уый дӕр, ӕмӕ цӕугӕдон рӕстӕгӕй-рӕстӕгмӕ раивылы. Куыстытӕм бавналдзысты 2020 азы фыццаг ӕмбисы. Битарты Вячеслав ныхасы архайджыты ӕргом аздӕхта, ӕрбацӕуӕг адӕмӕн ӕдас ӕмӕ фадатджын уавӕртӕ саразынмӕ. «Алайнаг моладзандонмӕ» тынг бирӕ адӕм ӕфты, хъуамӕ сын ӕппӕт уавӕртӕ дӕр уа. Фыццагдӕр, хъуамӕ цӕугӕдоны былгӕрӕттӕ фидаргонд ӕрцӕуой, машинӕтӕн дӕр хъуамӕ уа ӕрлӕууӕн бынӕттӕ. Ӕппӕт фӕзуат дӕр хъуамӕ уа фӕлгонцгонд», — фӕнысан кодта Битары-фырт.

Республикӕйы Сӕргълӕууӕг ма ацы фембӕлды рӕстӕг бахӕс кодта, цӕмӕй Дзӕуджыхъӕуы Сыгъдӕг Георгийы аргъуаны уазнывтӕ скӕнынӕн ссарой специалисттӕ. Хъуыддаг баст у Аланийы саргъуыды 1100 азы бӕрӕг кӕнынимӕ.

Нӕ уацхӕссӕг

ОСТАВЬТЕ ОТВЕТ

Please enter your comment!
Please enter your name here