Амалхъомадӕн — ӕххуысы фӕрӕз

0
40

Тагъд Дзӕуджыхъӕуы йӕ дуӕрттӕ байгом кӕндзӕн центр «Мой бизнес», кӕронмӕ дзы фӕхӕццӕ кӕнынц цалцӕггӕнӕн куыстытӕ. Ӕрбынӕттон уыдзӕн бизнес-инкубаторы бӕстыхайы.

Куыстытӕ куыд ӕххӕстгонд цӕуынц, уыдӕттӕ сбӕрӕг кодтой республикӕйы экономикон ведомствӕйы разамонӕг Томайты Хъазыбег, йӕ хӕдивӕг Дзоблаты Зураб ӕмӕ Амалхъомадӕн ӕххуысы фонды хицау Гаджиты Батрадз. Афтӕ зӕгъӕн ис, ӕмӕ бӕстыхай цалцӕггонд ӕрцыд, аиуварс кодтой бетонмӕ дон бахъарынимӕ, хъармдӕттынимӕ баст къуылымпытӕ. Ис дзы ӕппӕт фадӕттӕ дӕр амалхъомтимӕ ныхас, лӕггӕдтӕ сын кӕнынӕн, суанг бирӕфадатджын лӕггӕдты центр нырыккон техникӕ ӕмӕ авналӕнтимӕ.

Амалхъомтӕн ма бирӕфадатджын центры лӕггӕдты ӕмрӕнхъ уыдзӕн республикӕйы районтимӕ видеобастдзинад. «Уый тынг ахсджиаг хъуыддаг у, афтӕмӕй амалхъомады минӕвӕрттӕн уыдзӕн бынӕтты аккаг ӕххуыс райсыны фадат. Алы хатт алкӕй бон нӕ вӕййы Дзӕуджыхъӕумӕ рацӕуын, нӕ зӕрдӕ дарӕм, ахӕм фӕлтӕрддзинад пайдайаг кӕй рауайдзӕн ӕмӕ ма дзы суанг нӕ бӕстӕйы иннӕ субъектты дӕр кӕй спайда кӕндзысты, ууыл», — загъта Томайты Хъазыбег.

Экономикон ведомствӕйы разамонӕг бахӕс кодта дыууӕ къуыримӕ ӕппӕт куыстытӕ сӕххӕст кӕнын.

Зындгонд куыд у, афтӕмӕй ахӕм центртӕ Уӕрӕсейы ӕппӕт регионты дӕр конд цӕуынц национ проект «Чысыл ӕмӕ рӕстӕмбис амалхъомад ӕмӕ хицӕн амалхъомадон хъӕппӕристӕн ӕххуыс»-ы фӕлгӕты. Ныридӕгӕн уал фӕзынд 50 центры, 2024 азмӕ хъуамӕ дыууӕ хатты фӕфылдӕр уой. Нысантӕм гӕсгӕ хъуамӕ амалхъомадӕн ӕххуысы ӕппӕт инфраструктурӕ иу ран ӕмбырдгонд ӕрцӕуа.

Уыцы хъуыддаг Цӕгат Ирыстоны лыггонд ӕрцыд, иу фӕзуаты кусынц Амалхъомадӕн ӕххуысы фонд (уымӕй скӕндзысты «Мой бизнес»-ы центр), ӕфстӕутты зӕрдӕдарӕнты фонд, Инвестицион рӕзты корпораци, Амалхъомты бартӕ хъахъхъӕнӕг ӕххӕстбарджыны аппарат, «МСП-Банк»-ы дӕрддзӕф ранӕй кусӕг хайад. Рӕхджы уырдӕм баивдзӕн Чысыл ӕмӕ рӕстӕмбис амалхъом куыстуӕттӕн гыццыл ӕфстӕуттӕ дӕттыны фонд. Куыддӕр центры бирӕфадатджын лӕггӕдтӕ скусой, афтӕ дзы амалхъомтӕн фадӕттӕ фӕзындзӕн ӕххуысы ӕппӕт хуызтӕ райсынӕн, амалхъомадон хъуыддаг байгом кӕнынӕн.

Экономикон рӕзты министрады пресс-службӕ

ОСТАВЬТЕ ОТВЕТ

Please enter your comment!
Please enter your name here