Нӕ уазджытӕ цӕттӕ сты турнирмӕ

0
47

Райсом ӕмӕ иннӕбон Дзӕуджыхъӕуы уыдзӕн уӕгъдибар хъӕбысхӕстӕй дунеон турнир «Алантӕ». Ирыстонмӕ алы бӕстӕтӕй цы богӕлттӕ ӕрбацыд, уыдоны ‘хсӕн ис, ӕгас дунейы дӕр йӕ ном хъуыстгонд кӕмӕн у, ахӕмтӕ. Зӕгъӕм, америкаг богал Кайл Снайдер уыд 2018 азы дунейы чемпион ӕмӕ ныр та йӕ нысан у иннӕ аз Олимпаг хъӕзтыты рамбулын.

Кайл Снайдер йе ‘мбӕлттимӕ Ирыстонмӕ ӕрбацыд къуыри раздӕр, ӕмӕ райсомы ерыстӕм сӕхи цӕттӕ кодтой Хӕдарцаты Асланы номыл хъӕбысхӕсты академийы. «Турнир «Алантӕ» у хъуыстгонд турнир ӕмӕ дзы мӕнӕн уыдзӕн тыхджын ныхмӕлӕуджытӕ. ӕз зонын, Ирыстон уӕгъдибар хъӕбысхӕстӕй бӕрзонд бынат кӕй ахсы, уый ӕмӕ мӕ ардӕм ӕрбацӕуын фӕндыд. Тынг хорз нӕ суазӕг кодтой нӕ фысымтӕ. Ноджы ма нӕ дисы бафтыдта, академийы цы хорз уавӕртӕ арӕзт ис, уый», — загъта Кайл Снайдер.

АИШ-ы командӕйы разамонӕг Пол Кеблаш ӕмӕ тренер Белл Задек дӕр тынг бузныг сты, ерыстӕм сӕхи цы уавӕрты цӕттӕ кӕнынц, уымӕй. Пол Кеблаш йӕхӕдӕг уырыссагау загъта: «Мӕнӕн уӕ бӕстӕйы ӕмӕ Ирыстоны дӕр ис хорз зонгӕтӕ ӕмӕ ӕмбӕлттӕ. Ӕз хорз зыдтон Андиаты Сосланы, хорз зонын Хӕдарцаты Махары ӕмӕ уӕ иннӕ зындгонд богӕлтты дӕр. Ирыстонмӕ ӕрбацыдыстӕм уымӕн, ӕмӕ йӕ зонӕм, ам нӕ богӕлттӕн тыхджын ныхмӕлӕуджытӕ кӕй уыдзӕн, уый. Ахӕм турниры хӕрзиуӕг рамбулын уыдзӕн стыр ӕнтыстдзинадыл нымад ӕмӕ сын ныфс ратдзӕн фидӕны Олимпаг хъӕзтытӕм сӕхи цӕттӕ кӕнынӕн».

АИШ-ы командӕйы ис 12 богалы. Уыдонӕй цалдӕр сты сӕ бӕстӕйы чемпионтӕ.

Тыхджын богӕлттӕ ис Иран, Гуырдзыстон, Азербайджан ӕмӕ иннӕ бӕстӕты командӕты дӕр. Уый та дзурӕг у, турнир «Алантӕ»-йы ерыстӕ тынг цымыдисаг кӕй уыдзысты, ууыл.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here