Къоста — адӕмты ныфсы мӕсыг

0
20

Хетӕгкаты Къостайы 160 азы юбилеймӕ ЦИПУ-йы рауагъдадон-полиграфион центры уырыссаг ӕвзагыл рацыд зындгонд советон ӕмӕ уӕрӕсейаг ахуыргӕндты, литературӕ ӕмӕ аивады архайджыты докладтӕ ӕмӕ раныхӕстӕй арӕзт ӕмбырдгонд «Коста Хетагуров — звезда первой величины».

Историон наукӕты доктор, профессор Мӕхӕмӕтты Ахуырбег «Ныхас Къостайыл»-ы ӕрхаста Абайты Васойы ныхӕстӕ: «Къоста алы иронӕн дӕр ӕнӕкӕрон зынаргъ уымӕн у, ӕмӕ дзы уыны йӕхи хуыздӕр хай. Йӕ фӕлгонц сси бӕрзонддзинад ӕмӕ уӕздандзинады нысан, ӕнӕхъӕн адӕмы фӕндагамонӕг стъалы. Къостайыл хъуыдыгӕнгӕйӕ, нӕ ӕрфӕнды хуыздӕр, сыгъдӕгдӕр, зондджындӕр уӕвын».

Дзасохты Гиго 1909 азы Ростовы рауагъта чиныг «Хетӕгкаты Къоста». Уым зындгонд публицист фыста: «Йӕ цардӕй чи ахицӕн, уыцы поэты раз нырма йӕ хӕс бафыста ӕрмӕстдӕр йӕ хо Ольгӕ Къостайӕн йӕ царды фӕстаг тыхст рӕстӕджы. Хойы хӕстӕ намысджынӕй сӕххӕст кодта ӕнӕхъӕн Ирыстонӕн дӕр зынаргъ адӕймаджы раз. Нӕ зӕрдӕ дардзыстӕм, Къостайӕн аргъгӕнджытӕй дӕр кӕй нӕ ферох уыдзӕн ӕмӕ йӕ ном сӕнусон кӕныныл кӕй бацархайдзысты, ууыл».

Хетӕгкаты Къоста йӕ уӕлмонц сфӕлдыстадӕй йӕхи рох кӕнын нӕ бауагъта. Уый нӕ, фӕлӕ ма дардыл дӕр йӕ ном айхъуыст, иннӕтӕн дӕр сси сӕ ныфсы мӕсыг. Ирон литературӕйӕн фидар бындур сӕвӕрыныл архайдтой Коцойты Арсен, Гӕдиаты Секъа, Брытъиаты Елбыздыхъо, Къубалты Алыксандр, Гуырдзыбеты Бласка ӕмӕ иннӕ фысджытӕ дӕр. Ам ахсджиаг хъуыддаг у банысан кӕнын: сфӕлдыстадон интеллигенцийы монон фӕтӕг уыдис Хетӕгкаты Леуаны фырт Къоста. Уый ныфсы мӕсыг канд ирон адӕмӕн нӕ уыд, фӕлӕ ма Цӕгат Кавказы иннӕ адӕмтӕ дӕр сӕ бӕллицтӕ бастой йӕ номимӕ. Адӕмтӕ дзы федтой, тас чи нӕ зоны ӕмӕ фау ӕрхӕссӕн кӕмӕ нӕй, ахӕм рыцары, бӕрзонд удварны принциптыл хӕст, лӕмӕгъдӕрӕн баххуыс кӕнынмӕ цӕттӕ адӕймаджы.

Уырыссаг зындгонд фыссӕг Александр Фадеев стыр аргъ кодта Хетӕгкаты Къостайӕн, хуыдта йӕ «ирон адӕмы Леонардо-да-Винчи». Чиныджы ис Къостайы тыххӕй йӕ раныхас «Ирон адӕмы диссаджы рыцар Хетӕгкаты Къоста». Уым афтӕ зӕгъы: «Къостайы ном, «чысыл» ирон адӕмы поэты ном, ӕппӕты бӕрзонддӕр нӕмтты ӕмрӕнхъ бацӕудзӕн культурӕйы хӕзнадонмӕ. Ирон адӕмӕн сӕ бон сӕрыстыр уӕвын у Къостайӕ, уымӕн ӕмӕ бирӕхуызджын хӕзнадоны тыбар-тыбур кӕндзысты, Къостайы хуызӕн нывгӕнӕг цардмӕ цы ахорӕнтӕ, цы хуызтӕ, цы хур рахаста, уыдон».

Цымыдисаг у, Николай Тихонов 1959 азы Мӕскуыйы Кремлы Хетӕгкаты Къостайы райгуырды 100 азы кадгӕнӕн ӕмбырды цы радзырдта, уый: «ӕнӕдызӕрдыгӕй Хетӕгкаты Къоста уыд йӕ рӕстӕджы тӕккӕ стырдӕр лӕг ӕмӕ курдиат. Уый бирӕ хорздзинӕдтӕ скодта ирон литературӕйы рӕзтӕн. Раст уыдзӕн, ирон литературӕйы бындурӕвӕрӕг, ирон литературон ӕвзаг саразӕг ӕй куы схоной, уӕд. Бирӕ уыд йӕ царды уӕззау фыдӕвзарӕнтӕ, мӕгуырдзинӕдтӕ, фӕдылзилӕнтӕ, тох йӕ адӕмы дӕлдзиныггӕнджытимӕ, фӕлӕ дзы цас арфдӕр цӕуыс, уыйас фылдӕр аргъ кӕныс уды рыцары сгуыхтдзинадӕн, афтӕ Генрих Гейне хуыдта, рӕстдзинадӕн йӕхи чи снывонд кодта, уыцы поэтты».

Чиныджы ис Абайты Васойы уац «Ирон адӕмон поэт Хетӕгкаты Къоста». Уым ахуыргонд фыссы: «Къостайы хуызӕн адӕймӕгты иумӕйагадӕймагон нысаниуӕг фидар баст у сӕ национ нысаниуӕгимӕ. Ӕмӕ йын ӕндӕрхуызон уӕвӕн дӕр нӕй. Цӕмӕй адӕмы хуыздӕр минӕвар суай, уый тыххӕй хъуамӕ уай сӕ хуыздӕр минӕвар. Платоны, Шекспиры, Гетейы, Пушкины иумӕйагадӕймагон нысаниуӕгӕн бындур уый у, ӕмӕ се сфӕлдыстады ӕххӕстӕй раргом грекъаг, англисаг, немыцаг, уырыссаг адӕмы удварны хъомыс. Афтӕ национы бӕрзӕнд свӕййы адӕймагон бӕрзӕнд дӕр. Ӕмӕ йӕ национ мидис тыхджын ӕмӕ рӕсугъд формӕтӕй равдисӕг Къоста дӕр уымӕн сси адӕймагады минӕвар. Адӕмы нымӕцӕн уым сӕрмагонд нысаниуӕг нӕй. Дзындз чысыл доны самал кӕнай ӕви стыр фурды, уӕддӕр дзындзӕй баззайы”.

Ӕмбырдгонды ис зындгонд поэт Алим Кешоковы уац дӕр «Звезда первой величины», ӕмӕ дзы ӕрхӕсдзынӕн иу скъуыддзаг: «Стыр поэт Хетӕгкаты Къоста ис фыццаг егъау стъалытимӕ. Уый у дард стъалыйы рухсы хуызӕн, стъалы йӕхӕдӕг нал ис, фӕлӕ ма йын адӕм уӕддӕр йӕ рухс уынынц, уый рухсмӕ цӕуынц сӕ фӕндагыл. Хоры хуым цас хор радта, уыцы цӕстӕй кӕсынц цӕугӕдонмӕ — йӕ цыд ӕмӕ йӕ арфмӕ гӕсгӕ, адӕммӕ — бӕстӕйы монон культурӕйы, экономикӕйы хӕзнадонмӕ йӕ бавӕрӕны тыххӕй. Ирыстон уыцы барӕнтӕй куы барай, уӕд Кавказы хохаг адӕмтӕм куыд у, афтӕ йӕ эпитет «чысыл»-ӕй барӕн нӕй, уымӕн ӕмӕ ирон адӕм стыр ӕвӕрӕн бахастой бӕстӕйы иумӕйаг хорздзинӕдты хӕзнадонмӕ. Уымӕ гӕсгӕ зӕххы цъары ӕппӕт литературӕты номӕй мӕ сӕрӕй ныллӕг кувын, егъау стъалы — Къостайы нын чи балӕвар кодта, уыцы ирон адӕмӕн».

Редакцион коллеги, историон наукӕты доктор, профессор Мӕхӕмӕтты Ахуырбег, профессор Тедтойты Зинӕ, историон наукӕты доктор, профессор Туаты Бертӕ цы арфӕйаг куыст бакодтой ацы чиныг саразыныл, уым ма ис Къостайы цард ӕмӕ сфӕлдыстады тыххӕй бирӕ ӕндӕр уацтӕ дӕр. Алы ӕрмӕгыл дӕр хицӕнӕй дзурыны фадат нӕй, фӕлӕ дзы ранымайӕн ис иуцалдӕр: Мӕхӕмӕтты Ахуырбеджы «Ирыстоны XIX ӕнусы райдайӕны, XX ӕнусы кӕроны историон, социалон-ӕхсӕнадон проблемӕтӕ Хетӕгкаты Къостайы сфӕлдыстады», Калоты Барисы «Рухсад ӕмӕ культурӕ», Ираклий Андрониковы «Стыр Къоста», Джыккайты Шамилы «Адӕймаджы идеал Хетӕгкаты Къостайы этикӕ ӕмӕ эстетикӕйы», Джусойты Нафийы «Хетӕгкаты Къоста — ӕппӕт рӕстӕджыты ӕмӕ адӕмты адӕймаг», Тедтойты Зинӕйы «Хетӕгкаты Къоста ӕмӕ литературӕ», Владимир Уваровы «Уырыссаг театры сценӕйы Къостайы пьесӕйы сӕвӕрды истори».

Чиныг наукон рауагъд у, фӕлӕ йӕ ӕхсызгонӕй бакӕсдзысты канд ахуыргӕндтӕ нӕ, фӕлӕ, Къостайы цард ӕмӕ сфӕлдыстад зынаргъ кӕмӕн сты, уыдон дӕр.

Абайты Эдуард

ОСТАВЬТЕ ОТВЕТ

Please enter your comment!
Please enter your name here