Ахсджиаг социалон объектты арӕзтад адарддӕр уыдзӕн

0
42

Мӕскуыйы кусӕг балцы уӕвгӕйӕ, Цӕгат Ирыстоны Сӕргълӕууӕг Битарты Вячеслав фембӕлд Уӕрӕсейы Федерацийы Хицауады Сӕрдары хӕдивӕг Виталий Муткоимӕ.

Республикӕйы разамонӕг федералон хицауады вице-премьерӕн бӕстон радзырдта, РЦИ-Аланийы социалон-экономикон райрӕзты мадзӕлтты пълан (зындгонд куыд у, афтӕмӕй уыцы документ фарон сфидар кодта УФ-йы Хицауад) куыд ӕххӕстгонд цӕуы, уый тыххӕй. Битары-фырты ныхасмӕ гӕсгӕ, уыцы пъланы бындурыл ныридӕгӕн ахицӕн сты цалцӕггӕнӕн ӕмӕ арӕзтадон куыстытӕ 8 ахсджиаг социалон объекты. Уыдоны нымӕцы: Мӕздӕджы поликлиникӕ, ӕрыдоны районы Центрон рынчындон, Тарскӕ ӕмӕ Сунжӕйы хъӕуты амбулаторитӕ, фелсырон-акушерон пункт Хъобаны, Мӕздӕджы, Дачнӕйы ӕмӕ Иры хъӕуы рӕвдауӕндӕттӕ.

Куыд загъдӕуыд, афтӕмӕй 2019 азы дарддӕр куыст цӕудзӕн уӕлдӕр амынд мадзӕлтты пълан ӕххӕст кӕныныл. Уыимӕ, ахсджиаг социалон объекттӕ арӕзт цӕудзысты паддзахадон программӕтӕ ӕмӕ фыццаградон национ проектты фӕлгӕты дӕр. Фидӕн азы арӕзтады пъланмӕ бахастой 18 алыхуызон объекты. Уыдоны нымӕцы: дыууӕ ног скъолайы Дзӕуджыхъӕуы, иу скъола Мӕздӕджы, рӕвдауӕндон Луковскы станицӕйы, Куырттат ӕмӕ Хӕтӕлдоны хъӕуты фелсырон-акушерон пункттӕ… Рацарӕзт ӕмӕ цалцӕггӕнӕн куыстытӕ та цӕудзысты Сывӕллӕтты республикон клиникон рынчындоны, Тагъд ӕххуысы клиникон рынчындоны ӕмӕ ӕндӕр социалон ӕмӕ медицинон кусӕндӕтты.

Нысангонд куыстытӕ азы кӕронмӕ кӕм ахицӕн уыдзысты, уыцы объектты номхыгъды сты ӕрхонкӕйы станицӕйы рынчындоны рацарӕзт ӕмӕ Октябрыхъӕуы сывӕллӕтты спортивон скъолайы цалцӕг (уыдонӕн фӕрӕзтӕ дихгонд ӕрцыдысты Цӕгат Кавказы федералон зылды рӕзты фӕдыл паддзахадон программӕйы фӕлгӕты).

Битарты Вячеслав куыд радзырдта, афтӕмӕй республикӕ УФ-йы ӕнӕниздзинад хъахъхъӕнынады министрадимӕ цы сӕрмагонд бадзырд бафыста, уый бындурыл та арӕзт ӕрцӕудзысты 4 амбулатори ӕмӕ 3 фелсырон-акушерон пункты (Красногоры, Бӕтӕхъойыхъӕуы, Бруты, Михайловскы, Дӕргъӕвсы, Дӕллаг Саниба ӕмӕ Мӕцутӕйы). Уыцы объекттӕ байгом уыдзысты 2020 азы.

Цӕгат Ирыстоны разамонӕг дарддӕр куыд радзырдта, афтӕмӕй 2019-2021 азты дӕр арӕзт ӕрцӕудзӕн бирӕ ахсджиаг объекттӕ. Республикӕ федералон ведомствӕтимӕ цы бадзырдтӕ бафыста, уыдоны бындурыл арӕзт ӕрцӕудзысты: ног скъолатӕ Хъызлар, Цӕлыччы ӕмӕ Чермены, ног рӕвдауӕндон Беслӕны, спортивон комплекс ӕрыдоны ӕмӕ афтӕ дарддӕр. Цалцӕггӕнӕн куыстытӕ цӕудзысты ӕндӕр медицинон ӕмӕ ахуырадон кусӕндӕтты дӕр.

Уымӕй уӕлдай, РЦИ-Аланийы Хицауад бахатыд УФ-йы Рухсады министрадмӕ, цӕмӕй Дур-Дур ӕмӕ Михайловскы хъӕуты скъолаты рацарӕзт бахӕссой 2020 азы пълантӕм.

Фембӕлды архайджытӕ сӕйраг ӕргом аздӕхтой цӕрӕнуӕтты-коммуналон хӕдзарады къабазы уавӕрмӕ дӕр. Республикӕйы Сӕргълӕууӕг куыд фӕнысан кодта, афтӕмӕй 2020 азы куыстыты пъланмӕ бахӕссынвӕнд кӕнынц коммуналон хӕдзарады 8 объекты. Уыдоны нымӕцы Дзӕуджыхъӕу ӕмӕ цалдӕр хъӕууон районы донуадзӕн хӕтӕлты ӕмӕ сыгъдӕггӕнӕн системӕты рацарӕзт. Ӕппӕт уыцы объектты фӕдыл ныртӕккӕ цӕттӕгонд цӕуы хъӕугӕ проектон-хӕрдзты документаци. Уыцы гӕххӕттытӕ фӕстӕдӕр лӕвӕрд ӕрцӕудзысты паддзахадон экспертизӕмӕ.

Ныхасы рӕстӕг ӕркастӕуыд, хӕххон-рекреацион комплекс «Мамысон»-ы арӕзтады фӕдыл хӕстӕгдӕр рӕстӕг цы организацион мадзӕлттӕ арӕзт ӕрцӕудзӕн, уымӕ дӕр. Битарты Вячеслав куыд загъта, афтӕмӕй курорты проектон-хӕрдзты документаци хӕстӕгдӕр рӕстӕг ӕрвыст ӕрцӕудзӕн паддзахадон экспертизӕмӕ. Куыд нысангонд цӕуы, афтӕмӕй фидӕн азы райдайдзысты инженерон хӕтӕлтӕ ӕмӕ канатон фӕндӕгты арӕзтӕдтӕ. Инвестортӕ та райдайдзысты фысымуӕттӕ ӕмӕ туристон инфраструктурӕйы иннӕ объектты арӕзтӕдтӕ. «Мамысон»-ы арӕзтадӕн фыццаг къӕпхӕны федералон бюджетӕй дихгонд ӕрцӕудзӕн 1 миллиард сомы бӕрц.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here