Ӕххуыс — чысыл ӕмӕ рӕстӕмбис амалхъомадӕн

0
16

Зындгонд куыд у, афтӕмӕй Цӕгат Ирыстоны байгом, сӕрмагондӕй чысыл ӕмӕ рӕстӕмбис амалхъомадӕн ӕххуыс чи кӕны, ахӕм банк — «МСП Банк». Уый бӕлвырдӕй кӕмӕн ӕмӕ цавӕр ӕххуыс кӕны, стӕй цавӕр нысантӕн, уый тыххӕй нӕ уацхӕссӕгӕн радзырдта банчы регионалон менеджер ХЪАЗИТЫ Темур:

— Акционерон ӕхсӕнад «Чысыл ӕмӕ рӕстӕмбис амалхъомадӕн ӕххуысы Уӕрӕсейы Банк» (МСП Банк) у чысыл ӕмӕ рӕстӕмбис амалхъомадӕн паддзахадон ӕххуысы ахсджиаг фӕрӕз. Уый арӕзт ӕрцыд 1999 азы, 2016 азӕй фӕстӕмӕ та йӕ акциты 100 процентӕн сӕ хицау ссис акционерон ӕхсӕнад «Чысыл ӕмӕ рӕстӕмбис амалхъомады рӕзты федералон корпораци (корпораци МСП).

«МСП Банк» цы финансон ӕххуыстӕ кӕны, уыдонӕн сӕ сӕйраг у, Уӕрӕсейы Федерацийы Экономикон рӕзты министрад цы сӕрмагонд программӕтыл бакуыста, уыдонмӕ гӕсгӕ, социалон ӕгъдауӕй ахсджиагдӕр проектты архайӕг чысыл ӕмӕ рӕстӕмбис амалхъомады ахӕм кусджытӕн кредиттӕ дӕттын. Ахӕм амалхъомтӕн, — уыдон та сты, ӕппӕты фыццаг, Цӕгат Кавказы Федералон зылды хъуыддӕгтӕ чи аразы, чысыл ӕмӕ рӕстӕмбис амалхъомады уыцы архайджытӕ, — банк цы ӕфстау ӕхцатӕ дӕтты, уыдонӕй исы хӕрзчысыл процент — афӕдзмӕ 7,75 проценты. Ахӕм зӕрдӕмӕдзӕугӕ процентимӕ банк кредиттӕ кӕмӕн дӕтты, уыдонимӕ сты спортивон инфраструктурӕйы объекттӕ аразыны ӕмӕ сӕ фылдӕр кӕныны къабазы проекттӕ ӕххӕстгӕнӕг амалхъомтӕ, хъӕууонхӕдзарадон куыстады амалхъомтӕн ӕмӕ фӕлхасадон кооперативтӕн кӕнӕ та хъӕууонхӕдзарадон-фӕлхасадон кооперативты уӕнгтӕн — зӕхкусӕг (фермерон) хӕдзарӕдтӕ, йе ‘нӕниздзинады уавӕртӕм гӕсгӕ йӕ авналӕнтӕ цыбыр кӕмӕн сты, ахӕм адӕймӕгтӕн куысты бынӕттӕ чи аразы, уыцы амалхъомтӕ, туризмы къабазы архайӕг амалхъомтӕ, амалхъом куыстгӕнӕг сылгоймӕгтӕ, бинонты амалхъомады архайджытӕ, фӕсивӕд, стартапы программӕты архайджытӕ, йӕ уагъд продукци кӕнӕ товар фӕсарӕнтӕм чи ӕрвиты, ахӕм компани-экспортертӕ. 233-ӕм ӕмӕ 44-ӕм федералон закъонты бындурыл, стырдӕр заказгӕнджытимӕ ӕлхӕнинӕгты фӕдыл фӕстаг дыууӕ азы дӕргъы контракт чи бафыста, ахӕм амалхъомтӕ, стӕй ӕндӕртӕ.

Программӕйы фӕлгӕты ӕфстӕуттӕ лӕвӕрд цӕуынц: царды ахсджиагдӕр къабазы кӕнӕ къабӕзты инвестицион проекттӕ ӕххӕст кӕнынӕн, ӕппынкъаддӕр 0,5 милуан сомы, ӕппынфылдӕр — 2 миллиард сомы дӕс азы ӕмгъуыдмӕ. Ӕфстау райсыны фӕдыл амалхъом куырдиат цы бон бадӕтта, уыцы бонӕй фӕстӕмӕ ранымайгӕйӕ йӕ амалхъомадон архайды ӕмгъуыд, ӕппынкъаддӕр, хъуамӕ уа ӕхсӕз мӕйы. Ис ма дзы ахӕм фӕзилӕн — царды ахсджиагдӕр къабазы кӕнӕ къабӕзты проект ӕххӕст кӕнынӕн уӕлӕмхасӕн финансон ӕххуысӕн — ӕппынкъаддӕр — 0,5 милуан сомы, ӕппынфылдӕр — 500 милуан сомы ӕртӕ азы ӕмгъуыдмӕ. Уӕлӕмхасӕн финансон ӕххуыс райсыны фӕдыл амалхъом куырдиат цы бон бадӕтта, уыцы бонӕй фӕстӕмӕ ранымайгӕйӕ йӕ амалхъомадон архайды ӕмгъуыд, ӕппынкъаддӕр, хъуамӕ уа ӕхсӕз мӕйы.

Кредит райсыны фӕнд чи скӕна, уымӕ, банчы домӕнтӕм гӕсгӕ, хъуамӕ уа чысыл кӕнӕ рӕстӕмбис амалхъомады субъекты статус, амалхъом хъуамӕ архайа иу кӕнӕ цалдӕр ахсджиагдӕр къабӕзты, закъонмӕ гӕсгӕ чи не ‘мбӕлы, ахӕм архайд хъуамӕ ма кӕна (уыцы ӕнӕзакъон архайд амынд ис «Уӕрӕсейы Федерацийы чысыл ӕмӕ рӕстӕмбис амалхъомад райрӕзын кӕныны тыххӕй» 14 федералон закъоны 3 ӕмӕ 4 хӕйтты), УФ-йы хъалонтӕ фидӕджы статус, йӕ куыстад кӕй нӕ фӕкъуыввитт, ууыл дзурӕг гӕххӕтт, ӕнаипп кредитон истори, УФ-йы бюджетон системӕйӕ, стӕй йӕ кусджытӕн мызд фидынӕй хӕстӕ хъуамӕ ма дара, чысыл ӕмӕ рӕстӕмбис амалхъомады хыгъды хъуамӕ уа регистрацигонд.

Уымӕй уӕлдай, «МСП банк» ӕххӕст кӕны, «Чысыл ӕфстау», зӕгъгӕ, ахӕм финансон ӕххуыс. Банк ӕй дӕтты хицӕн амалхъомтӕн сӕ хъуыддаг райрӕзын кӕныны нысанимӕ. Хицӕн амалхъомтӕн ӕфстауы бӕрц у 0,5 милуан сомӕй 5 милуан сомы онг, юридикон иуӕгтӕн та — 0,5 милуан сомӕй 10 милуан сомы онг. Ӕфстауы бадзырды ӕмгъуыд у 36 мӕйы.

«МСП Банчы» финансон лӕггӕдтӕн сӕ ахсджиаг фӕзилӕн у, 223-ӕм ӕмӕ 44-ӕм федералон закъонты бындурыл чысыл ӕмӕ рӕстӕмбис амалхъомады субъекттӕн финансон зӕрдӕдарӕнтӕ ӕххӕст кӕй кӕны, уый. Уыцы зӕрдӕдарӕны бӕрц у 1 миллиард сомы.

Цӕмӕй банчы лӕггӕдтӕй амалхъом адӕймаг спайда кӕна, уый тыххӕй йӕхи хъуамӕ регистраци скӕна банчы информацион хызӕг «АИС НГС»-ы.

Ӕппӕт хабӕрттӕ бӕлвырддӕр базонӕн ис «МСП Банчы» консультацион центры. Банкӕн йӕ адрис у: г. Дзӕуджыхъӕу, Шмулевичы уынг, 86 хӕдзар; телефон: 8 (903) 258-59-12.

ОСТАВЬТЕ ОТВЕТ

Please enter your comment!
Please enter your name here