Грепплертӕ фесгуыхтысты дунеон чемпионаты

0
33

Азербайджаны сӕйраг горӕт Бакуйы грепплинджы дыууӕ хуызӕй цыдысты дунеон чемпионаты ерыстӕ ӕрыгӕтты ӕмӕ хистӕр кары спортсменты ‘хсӕн.

Ӕрыгӕтты ‘хсӕн ерысты сӕрӕн тох кодта Тедеты Тимур. 62 кг онг уӕзы рамбылдта йӕ цыппар ныхмӕлӕууӕгӕй, фӕлӕ кӕронбӕттӕны хӕрз чысыл фӕкъуылымпы ӕмӕ бацахста 2-аг бынат. Тимуры ерыстӕм бацӕттӕ кодта тренер Бирӕгъты Алан.

Ногӕй та фесгуыхт 35-45-аздзыд спортсменты ‘хсӕн ерысы нӕ зындгонд богал Бозырты Георги. Йӕ карӕнтимӕ тох кодта дыууӕ хуызы ерысты. Фыццаг фӕуӕлахиз «грепплинг»-ӕй тохты ӕмӕ хорзӕхджын ссис сыгъзӕрин майданӕй. Уый фӕстӕ та ерысы бацыд «грепплинг-ги»-йӕ ӕмӕ та ам дӕр йӕ ныхмӕ фӕлӕууын ничи бафӕрӕзта. Йӕ ныхмӕлӕуджытӕй дзы чидӕртӕ уыдысты 5-6 азы кӕстӕртӕ, фӕлӕ йӕ цырд ӕмӕ сӕрӕн архайдӕн уыдон дӕр нӕ бафӕрӕзтой дзуапп раттын, ӕмӕ грепплинджы дыууӕ хуызӕй дӕр ссис дунейы чемпион.

Георгийы ацы ӕнтыстытӕн сӕ бындур у, спорт ӕгӕрон уарзтӕй кӕй уарзы ӕмӕ йӕхиуыл ӕнӕрынцойӕ кӕй кусы, уый.

Георги ма у курдиатджын нывгӕнӕг дӕр. «Чысылӕй фӕстӕмӕ мӕ зӕрдӕйы стыр бынат бацахстой аивад ӕмӕ спорт. Уарзтон ныв кӕнын ӕмӕ спортивон ерысты архайын. Беслӕны ахуыр кодтон нывкӕнынады скъолайы, уый фӕстӕ Дзӕуджыхъӕуы 2-ӕм педагогон училищӕйы нывгӕнӕг ӕмӕ хахнывы ахуыргӕнӕджы дӕсныйадыл. 2002 азы та каст фӕдӕн ЦИПУ-йы аивӕдты факультеты нывкӕнынады хайад. Уымӕй уӕлдай ма 1994 азы сахуыр кодтон ӕмӕ райстон ӕндадзӕджы дӕсныйад дӕр. Уыцы азты мын фаг рӕстӕг нӕ уыд, спортӕй, цас мӕ фӕндыд, уыйас архайынӕн. Фӕлӕ адӕймагӕн йӕ туджы цы уа, уый йӕхицӕн фӕндаг агуры. Афтӕ мӕ 34-аздзыдӕй тынгӕй-тынгдӕр йӕхимӕ ӕлвасын райдыдта спортмӕ уарзондзинад. Уыцы азты райдыдтон цӕуын тренировкӕтӕм ӕрыдойнаг тренер Илаты Маратмӕ ӕмӕ уый фӕрцы мӕхи ерысты дӕр ӕвдисын райдыдтон. Цӕмӕй дӕхиуыл хӕстон тохты спорты хуызтӕй бындурон куыст кӕнай, уымӕн нӕм ӕмбӕлгӕ уавӕртӕ кӕд нӕ вӕййы, уӕддӕр нӕ къухы цыдӕртӕ бафты».

Георги «цыдӕртӕ» кӕй хоны, уыдон сты, 2016-2019 азты цыппар дунеон чемпионаты сыгъзӕрин майдантӕ. Фӕстаг азты Георгиимӕ кусы тренер Бирӕгъты Алан ӕмӕ уый зӕгъы: «Георги у фӕзминаг кӕстӕртӕн. Йе ‘гъдау, йӕ цӕстуарзондзинад, йӕ куыстуарзондзинад дӕнцӕгӕн хӕссинаг сты. Уӕдӕ йӕ фӕразондзинад ӕмӕ йӕ размӕвӕрд хӕсмӕ тырнындзинад дӕр кӕуылты сты! Георги спорты ӕмӕ аивады дӕр у, ӕцӕг профессионал кӕмӕй фӕзӕгъынц, ахӕм адӕймаг. Бирӕтӕ йӕ зонгӕ дӕр нӕ кӕнынц, ацы фырнымд адӕймаг скъола ӕмӕ уый фӕстӕ цы ахуыргӕнӕндӕтты ахуыр кодта, уыдон иттӕг хорз бӕрӕггӕнӕнтимӕ каст кӕй фӕци, уый. Ӕдӕппӕт дунеон чемпионатты Георги фӕуӕлахиз 8 хатты. Уый бирӕ цӕуылдӕртыл дзурӕг у».

Георгийы куы бафарстон, цас рӕстӕг ма архайдзӕн спортивон ерысты, зӕгъгӕ, уӕд мын загъта: «Цалынмӕ мӕ карӕнтӕн ерыстӕ аразӕг уа, уӕдмӕ тырндзынӕн мӕхи цӕттӕйӕ дарынмӕ».

Гъе, ахӕм зондыл хӕст у дунейы аст хатты уӕлахиздзау Бозырты Георги, ӕмӕ йын нӕ зӕрдӕ зӕгъы ноджы стырдӕр ӕнтыстдзинӕдтӕ спорты ӕмӕ аивады!

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here