Сосланы номарӕн турнир ацыди фыццаг хатт

0
57

Ирон адӕмы уарзон фырт, Олимпаг хъӕзтыты Ирыстоны фыццаг уӕлахиздзау, номдзыд спортсмен ӕмӕ фӕзминаг уӕздан лӕг Андиаты Сосланы номыл уӕгъдибар хъӕбысхӕстӕй ӕппӕтуӕрӕсеон ерыстӕ цыдысты цыппор азы дӕргъы.

Ӕппӕты фыццаг Сосланы номыл ерыстӕ арӕзт ӕрцыдысты 1976 азы, фыццаг хатт Олимпаг хъӕзтыты уӕлахиздзау куы ссис, уӕд уый кадӕн. Цыбыр рӕстӕгмӕ ацы турнир ссис ӕгас Советон Цӕдисы уарзондӕр ерыстӕй иу ӕмӕ нӕ бӕстӕйы алы кӕрӕттӕй ӕрвылаз Дзӕуджыхъӕумӕ тырныдтой сӕдӕгай богӕлттӕ.

Ерысты рӕстӕг-иу Сослан йӕхӕдӕг ӕхсызгонӕй касти фӕсивӕды архайдмӕ. Кӕдфӕнды дӕр-иу арфӕ ракодта ерысты архайджытӕн ӕмӕ спортуарзджытӕн. Ӕппӕты уӕззаудӕр уӕзы фӕуӕлахизуӕвӕг ӕмӕ призон бынӕттӕ бацахсӕг богӕлттӕн та-иу хӕрзиуджытӕ ӕмӕ лӕвӕрттӕ радта йӕхӕдӕг. Цал ӕмӕ цал фӕлтӕры архайдтой Андиаты таурӕгъон богалы номыл ӕрвылазон турниры! Уыдонӕй алчидӕр абон Сосланы ӕрымысы, куыд уарзон хиуоны, афтӕ.

Хъыгагӕн, афӕдзы размӕ уӕззау низы азарӕй Сослан ахицӕн цардӕй, фӕлӕ адӕмы зӕрдӕты цы арф ӕмӕ ирд фӕд ныууагъта, уый цӕрдзӕн бирӕ азты.

Ууыл дзурӕг уыдысты, 28-29 ноябры йӕ номарӕн турнирмӕ Уӕрӕсе ӕмӕ фӕсарӕнтӕй чи ӕрбацыди Ирыстонмӕ, уыцы уазджытӕ дӕр.

Цӕгат Кавказы республикӕтӕй уӕлдай ма ерысты архайдтой Мӕскуы, Бетъырбух, Кемерово, Иркутск, Хъырым, Пермь, Якути, Ханты-Мансийск, Буряти, Стъарапол, Краснодар, Казахстан, Хъырым, Туркменистан, Абхаз, Адыгей, Сомих ӕмӕ Грецийы богӕлттӕ. Хъуылаты Бадзийы номыл спортивон галуаны цы ӕртӕ гауызы ӕвӕрд уыд, уым дыууӕ боны дӕргъы сӕ хъарутӕ ӕвдыстой 430 богалы.

Ерыстӕ гом кӕныны мадзалы архайдтой РЦИ-Аланийы Парламенты Сӕрдар Алексей Мачнев, нӕ республикӕйы Хицауады Сӕрдар Тускъаты Таймураз, Олимпаг хъӕзтыты 3 хатты уӕлахиздзау, Уӕрӕсейы Паддзахадон Думӕйы депутат Таймазты Артур, Уӕрӕсейы сгуыхт тренер, ерысты сӕйраг тӕрхонгӕнӕг Багаты Вячеслав ӕмӕ Андиаты Сосланы фырт Георги.

Уыдон зӕрдиаг арфӕтӕ ракодтой Сосланы номарӕн турнирмӕ алы рӕттӕй ӕрбацӕуӕг уазджытӕн ӕмӕ спортсментӕн. Тускъаты Таймураз ма йӕ арфӕйы ныхасмӕ бафтыдта: «Абон мах Сосланы номыл турнир, хъыгагӕн, фыццаг хатт гом кӕнӕм ӕнӕ йӕхицӕй. Амӕй фӕстӕмӕ ерыстӕ арӕзт цӕудзысты йӕ ном арынӕн, ӕмӕ нӕ уырны, ӕрвылаз дӕр турнир Сосланы бӕрзонд кады аккаг кӕй уыдзӕн, уый».

Ерыстӕ цы дӕс уӕзы цыдысты, уыдонӕй алкӕцыйы дӕр уыди зындгонд богӕлттӕ. Уымӕ гӕсгӕ гауызыл цыдысты тынг цымыдисаг тохтӕ. Фыццаг бон ерыс кодтой: 57, 65, 74, 86 ӕмӕ 97 кг онг уӕзты.

57 кг онг уӕзы ирыстойнаг богӕлттӕй кӕронбӕттӕнмӕ рацӕуын никӕмӕн бантыст. Ам фыццаг ӕмӕ дыккаг бынӕттӕ бацахстой Шамиль Сулейманов (Цӕцӕн) ӕмӕ Магомедрасул Магомедов (Дагестан). Ирыстойнаг богал Сабанты Алыксандр бацахста 3-аг бынат.

65 кг онг уӕзы ӕнтыстджынӕй рахӕцыдысты Дагестан ӕмӕ Пермы богӕлттӕ. Фыццаг бынатмӕ рацыд Шамиль Омаров, дыккаг ссис Хизри Джамалудинов (дыууӕйӕ дӕр Дагестанӕй), ӕртыккаг бынӕттӕ та бацахстой Виталий Есин (Пермь) ӕмӕ Арби Абакаров (Дагестан).

Ирон богӕлттӕй фыццаг фесгуыхт Хӕдзарӕгаты Азӕмӕт. Уый 74 кг онг уӕзы цыппар ныхмӕлӕууӕгӕй куы рамбылдта, уӕд кӕронбӕттӕны фембӕлд дагестайнаг богал Давид Суюнчхановимӕ. Сӕ тох рауад тынг хъазуатон. Фембӕлды фыццаг ӕмбис ахицӕн 1:0 хыгъдӕй Суюнчхановы пайдайӕн. Дыккаг ӕмбисы райдайӕны та уымӕн бантыст ноджыдӕр ма иу балл рамбулын ӕмӕ хыгъд ссис 2:0. Уыцы уавӕры Хӕдзарӕгаты Азӕмӕтӕн йӕ ныфс нӕ асаст ӕмӕ размӕ атындзыдта. Йӕ ныхмӕлӕууӕджы бынмӕ ӕрӕппӕрста ӕмӕ ма йӕ иу хатт куы атылдта, уӕд хыгъд ссис 4:2 Азӕмӕты пайдайӕн. Фембӕлд ахицӕн уыцы хыгъдимӕ ӕмӕ Уӕрӕсейы сгуыхт тренер ӕрчъегкаты Тотрадзы хъомылгӕнинаг бацахста фыццаг бынат. Тыхджын ныхмӕлӕууӕг уыди кӕронбӕттӕны Уалыты Радикӕн дӕр. 86 кг онг уӕзы Радик фембӕлд дагестайнаг богал Магомед Набиевимӕ. Уый тынг къӕрцхъусӕй фӕлӕууыд Радичы ныхмӕ, ӕмӕ сӕ фембӕлды фыццаг ӕмбис ахицӕн 1:0 хыгъдӕй Уалыйы-фырты пайдайӕн. Фембӕлды дыккаг ӕмбисы ма Радикӕн бантыст хыгъд 3:0 скӕнын ӕмӕ бацахста фыццаг бынат.

Фыццаг бон ирыстойнаг богӕлттӕ ӕппӕты ӕнтыстджындӕр хӕст ракодтой 97 кг онг уӕзы. Кӕронбӕттӕны 1-аг бынатыл ерыс кодтой Дудайты Сослӕнбег (йӕ тренер Санаты Георги) ӕмӕ Зассеты Арсӕмӕг (йӕ тренер Хъоцыты Тамерлан). Фембӕлды фыццаг размӕ рацыд Дудайты Сослӕнбег. Уый ӕмбылдта 2:0 хыгъдӕй, фӕлӕ уый фӕстӕ Зассейы-фырт йӕ архайд фӕхъазуатондӕр кодта ӕмӕ фӕуӕлахиз 4:2 хыгъдӕй. Ацы уӕзы ма нӕ иннӕ богал Гӕззаты Аслан бацахста 3-аг бынат. Иннӕ 3-аг бынатмӕ та рацыд адыгейаг богал Азрет Шогенов.

Дыккаг бон ерыстӕ цыдысты 61, 70, 79, 92 ӕмӕ 125 кг онг уӕзты.

61 кг онг уӕзы кӕронбӕттӕнмӕ рацыдысты ирыстойнаг богӕлттӕ ӕбиты Алан ӕмӕ Тауытты Чермен. Ацы фембӕлды ӕнӕдызӕрдыгӕй фӕуӕлахиз Дудайты Эльбрус ӕмӕ ӕрчъегкаты Тотрадзы хъомылгӕнинаг Тауытты Чермен. 3-аг бынӕттӕй иу рамбылдта грекъаг богал Георгий Пилидис. Уымӕн йӕ тренер у не ‘мзӕххон, Олимпаг хъӕзтыты 3-аг бынат бацахсӕг Хъарданты Амиран. 3-аг бынатмӕ ма рацыди ирыстойнаг богал Казбек Сельмурзаев дӕр.

70 кг онг уӕзы ирыстойнаг богӕлттӕй хӕрзиуӕг райсын никӕмӕн бантыст. Ам 1-аг бынат бацахста Хъӕрӕсе-Черкесты республикӕйы минӕвар Амзор Ионов, 2-аг ссис Магомед Сурхоев (Мӕскуы), 3-аг бынӕттӕм та рацыдысты Тимур Николаев (Саха-Якути) ӕмӕ Саид-Ибрагим Эльбердов (Цӕцӕн).

Нӕ уазджытӕ фыццаг дыууӕ бынаты бацахстой 79 кг онг уӕзы дӕр. Цӕцӕйнаг богал Юсуп-Хаджи Айдаев тынг сӕрӕн хӕст ракодта йӕ цыппар ныхмӕлӕууӕгимӕ дӕр ӕмӕ ссис турниры уӕлахиздзау. Айдаев кӕронбӕттӕны йе уӕнтыл сӕвӕрдта Атам Шихмурадовы (Дагестан) ӕмӕ уый бацахста 2-аг бынат.  3-аг бынӕттӕм ацы уӕзы рацыдысты Ренат Апшев (Хъырым) ӕмӕ Тыджыты Знауыр.

Цымыдисаг рауадысты ерыстӕ 92 кг онг уӕзы дӕр. Ацы уӕзы кӕронбӕттӕнмӕ рацыдысты Нартыхъты Родион ӕмӕ Муслим Магомадов (Дагестан). Сӕ фембӕлд рауад тынг хъазуатон ӕмӕ цымыдисаг. Фыццаг размӕ рацыд Муслим Магомадов. Уый иттӕг хорз спайда кодта йӕ фадатӕй ӕмӕ фӕд-фӕдыл рамбылдта 5 баллы. Фембӕлды фыццаг ӕмбис ахицӕн 5-0 хыгъдӕй. Дыккаг ӕмбисы Нартыхъты Родион йӕ архайд зынгӕ фӕтыхджындӕр кодта ӕмӕ ма фембӕлды кӕронмӕ 30 секунды куы баззад, уӕд цыди разӕй 7:6 хыгъдӕй. Ахӕм уавӕры Родион къӕрцхъусӕй нал фӕлӕууыд, ӕмӕ йӕ ныхмӕлӕууӕг йӕ фӕстаг тыхтӕй рамбылдта 2 баллы. Афтӕмӕй хыгъд ссис 8:7 Магомадовы пайдайӕн ӕмӕ уый бацахста фыццаг бынат. Нӕ иннӕ богал Цхуырбаты Артем ацы уӕзы бацахста 3-аг бынат. 3-аг бынатмӕ ма рацыд дагестайнаг богал Имран Хамидов дӕр.

Уӕлдай цымыдисагдӕр рауадысты 125 кг онг уӕзы богӕлтты ерыстӕ. Ацы уӕзы, раздӕр уӕззау кӕй хуыдтой, уым йӕ рӕстӕджы стъалыйау ӕрттывта Андиаты Сослан. Уӕззау уӕзы чи фӕуӕлахиз уа, уымӕ хӕрзиуджытӕй уӕлдай ӕнхъӕлмӕ каст сӕрмагонд лӕвар, хӕдтулгӕ «Лада». Уӕззау уӕзы ерысы цы ссӕдз богалы бацыдысты, уыдонӕй кӕронбӕттӕнмӕ рацыдысты ирыстойнаг богӕлттӕ Хуыбаты Хасан ӕмӕ Кодзырты Сергей.

Зӕгъын хъӕуы уый, ӕмӕ цӕмӕй кӕронбӕттӕнмӕ рацӕуой, уый тыххӕй Хуыбаты Хасаны цыппар ныхмӕлӕууӕджы ‘хсӕн уыдысты Теблойты Ацӕмӕз ӕмӕ бурятаг тыхджын богал Балдан Цыжипов, Кодзырты Сергейы ныхмӕлӕуджытимӕ та уыдысты Уӕрӕсейы чемпион Хуыгаты Алан ӕмӕ Къозонты Зауыр. Хасан ӕмӕ Сергей ахӕм ныхмӕлӕуджытӕй кӕй рамбылдтой, уый дзурӕг у, сӕ гӕнӕнтӕ гыццыл кӕй не сты, ууыл. Кӕронбӕттӕны Хуыбаты Хасанӕн бантыст Кодзыры-фыртӕй 4 баллы рамбулын ӕмӕ 4-0 хыгъдӕй ахицӕн сӕ фембӕлд. Уӕззау уӕзы 3-аг бынӕттӕ дӕр бацахстой ирон богӕлттӕ Хуыгаты Алан ӕмӕ Теблойты Ацӕмӕз.

Уӕззау уӕзы уӕлахиздзау ӕмӕ призон бынӕттӕ бацахсджытӕн хӕрзиуджытӕ радта Андиаты Георги. Фыццаг бынат бацахсӕг Хуыбаты Хасанӕн ма Георги саккаг кодта хӕдтулгӕ «Лада»-йы дӕгъӕлтӕ дӕр.

Ерыстӕ куыд ацыдысты, уый тыххӕй Георги загъта: «Кӕй зӕгъын ӕй хъӕуы, зӕрдӕ фӕагайынц ӕнкъард хъуыдытӕ, ацы турнир фыццаг хатт ӕнӕ мӕ фыдӕй кӕй цӕуы, уый уынгӕйӕ, фӕлӕ иннӕмӕй та ӕхсызгон у, уый бӕрц адӕм нӕ фарсмӕ кӕй сты ӕмӕ йын йӕ ном ахӕм стыр ерыстӕй кӕй арынц, уый. Ӕз стыр бузныг зӕгъын нӕ бинонты номӕй нӕ республикӕйы разамонджытӕ ӕмӕ Хицауадӕн, Физкультурӕ ӕмӕ спорты министрадӕн, Хъӕбысхӕсты федерацийӕн, Мамиаты Черменӕн. Уый ныр цалдӕр азы йӕхи хардзӕй скӕны сӕйраг лӕвар уӕззау уӕзы фӕуӕлахизуӕвӕгӕн. Кӕй зӕгъын ӕй хъӕуы, мах арфӕ кӕнӕм спортсментӕ ӕмӕ сӕ тренертӕн, тӕрхонгӕнджытӕн, дохтыртӕн, мидхъуыддӕгты ӕмӕ пъӕлицӕйы кусджытӕн, спортивон галуан ацы ерыстӕм афтӕ хорз чи бацӕттӕ кодта, уыдонӕн!»

Уӕззау уӕзы фӕуӕлахизуӕвӕг Хуыбаты Хасан: «Сослан махӕн, ӕппӕт кӕстӕртӕн дӕр уыди фӕзминаг, куыд спорты хъайтар ӕмӕ цӕстуарзон уӕздан хистӕр. Мӕхицӕн стыр кадыл нымайын, абон мын йӕ номарӕн турниры сӕйраг хӕрзиуӕг кӕй радтой, уый. Мӕ абоны уӕлахизы тыххӕй ӕз бузныг зӕгъын мӕ тренертӕ ӕрчъегкаты Тотрадз ӕмӕ Багаты Вячеславӕн. Уыдон ӕмӕ мын Хуыцауы ‘ххуысӕй бантыст мӕ цӕфты фӕстӕ ногӕй гауызмӕ рацӕуын ӕмӕ ныр мӕ размӕ ӕвӕрдзынӕн ног хӕстӕ. Фӕнды мӕ, къуырийы фӕстӕ ацы ран цы дунеон стыр турнир «Алантӕ» уыдзӕн, уым мӕ хъару бавзарын».

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here