Ӕхсӕнадон палатӕ: ахсджиаг нысантӕ, бӕрнон архайд

0
9

Знон уыдис РЦИ-Аланийы 6-ӕм равзӕрст ӕхсӕнадон палатӕйы пленарон ӕмбырд.

Федералон закъонмӕ гӕсгӕ Уӕрӕсейы Федерацийы ӕппӕт субъектты ӕхсӕнадон палатӕты архайдмӕ хаст ӕрцыд ивддзинӕдтӕ. Ныр ацы организацийы уӕнгты ӕртыккӕгӕм хай ӕвзӕрст цӕуы регионы Сӕргълӕууӕджы указмӕ гӕсгӕ. Иннӕ — ӕртыккӕгӕм хай ӕвзары закъонӕвӕрӕг оргӕн, регионалон ӕмӕ муниципалитетты ‘хсӕн ӕхсӕнадон иугондтӕй, дарддӕр палатӕйы номхыгъд ӕххӕстгонд цӕуы ӕнӕкоммерцион организациты кандидаттӕй.

Цӕгат Ирыстоны ӕхсӕнадон палатӕйы уӕнгтӕ ӕдӕппӕт сты 36. Уыдонӕй РЦИ-Аланийы Сӕргълӕууӕджы указмӕ гӕсгӕ нысангонд ӕрцыд 12 кандидаты, 12 ӕвзӕрст ӕрцыдысты Парламенты. Иннӕтӕ та — ӕхсӕнадон палатӕты, сусӕгӕй схъӕлӕс кӕнгӕйӕ.

Афтӕмӕй арӕзт ӕрцыд РЦИ-Аланийы ӕхсӕнадон палатӕйы ног сконд.

Фыццаг пленарон ӕмбырды организацийы уӕнгтӕ равзӕрстой ног сӕрдар ӕмӕ йӕ хӕдивджыты. Ӕхсӕнадон палатӕйы сӕрдар ногӕй ссис Нинӕ Чиплакова, Бирӕгъты Юри ӕмӕ Увыдзаты Батрадз та — йӕ хӕдивджытӕ.

Ӕмбырды архайдта РЦИ-Аланийы Сӕргълӕууӕг Битарты Вячеслав. Уый арфӕ ракодта, 5-ӕм равзӕрсты чи куыста ӕмӕ ног 6-ӕм равзӕрсты уӕнг чи сси, уыцы ӕхсӕнадон кусджытӕн.

— Фӕндзӕм равзӕрсты уӕнгты архайды ӕмӕ активон куысты бирӕ хорз хъуыддӕгтӕ конд ӕрцыд граждайнаг ӕхсӕнады. Хъӕуы уӕ уӕ куыст адӕмимӕ аразын. Хуымӕтӕг адӕмӕй уын уӕ куысты бӕрӕггӕнӕнтӕ бирӕтӕ нӕ зонынц ӕмӕ уый хорзӕрдӕм нӕ ахады ӕхсӕнадыл. Уый уымӕй бӕрӕг у, ӕмӕ ӕз арӕх вӕййын сходты нӕ республикӕйы алы районты, хъӕуты, ӕмӕ мӕм бирӕ адӕм сӕ хъӕстытимӕ ӕрбацӕуынц.

Цӕмӕн хъӕуынц республикӕйы хицауиуӕггӕнӕг оргӕнтӕ? Цӕмӕй адӕмы ахсджиаг фарстытыл кусой. Куы сӕм байхъусай, уӕд сӕ удӕй арт цӕгъдынц, афтӕмӕй адӕмы лыггӕнинаг фарстытӕ къаддӕр нӕ кӕнынц. Ӕз нӕ республикӕйы ӕппӕт структурӕтӕй дӕр домдзынӕн адӕмы тыхстдзинад нывыл кӕныны хъуыддӕгтӕ ӕмӕ бӕрӕггӕнӕнтӕ. Ӕмӕ нын цы фӕрӕзтӕ ӕрвыст цӕуы федералон бюджетӕй, уыдон та хардзгонд цӕудзысты адӕмы лыггӕнинаг фарстытыл. Ацы хъуыддаджы сымах архайд ӕмӕ ӕххуыс, ӕнӕмӕнг, ахсджиаг сты.

Нӕ республикӕйы Парламент цы закъонтӕ ӕвӕры, уыдонӕн сымах хъуамӕ ӕхсӕнадон экспертизӕ кӕнат. Иттӕг хорз фадат уын ис Хицауады куыстмӕ дӕр уӕ цӕст дарынӕн, ӕрмӕстдӕр уӕ фӕндгӕ кӕнӕд.

Зӕгъын ма мӕ фӕнды уый, ӕмӕ уе ‘ргом фылдӕр куы аздахиккат нӕ республикӕйы ӕнӕниздзинад хъахъхъӕнынады ӕппӕт фарстытӕм дӕр. Республикӕйы бюджеты фылдӕр хай ӕрвыст цӕуы ОФМС-тӕм. Уӕддӕр медицинӕйы нӕ фаг кӕны хостӕ, ифтонггӕрзтӕ. Бирӕ хардзгонд цӕуы рынчындӕтты ног арӕзтадыл ӕмӕ бындурон цалцӕгыл, уӕддӕр медицинон лӕггӕдтӕ хӕрзхъӕд рахонӕн нӕй. Цӕмӕн у афтӕ? ӕмӕ ӕрмӕст ӕнӕниздзинад хъахъхъӕнынады уавӕр нӕ, иннӕ социалон къабӕзты дӕр ис ӕнӕххӕстгонд хъуыддӕгтӕ. Уыцы фарстытыл дзурын хъӕуы. Кусын кӕй нӕ фӕнды, уыдоны куыстыл бафтауын, кӕнӕ та сӕ бынтондӕр аиуварс кӕнын. Ис районы ӕхсӕнадон советтӕ. Уыдонимӕ Парламентимӕ ӕмӕ Хицауадимӕ саразут ӕмгуыстады проекттӕ, цӕстдарыны мадзӕлттӕ ӕмӕ уӕд уӕ куысты дӕр уыдзӕн бӕрӕг бӕлвырд хатдзӕгтӕ. Ӕрмӕст форумтӕ ӕмӕ конференцитӕй ӕхсӕнадон куыст кӕнӕн нӕй, адӕммӕ хъӕуы цӕуын ӕмӕ семӕ бастдзинад аразын. Биноныг ӕркӕсинаг фарст у ӕвзӕрстыты хъуыддаг дӕр. Рӕстаг ӕвзӕрстытыл архайут. Уый куы нӕ уа, уӕд нӕ иумӕйаг куыст хӕрз дзӕгъӕлы уыдзӕн, — загъта Битарты Вячеслав.

Ӕмбырды кӕрон РЦИ-Аланийы ӕхсӕнадон палатӕйы сӕрдар Нинӕ Чиплакова бӕлвырд радзырдта, организацийы фидӕны ног нысанты ӕмӕ палатӕйы уӕнгты куысты тыххӕй.

Саутӕты Тамилӕ

Къамтӕ систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here