Йӕ алы уацмысы дӕр —йӕ зӕрдиаг бавнӕлд

0
40

Адӕймаджы зӕрдӕйы цы хорзӕх равзӕры, уый цӕуы йӕ уды арфӕй ӕмӕ зонды рухсӕй. УФ-йы сгуыхт ӕмӕ Хуссар Ирыстоны адӕмон нывгӕнӕг Дзукъаты Никъалайӕн хъысмӕтӕй стыр лӕварӕн Дунесфӕлдисӕг саккаг кодта нывгӕнӕджы курдиат.

Йӕ аивадон ӕрмдзӕф рабӕрӕг йе ‘взонджы бонтӕй фӕстӕмӕ. Скульптурон композицитӕ аразыны хъуыддаджы табу кӕны номдзыд Микеланджелойы ӕрдхӕрӕны ӕрмдзӕфӕн. Уый хуызӕн аивады фӕндагыл фидар къахдзӕфтӕ кӕнынмӕ, скульптурӕйы жанры сусӕгдзинӕдтӕ хуыздӕр базоныныл та ахуыр кодта Гуырдзыстоны ӕмӕ нӕ республикӕйы аивады зындгонд дӕснытӕ Бердзинишвили, УФ-йы адӕмон нывгӕнӕг Дзанӕгаты Чермен ӕмӕ иннӕты сфӕлдыстадыл.

Дзукъайы-фыртӕн йӕ курдиаты гӕнӕнтӕ цӕмӕй уӕрӕхдӕр уой, уый тыххӕй кӕддӕриддӕр архайдта йӕ зонындзинӕдтӕ теоретикон ӕмӕ практикон ӕгъдауӕй фидар кӕныныл. Уыцы фадат та йын уыд Дзӕуджыхъӕуы нываивады училищӕйы ӕфсӕйнагыл декоративон хайады ахуыр кӕнгӕйӕ. Уый фӕстӕ та каст фӕци Бетъырбухы Илья Репины номыл аивадон академи. Ам райста скульпторы, нывгӕнӕджы ӕмӕ ахуыргӕнӕджы дӕсныйад.

Ӕцӕг курдиатджын адӕймаг бузныг ӕмӕ райгонд вӕййы йӕ ахуыргӕнджытӕй. Йӕ царды ӕмӕ сфӕлдыстадон фӕндагыл цӕугӕйӕ, йӕ фарсмӕ чи ‘рбалӕууыд, уыдон уыдысты УФ-йы сгуыхт нывгӕнӕг Дзбойты Михал, УФ-йы культурӕйы сгуыхт кусӕг Гӕгойты Таймураз ӕмӕ РЦИ-Аланийы сгуыхт нывгӕнджытӕ Дзанайты Руслан ӕмӕ Гӕбӕраты Феликс.

ЦИПУ-йы аивӕдты факультеты нываивады кафедрӕ байгом кӕныныл чи бацархайдта, уыцы зындгонд нывгӕнджытимӕ уыд Никъала дӕр. Студенттӕн скульпторы дӕсныйады сусӕгдзинӕдтӕ амоныны хъуыддаджы йӕ къухы чысыл ӕнтыстдзинӕдтӕ нӕ бафтыд. Уый та ууыл дзурӕг у, ӕмӕ йӕ зонд ӕмӕ курдиаты гӕнӕнтӕ ацы кафедрӕйы ноджы хуыздӕр кӕй бахсыстысты. Скульптурӕйы аивады академион скъола нӕ бӕстӕйы ӕппӕты тыхджындӕр кӕй у, уыцы хатдзӕгмӕ ӕрцыд, Туркаг горӕт Анкарайы паддзахадон университеты куы куыста, уӕд. Никъала куыд зӕгъы, афтӕмӕй фӕсарӕнты ахуырады къабаз бындурон нӕу, Уӕрӕсейы ахуырад та арф ӕмӕ алывӕрсыг у.

Никъалайы скульптурон композицитӕ аив кӕнынц нӕ горӕты ӕмӕ районты уынгтӕ ӕмӕ фӕзтӕ. Цхинвалы ис, зындгонд архитектор Кодзырты Русланимӕ кӕуыл бакуыстой, уыцы Гуырдзыстоны агрессортимӕ хӕстыл дзурӕг мемориалы арӕзтад. Уымӕй уӕлдай ма сарӕзта номдзыд поэт Хетӕгкаты Къостайы, академиктӕ Абайты Васойы, Касаты Хъазыбеджы бюсттӕ, штангӕтӕ исынӕй дунейы чемпион Еналдыты Аслӕнбегӕн, Георгийы дзуары цыппар хатты кавалер Хадыхъаты Виссарионӕн дӕр скульптор скодта сӕ хуызтӕ. Мӕздӕджы горӕты астӕу лӕууы Сыгъдӕг Георгий-Уӕлахизхӕссӕджы скульптурон композици.

— Мӕ алы ног уацмысыл дӕр тынг зӕрдиагӕй фӕкусын. Мӕ фарсмӕ вӕййынц, ме ‘рмдзӕф мын аивӕй адӕммӕ чи рахӕссы, ахӕм адӕймӕгтӕ: архитектортӕ, ӕндонуадзджытӕ. Иудадзыгдӕр сӕм мӕ хъус фӕдарын ӕмӕ мын разынынц ӕххуысгӕнджытӕ, нӕ архайд вӕййы ӕнгом ӕмӕ хӕларӕй, — зӕгъы Никъала.

Йӕ фыды курдиатӕй фӕхайджын Никъалайы чызг Евгения. Каст фӕци Тауаситы Сослӕнбеджы номыл аивӕдты скъола. Фӕстӕдӕр та ахуыр кодта аивадон училищӕйы.

Ӕрӕджы нӕ Нывгӕнджыты цӕдис бӕрӕг кодта йӕ сарӕзты 80 азы юбилей. Ацы бӕрӕгбоныл дывӕр цинтимӕ сӕмбӕлд Никъала. Кадджын уавӕры йын радтой РЦИ-Аланийы Парламенты Кады грамотӕ. Ацы бонты Дзукъаты Никъалайӕн Мӕскуыйы, Церетелийы номыл Аивӕдты академийы саккаг кодтой академикы ном. Нырӕй фӕстӕмӕ не ‘мзӕххон нымад уыдзӕн Уӕрӕсейы Аивӕдты академийы кадджын уӕнгыл.

Дӕ цард ӕмӕ дӕ куыст — дӕхи фӕндиаг уӕнт, Никъала!

Ноджы фылдӕр ма дын бантысӕд!

Гугкаты Жаннӕ

ОСТАВЬТЕ ОТВЕТ

Please enter your comment!
Please enter your name here