Битарты Вячеслав: «Амалхъомады райрӕзтӕн — ӕппӕт уавӕртӕ дӕр»

0
24

Ацы бонты Стъараполы крайы горӕт Минеральные Воды-йы йӕ куыст кӕны экономикон форум «Инвестируй в Кавказ». Уыцы форумы знон архайдта РЦИ-Аланийы официалон делегаци республикӕйы Сӕргълӕууӕг Битарты Вячеславы разамындӕй.

Цӕгат Кавказы федералон зылды социалон-экономикон райрӕзты, ӕмӕ комкоммӕ — амалхъомады архайд фӕхъомысджындӕр кӕныны фарстытыл ныхасы архайдтой инвестицион компаниты, министрадты, ведомствӕтӕ ӕмӕ ӕндӕр паддзахадон структурӕты, экспертон ӕхсӕнӕдты ӕмӕ дзыллон информацийы фӕрӕзты минӕвӕрттӕ.

Форумы кадджын уазджытӕ уыдысты УФ-йы Хицауады Сӕрдары хӕдивӕг Виталий Мутко, Цӕгат Кавказы хъуыддӕгты фӕдыл министр Сергей Чеботарев, Уӕрӕсейы Федерацийы Президенты ӕххӕстбарджын минӕвар Цӕгат Кавказы федералон зылды Александр Матовников ӕмӕ федералон зылды субъектты разамонджытӕ.

Форумы архайджытӕ фыццаджы-фыццагдӕр базонгӕ сты ног равдыстыты бирӕкъабазджын центр «МинводыЭКСПО»-йы архайдимӕ. Уый фӕстӕ уыд пленарон ӕмбырд.

Виталий Мутко йӕ раныхасы куыд фӕнысан кодта, афтӕмӕй Цӕгат Кавказы социалон-экономикон райрӕзты фарстытӕ ахсджиаг бынат ахсынц федералон Хицауады архайды. Йӕ ныхасмӕ гӕсгӕ, куыст цӕуы, цӕмӕй инвестортӕ фылдӕр ӕргом здахой регионмӕ, цӕмӕй дзы фылдӕр арӕзт цӕуа нырыккон куыстуӕттӕ, цӕмӕй рӕза кусӕн бынӕтты нымӕц. Ӕппӕт уыцы мадзӕлтты сӕйрагдӕр нысан у адӕмы царды уавӕртӕ хуыздӕр кӕнын.

УФ-йы Хицауады Сӕрдары хӕдивӕджы ныхасмӕ гӕсгӕ, ӕрмӕст национ проектты фӕлгӕты Цӕгат Кавказы субъектты райрӕзтӕн 2024 азы онг дихгонд ӕрцӕудзӕн 200 миллиард сомы бӕрц. Уыимӕ, сӕрмагонд ӕргом здӕхт цӕудзӕн амалхъомады къабазы райрӕзтмӕ.

Боны фӕткы фарстытыл дзургӕйӕ, Битарты Вячеслав куыд бафиппайдта, афтӕмӕй хицаудзинад ӕппӕт уавӕртӕ дӕр хъуамӕ араза амалхъомады райрӕзтӕн.

— Республикӕйы разамынд сӕрмагонд ӕргом здахы хӕххон фӕзуӕтты райрӕзтмӕ. Зӕгъӕм, Цӕгат Ирыстоны хъӕууонхӕдзарадон нысаниуӕджы зӕххытӕн се ‘мбис ӕрбынӕттон хӕххон районты. Хъыгагӕн, дзӕвгар азты дӕргъы адӕм уыцы бынӕттӕй цӕрынмӕ лыгъдысты быдырмӕ. Ӕмӕ ныр нӕ сӕйрагдӕр хӕс у, цӕмӕй ӕрыгон фӕлтӕртӕ се ‘ргом аздахой хӕххон районтӕм, цӕмӕй дзы гом кӕной куыстадон компанитӕ, — фӕнысан кодта Битарты Вячеслав.

Цӕгат Ирыстоны Сӕргълӕууӕджы ныхасмӕ гӕсгӕ, ахсджиаг у, «Хӕххон фӕзуӕтты райрӕзты тыххӕй» закъоны проектыл Цӕгат Кавказы хъуыддӕгты фӕдыл министрад зӕрдиагӕй кӕй кусы, уыцы хъуыддаг дӕр. «ӕппӕт фадӕттӕй дӕр спайда кӕнын хъӕуы, цӕмӕй закъон йӕ тыхы бацӕуа ӕмӕ кусын райдайа, цӕмӕй хӕххон бынӕтты амалхъомады райрӕзтӕн фӕзына ног гӕнӕнтӕ», — загъта Битарты Вячеслав.

Республикӕйы разамонӕг йӕ раныхасы сӕрмагондӕй арфӕ ракодта Виталий Муткойӕн, хӕххон-рекреацион комплекс «Мамысон»-ы арӕзтады проектмӕ зӕрдиаг ахаст кӕй дары, уый тыххӕй.

— Куыд зонӕм, афтӕмӕй уыцы курорты арӕзтадмӕ бавнӕлдтой 2012 азы, фӕлӕ фӕстӕдӕр уыцы объектыл ӕппӕт куыстытӕ дӕр урӕд ӕрцыдысты. Фӕлӕ ныр уыцы проектмӕ ногӕй раздӕхтыстӕм. Ӕмӕ уыцы хъуыддаджы нӕ фарсмӕ ӕрбалӕууыдысты Виталий Мутко ӕмӕ Цӕгат Кавказы хъуыддӕгты фӕдыл министрады разамынд. Уыдоны ӕххуысы фӕрцы хъӕугӕ фӕрӕзтӕ дихгонд ӕрцыдысты курорты ног проект саразынӕн. Куыд нысангонд цӕуы, афтӕмӕй фидӕн азы та райдайдзысты арӕзтадон куыстытӕ. Кӕй зӕгъын ӕй хъӕуы, уый фӕрцы уӕлӕмхасӕн райрӕзты фадӕттӕ фӕзындзӕн чысыл ӕмӕ рӕстӕмбис амалхъомадӕн дӕр, — кӕронбӕттӕны загъта Битарты Вячеслав.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here