«Юность» бацахста 3-аг бынат

0
24

Сочийы дӕс боны дӕргъы цыдысты Уӕрӕсейы футболон скъолаты ‘хсӕн фыццаг бынат бацахсыныл кӕронбӕттӕн ерыстӕ. Архайдтой дзы нӕ бӕстӕйы хуыздӕр скъолаты 16 командӕйы. Семӕ уыд Дзӕуджыхъӕуы футболон скъола «Юность»-ы командӕ дӕр.

Командӕтӕ дихгонд ӕрцыдысты цыппар дӕлкъордыл. «Юность»-имӕ ерыс кодтой Мӕскуыйы, Красноярск ӕмӕ Подольскы командӕтӕ.

Дзӕуджыхъӕуккаг футболисттӕ фӕуӕлахиз сты Красноярскы «Енисей» ӕмӕ Подольскы «Витязь»-ыл. Дыууӕтӕй дӕр нӕ лӕппутӕ рамбылдтой 1:0, хыгъдӕй. Ацы командӕтыл фӕуӕлахиз сты Мӕскуыйы «ФШМ»-йы футболисттӕ дӕр. Фыццаг ӕмӕ дыккаг бынӕттӕ бацахсӕг командӕтӕ сбӕрӕг сты Дзӕуджыхъӕу ӕмӕ Мӕскуыйы командӕты фембӕлды. Сӕ ныхмӕлӕуд ахицӕн 1:1 хыгъдӕй ӕмӕ 1-аг бынатмӕ рацыд Мӕскуыйы командӕ, фылдӕр пуртитӕ кӕй бакъуырдта, уый тыххӕй.

Ерысты 1/4 хайы «Юность» фембӕлд, дӕлкъорд «С»-йы фыццаг бынат чи бацахста, уыцы Орелы командӕ «Русичи»-имӕ. «Русичи» йӕ дӕлкъорды фӕуӕлахиз йӕ ӕртӕ ныхмӕлӕууӕгыл дӕр. Уыдонӕй иу уыд, фӕстӕдӕр ерысты 1-аг бынат чи бацахста, уыцы ростоваг командӕ «Ростов».

«Юность» ӕмӕ «Русичи»-йы фембӕлд рауад тынг хъазуатон. Дыууӕ командӕйы дӕр тырныдтой уӕлахизмӕ, фӕлӕ хъазты рӕстӕг 0:0 хыгъдӕй куы фӕци, уӕд уӕлахиздзау сбӕрӕг кӕнын бахъуыд 11-метрон цӕфты фӕрцы. Дзӕуджыхъӕуккаг футболисттӕ разындысты рӕстдзӕвиндӕр ӕмӕ рамбылдтой 5:4 хыгъдӕй.

Ӕрдӕгкӕронбӕттӕны нӕ лӕппутӕ фембӕлдысты Ярославлы «Шинник»-имӕ. Сӕ хъазуатон фембӕлд ахицӕн 2:1 хыгъдӕй, «Шинник»-ы пайдайӕн, ӕмӕ ма уый фӕстӕ «Юность»-ӕн 3-аг бынатыл тох кӕныны фадат уыд Самарӕйы «Крылья Советов»-имӕ. Ацы фембӕлд дӕр та рауад тынг хъазуатон. Дыууӕ командӕйы дӕр фӕндӕгтӕ агуырдтой кӕрӕдзи дуӕрттӕм баирвӕзынмӕ ӕмӕ уый сӕ къухы бафтыд фӕйнӕ иу хатты. Сӕ хъазты рӕстӕг куы фӕци, уӕд хыгъд уыд 1:1 ӕмӕ та ам дӕр уӕлахиздзау сбӕрӕг кӕнын бахъуыд 11-метрон цӕфты руаджы. Нӕ лӕппутӕ иуӕй рӕстдзӕвиндӕр разындысты, иннӕмӕй та нӕ дуаргӕс Дзӕгъойты Олег цырд фӕлӕууыд ӕмӕ дыууӕ хатты йӕ хызмӕ пурти батӕхын нӕ бауагъта. «Юность» рамбылдта 4:1 хыгъдӕй ӕмӕ рацыд 3-аг бынатмӕ 16-17-аздзыд футболистты ‘хсӕн. Ерысты 1-аг бынат бацахста «Ростов», 2-аг та ссис «Шинник». Нӕ командӕйы ерыстӕм бацӕттӕ кодтой тренертӕ Дзулаты Игорь ӕмӕ Дзуццаты Алан.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here