Ныхас — хӕххон фӕзуӕтты рӕзтыл

0
48

Знон Дзӕуджыхъӕуы кусын райдыдта IX дунеон наукон-практикон конференци. Йӕ темӕ у «Хӕххон фӕзуӕттӕ: сӕ рӕзты ахсджиагдӕр фарстытӕ».

Ӕмбырды архайынц Узбекистаны,Таджикистаны, Сомихы, Абхазы, Германы, Францы геологийы, экологи ӕмӕ техногенон ӕдасдзинады эксперттӕ, ахуыргӕндтӕ. Конференци цӕудзӕн ӕртӕ боны. Арӕзт цӕуы пленарон ӕмбырдтӕй, тематикон семинартӕ ӕмӕ секцитӕй, литературӕ ӕмӕ нормативон гӕххӕттыты, адӕмон ӕрмдӕсныты ӕмӕ национ аивады дзаумӕтты равдыстӕй.

Знон та пленарон ӕмбырды ныхас цыдис хӕххон фӕзуӕтты социалон-экономикон, хӕххон уавӕрты агропромышленнон комплексы ӕмӕ туризмы рӕзтыл, ӕрдзон ӕмӕ техногенон ӕдасдзинад, дунеон ӕмӕ регионалон ӕмгуыстады фарстытыл.

Конференцийы архайджытӕн РЦИ-Аланийы Сӕргълӕууӕг Битарты Вячеславы номӕй арфӕ ракодта республикӕйы Хицауады Сӕрдары хӕдивӕг Фадзайты ӕхсарбег. «Хӕххон фӕзуӕтты рӕзты фӕдыл арӕзт конференци ссис традицион. Ӕхсызгон нын у, Цӕгат Ирыстон ацы ӕмбырдӕн ӕвзӕрст кӕй цӕуы, уӕлдайдӕр, канд нӕ республикӕйы нӕ, фӕлӕ ӕнӕхъӕн Цӕгат Кавказы рагондӕр — Хӕххон-металлургон институты. Цы хъуыддаг нӕ ӕрӕмбырд кодта, уый ахсджиаг у, хӕххон фӕзуӕттӕ кӕм ис, уыцы бӕстӕтӕн».

Арфӕйы ныхас загъта ЮНЕСКО-йы геопарктӕ ӕмӕ геонаукӕйы дунеон программӕты разамонӕг Кристоф Ванденберг дӕр: «Цӕгат Кавказы кой рагӕй хъуыстон, фӕлӕ йӕ ныр фыццаг хатт мӕхи цӕстытӕй федтон. Мах ацы проекты архайӕм 2015 азӕй фӕстӕмӕ. Уыцы аз февралы, Парижы ацыд ЮНЕСКО-йы наукон советы радон ӕмбырд. Уӕд сарӕзтам геопаркты ӕмӕ геонаукӕйы ӕппӕтадӕмон ног программӕ. Геопаркты рӕзтмӕ се ‘ргом здахынц бирӕ паддзахӕдтӕ. Уыдон сты геологон бынты сӕйрагдӕр районтӕ, ахъаз сты регионты экономикон рӕзтӕн. Фӕнды мӕ, цӕмӕй Цӕгат Кавказимӕ дӕр бастдзинад дарӕм ӕмӕ ӕмгуыстад кӕнӕм”.

Конференцийы архайджытӕ докладтӕ бацӕттӕ кодтой хӕххон фӕзуӕтты рӕзтыл, сӕйраг та уыдис Фадзайты ӕхсарбеджы раныхас туристон кластер «Мамысон»-ы рӕзты тыххӕй. Куыд радзырдта, афтӕмӕй хӕххон лыжӕты курорт Цӕгат Ирыстоны байгом уыдзӕн 2022 азы.

— Ног объекты руаджы дзы фӕзындзӕн ӕртӕ мин куысты бынаты. Проект сӕххӕст кӕнынӕн хардзгонд ӕрцӕудзӕн 7,5 миллиард сомы.

2021 азы фӕнд кӕнӕм лыжӕтӕй бырыны ӕмӕ дыууӕ рӕтӕн фӕндаджы саразын. 2022 азы райдайӕны Мамысоны курорт хъуамӕ скуса. Конкурсы бындурыл ӕвзардзыстӕм аразджыты дӕр. Ныхас кодтам немыцаг, австрийаг ӕмӕ францаг фирмӕтимӕ. Туристтӕн фысымуӕтты чысыл горӕт чи сараздзӕн ӕмӕ инвестицитӕ 10 миллиард сомы чи бахӕсдзӕн, ис ахӕм инвестортӕ дӕр.

Йе ‘рдзон уавӕртӕм гӕсгӕ Мамысон Хъӕрӕсе-Черкесийы Домбайы ӕнгӕс у. Мамысонгомы хохы фӕхстӕ ахъаззаг сты лыжӕтӕй бырынӕн ӕмбӕлгӕ уавӕртӕ саразынӕн, куыд профессионалтӕн, афтӕ райдайгӕ спортсментӕн дӕр. Туристтӕн курорты цы фадӕттӕ уыдзӕн, уыдоны ‘хсӕн сты санаторон лӕггӕдтӕ, ӕнӕниздзинад фидардӕр кӕнынӕн суары дӕттӕ ӕмӕ ваннӕтӕ дӕр. Сараздзыстӕм туристон балцыты маршрут архитектурон ӕмӕ историон бынӕттыл.

Проект «Мамысон»-ы арӕзтад райдыдта 2013 азы, фӕстӕдӕр проекты ӕхцайы хӕрдзтӕ урӕд ӕрцыдысты. Цӕгат Ирыстоны разамынд куырдиат балӕвӕрдта УФ-йы Экономикон рӕзты министрадмӕ, цӕмӕй курорты статус — экономикон зонӕ — фӕстӕмӕ раздӕха. Туристон комплексы иумӕйаг фӕзуат ахсы мин ӕмӕ фондзсӕдӕ гектары, Йӕ дӕргъ у ссӕдз километры. 2018 азы ноябры УФ-йы Хицауад уынаффӕ рахаста, проект сӕххӕст кӕнынӕн 100 милуан сомы радих кӕнынӕн. Нӕ республикӕйы бюджетӕй проектон-хӕрдзты документацийӕн дихгонд ӕрцыд 20 милуан сомы. Дӕллаг Зӕрӕмӕгӕй Мамысонмӕ автомобилон фӕндаджы арӕзтадӕн та — 6,400 милуан сомы, — загъта РЦИ-Аланийы Хицауады Сӕрдары хӕдивӕг.

Саутӕты Тамилӕ

Къам систа КЪӔБЫСТЫ Харитон

ОСТАВЬТЕ ОТВЕТ

Please enter your comment!
Please enter your name here