Аланийы аргъуыды бӕрӕгбон: федералон центримӕ ӕнгом ӕмархайды фӕрцы

0
20

Мӕскуыйы уыд Аланийы аргъуыды 1100 азы юбилеймӕ цӕттӕгӕнӕг федералон комитеты ӕмбырд. УФ-йы Хицауады Сӕрдары хӕдивӕг Ольгӕ Голодец сӕрдариуӕг кӕм кодта, уыцы ӕмбырды Цӕгат Ирыстонӕй архайдтой республикӕйы Сӕргълӕууӕг Битарты Вячеслав, Хицауады Сӕрдары хӕдивджытӕ Иринӕ Азимова ӕмӕ Дзанайты Барис.

Зындгонд куыд у, афтӕмӕй Аланийы аргъуыды бӕрӕгбонмӕ цӕттӕгӕнӕг федералон комитет арӕзт ӕрцыд УФ-йы Президент Владимир Путины Указӕй, йӕ уӕнгтӕ сты федералон ведомствӕтӕ ӕмӕ министрадты бӕрнон кусджытӕ, стӕй Цӕгат Ирыстоны хицаудзинады ӕххӕстгӕнӕг оргӕнты минӕвӕрттӕ.

Ныр оргкомитеты уӕнгтӕ бӕстон бавнӕлдтой юбилейон мадзӕлтты пълантӕ цӕттӕ кӕнынмӕ. Ӕмбырды архайджытӕ куыд фӕнысан кодтой, афтӕмӕй Аланийы аргъуыды 1100 азы кадӕн цы бирӕ алыхуызон мадзӕлттӕ арӕзт ӕрцӕудзӕн, уыдонӕн фыццаджы-фыццагдӕр уыдзӕн рухстауӕн нысаниуӕг. Зӕгъӕм, Уӕрӕсейы Культурӕйы министрад цӕттӕ кӕны дыууӕ егъау равдысты — «Алания. Истоки цивилизации» ӕмӕ «Аланы. Сокровища аланских князей». Комитеты уӕнгты хъуыдымӕ гӕсгӕ, ахсджиаг хъуыддаг у, юбилеймӕ документалон ӕмӕ аивадон кинонывтӕ дӕр кӕй сисдзысты, уый. Куыд нысангонд цӕуы, афтӕмӕй документалон кинонывы сӕйраг хъайтартӕ суыдзысты Цӕгат Ирыстоны зындгонд хъӕбултӕ —фӕллой ӕмӕ хӕсты ветерантӕ, культурӕ ӕмӕ аивады архайджытӕ…

Ӕмбырды фӕстӕ Битарты Вячеслав куыд фӕнысан кодта, афтӕмӕй федералон Хицауады ӕмвӕзадыл ахадгӕ мадзӕлттӕ арӕзт цӕуы, цӕмӕй Аланийы аргъуыды 1100 азы бӕрӕгбон ӕппӕты бӕрзонддӕр организацион ӕмвӕзадыл цӕттӕгонд ӕрцӕуа.

Республикӕйы разамонӕджы ныхасмӕ гӕсгӕ, комитеты уӕнгтӕ се ‘ргом аздӕхтой, бӕрӕгбоны мадзӕлттӕ кӕм цӕудзысты, уыцы объектты цалцӕг ӕмӕ рацарӕзты фарстытӕм дӕр. «Зӕгъӕм, Сыгъдӕг Георгийы дзӕуджыхъӕуккаг аргъуан йӕ рӕстӕджы арӕзт ӕрцыд, адӕм цы ӕхца фембырд кодтой, уыдонӕй. Фӕлӕ уӕд къухы нӕ бафтыд аргъуаны мидӕггаг бакаст кӕронмӕ сфӕлгонц кӕнын. Ныр федералон центры ӕххуысӕй уыцы аивгӕнӕн куыстытӕ кӕронмӕ ахӕццӕ уыдзысты», — бафиппайдта Битары-фырт.

Йӕ ныхасмӕ гӕсгӕ, 2020 азы федералон бюджеты сӕрмагонд фӕрӕзтӕ нысангонд ӕрцыдысты республикон стадион «Спартачы» рацарӕзтӕн.

— Евгений Вахтанговы номыл Уырыссаг академион театры рацарӕзты хъуыддаджы дӕр федералон центр нӕ фарсмӕ ӕрбалӕууыд. Театры цалцӕджы проект ныридӕгӕн у цӕттӕ. Уыимӕ, бӕрӕггонд ӕрцыд, ног бирӕкъабазджын Спорты галуаны проект чи сараздзӕн, уыцы компани дӕр. Проекты фӕдыл ӕппӕт хъӕугӕ документаци афойнадыл барвитдзыстӕм паддзахадон экспертизӕмӕ, — фӕнысан кодта Битарты Вячеслав.

Республикӕйы разамонӕджы ныхасмӕ гӕсгӕ, федералон министрадтӕ ӕмӕ ведомствӕтимӕ ӕнгом ӕмархайды фӕрцы афойнадыл лыггонд цӕуынц ӕппӕт организацион фарстытӕ дӕр, уыимӕ, бӕрӕггонд цӕуынц ӕппӕт нысангонд куыстыты финансон гуырӕнтӕ дӕр.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here