Профцӕдистимӕ ӕмгуыстады фарстытӕ

0
84

Цӕгат Ирыстоны Хетӕгкаты Къостайы номыл паддзахадон университет ӕмӕ РЦИ-Аланийы профцӕдисты иугонды хъӕппӕрисӕй фыццаг хатт арӕзт ӕрцыд наукон-практикон конференци «Профцӕдистӕ ӕмӕ дзыллон хабархӕссӕг фӕрӕзты ӕмгуыстад».

Архайдтой дзы ЦИПУ-йы президент, профессор Мӕхӕмӕтты Ахуырбег, журналистикӕйы факультеты декан Хӕбӕлаты Фатимӕ, РЦИ-Аланийы профцӕдисты иугонды сӕрдар Касаты Таймураз. ЦИПУ-йы профцӕдисты организациты сӕргълӕууӕг Бады Зауыр, Цӕгат Ирыстоны адӕмон ахуырад ӕмӕ наукӕйы кусджыты профцӕдисты организацийы сӕргълӕууӕг Тезиаты Таймураз, агропромышленнон комплексы профцӕдисы сӕрдар Дзӕгъойты Изабеллӕ, дзыллон хабархӕссӕг фӕрӕзты кусджытӕ ӕмӕ журналистикӕйы факультеты студенттӕ. Конференцийы ныхас цыдис Цӕгат Ирыстоны профцӕдисты иугонды ӕмӕ дзыллон хабархӕссӕг фӕрӕзты ӕмгуыстадыл. Ӕмбырды архайджытӕн арфӕтӕ ракодта Мӕхӕмӕтты Ахуырбег, уый фӕстӕ бӕлвырд радзырдта, профцӕдисты равзӕрдӕй абонмӕ историон бӕрӕггӕнӕнты ӕмӕ ӕхсӕнадон царды сӕ архайды ахадындзинады тыххӕй.

— Профцӕдистӕн рагӕй дӕр стыр ахадындзинад ис. Уыдон хъахъхъӕнынц фӕллойгӕнӕджы социалон ӕмӕ экономикон бартӕ. Профцӕдистӕн бындур ӕвӕрд ӕрцыд 1905 азы, фыццаг уырыссаг революци нӕ бӕстӕйы куы анхъӕвзта, уӕд, паддзахы манифесты фӕстӕ. Ӕмӕ кӕд уӕззау рӕстӕджытӕ скодта, уӕддӕр кусӕг адӕмӕн профцӕдистӕ уыдысты сӕ ныфс, хуыздӕр царды уавӕртӕ, хуыздӕр фидӕн саразыны хъуыддаджы. Мидхӕсты ӕмӕ Фыдыбӕстӕйы Стыр хӕстыты профцӕдистӕн сӕ архайд уыдис ноджы егъаудӕр. Хӕсты фыццаг бонтӕй фӕстӕмӕ профцӕдисты организацитӕ архайдтой адӕмон хӕдзарад ӕфсӕддонтӕм рацаразыны ӕмӕ фронтӕн ӕххуыс кӕныны хъуыддагыл. Уыцы промышленносты афойнадыл уагъд продукцийӕ бирӕ аразгӕ уыд Советон ӕфсады ӕнтыстдзинад, уӕлахизы бон хӕстӕгдӕр кӕнын. Профцӕдисты архайд кӕд абон дӕр нӕ бамынӕг, кӕд сӕ нысантӕ уыцы-иу сты, уӕддӕр сӕ куыст чысыл ӕндӕрхуызон фӕци нырыккон царды. Фӕлӕ хистӕртӕ сӕ зӕрдӕ нӕ сивтой профцӕдисты куыстыл. Мӕ зӕрдыл арӕх ӕрлӕууынц Цӕгат Ирыстоны профцӕдисты организациты раззагдӕр активисттӕ. Кӕй зӕгъын ӕй хъӕуы, ис уӕды ӕмӕ абоны профцӕдисты куысты бӕрӕг хицӕндзинӕдтӕ, — загъта Мӕхӕмӕтты Ахуырбег.

РЦИ-Аланийы профцӕдисты иугонды сӕрдар Касаты Таймураз бацӕттӕ кодта доклад ахӕм темӕйыл: «Профцӕдис куыд граждайнаг ӕхсӕнады институт. Фидӕны гӕнӕнтӕ ӕмӕ фадӕттӕ». Куыд радзырдта, афтӕмӕй нырыккон уавӕрты профцӕдисты оранизациты нысантӕ уӕрӕхдӕр сты, фӕлӕ сын нӕй мыхуыры фӕрӕзтимӕ ӕмбӕлгӕ ӕмгуыстад.

— Газетты кусӕг журналисттӕн цымыдисаг нӕу профцӕдисты куыст, ӕмӕ мыхуыр дӕр нӕ кӕнынц ӕрмӕджытӕ. Информацион куыст та махӕн ахсджиаг у, нӕ архайд нын хъуамӕ зоной нӕ республикӕйы цӕрджытӕ. Фидӕны нӕ зӕрды ис профцӕдисты куыстыл ӕппӕты хуыздӕр мыхуыргонд ӕрмӕджытӕн конкурстӕ аразын. Ацы хъуыддаг нын у вазыгджын ӕмӕ йыл бацархайдзыстӕм, — загъта Касаты Таймураз.

Саутӕты Тамилӕ

Къам систа Къӕбысты Харитон

ОСТАВЬТЕ ОТВЕТ

Please enter your comment!
Please enter your name here