Спорты стыр бӕрӕгбон Дзӕуджыхъӕуы

0
17

Дыууӕ боны дӕргъы Хъуылаты Бадзийы номыл Спортивон галуаны къах бавӕрӕн нӕ уыди спортуарзджытӕй. 7-8 декабры райсомӕй суанг 21 сахатмӕ ам уӕгъдибар хъӕбысхӕстӕй цыдысты амӕй-ай цымыдисагдӕр фембӕлдтытӕ. Дунейы   21 бӕстӕйӕ Ирыстонмӕ цы 240 богалы ӕрбацыд, уыдон тох кодтой дунеон турнир «Алантӕ»-йы уӕлахиздзауы кадджын ном рамбулыныл.

Турнир «»Алантӕ» ӕртӕ азы размӕ арӕзт ӕрцыд нӕ республикӕйы Сӕргълӕууӕг Битарты Вячеславы хъӕппӕрисӕй. Уӕд йӕ фарсмӕ ӕрбалӕууыдысты нӕ зындгонд богӕлттӕ Фадзайты Арсен, Таймазты Артур, Уӕрӕсейы хъӕбысхӕсты федерацийы президент Михаил Мамиашвили, Уӕрӕсейы иугонд командӕйы сӕйраг тренер Тедеты Дзамболат ӕмӕ сӕ иумӕйаг архайдӕй хъуыддаг арӕзт ӕрцыд.

Ацы аз турнир цыди ӕртыккаг хатт, ӕмӕ фидарӕй зӕгъӕн ис, йӕ ахадындзинад азӕй-азмӕ тыхджындӕр кӕй кӕны, уый. Турнир хаст ӕрцыд Дунеон хъӕбысхӕсты иугонды хыгъдмӕ ӕмӕ уыдзӕн рейтингон, ома, ам йӕхи хъомысджынӕй чи равдиса, уымӕн лӕвӕрд цӕудзӕн дунейы чемпионаттӕ ӕмӕ Олимпаг хъӕзтытӕм бахауыны хыгъдмӕ рейтингон баллтӕ. Кӕй зӕгъын ӕй хъӕуы, ахӕм турнир аразын у стыр бӕрнон хъуыддаг ӕмӕ нӕ республикӕйӕ домы алцыдӕр дунеон фӕткы домӕнтӕм гӕсгӕ аразын.

Нӕ уазджытӕй бирӕтӕ куыд зӕгъынц, уымӕ гӕсгӕ турнир аразджытӕ сӕ            домӕнтӕ ӕвзӕр не ‘ххӕст кӕнынц. Хъӕбысхӕсты дунеон иугонды делегат Карол Левковскийы зӕрдӕмӕ тынг фӕцыд, турнир куыд арӕзт ӕрцыд, уый. Нӕ польшӕйаг уазӕджы зӕрдӕмӕ уӕлдай тынгдӕр фӕцыди, спортуарзджытӕ богӕлттӕм куыд зӕрдиагӕй кастысты ӕмӕ сын сӕ архайдыл куыд цин кодтой, уый. «Уе спортуарзджытӕ хъӕбысхӕсты алы фӕзилӕнтӕ дӕр куыд зонынц, уый зыны, богӕлтты архайдӕн куыд аргъ кӕнынц, уымӕй. Залы чи бады, уыдон цыма иууылдӕр сӕхӕдӕг хъӕбысӕйхӕцджытӕ сты, афтӕ зонынц, ерысты фӕтк», — загъта Карол Левковски.

Ерыстӕ гом кӕнгӕйӕ, Ирыстоны уазджытӕн, спортуарзджытӕн ӕмӕ ерысты архайджытӕн зӕрдиаг арфӕтӕ ракодтой РЦИ-Аланийы Сӕргълӕууӕг Битарты Вячеслав ӕмӕ Республикӕ Хуссар Ирыстоны Президент Бибылты Анатоли.

Битарты Вячеслав РЦИ-Аланийы паддзахадон хӕрзиуджытӕй схорзӕхджын кодта: Тедеты Дзамболаты (орден «Ирыстоны Намыс»-ӕй, Михаил Мамиашвилийы (майдан «Ирыстоны намысӕн»-ӕй).

Ноджы ма Цӕгат Ирыстоны паддзахадон грамотӕтӕй хорзӕхджын систы нӕ уазджытӕ: Магомед Ахмадов, Еленӕ Бибикова, Алексей Майоров, Сергей Меликов, Вячеслав Ноговицын, Давид Гобеджишвили.

Бибылты Анатоли дӕр Хуссар Ирыстоны паддзахадон хӕрзиуӕг «Хӕлардзинады орден»-ӕй схорзӕхджын кодта Уӕрӕсейы Паддзахадон Думӕйы депутаттӕ Алексей Майоров ӕмӕ Омар Муртузалиевы.

Турнирмӕ арфӕйы фыстӕг сӕрвыста Уӕрӕсейы Федералон ӕмбырды сӕрдар Валентинӕ Матвиенко.

Зӕрдиаг арфӕ ракодта Битарты Вячеслав ӕмӕ залы адӕмӕн Михаил Мамиашвили: «ӕз мӕхи амондджыныл нымайын, ахӕм зынаргъ хӕрзиуӕг мын мӕ уарзон Ирыстоны кӕй саккаг кодтой, уый тыххӕй. Дарддӕр дӕр ӕххуыс кӕндзынӕн, нӕ уарзон спорты пайдайӕн Ирыстоны цы хъӕугӕ хъуыддӕгтӕ арӕзт цӕуа, уыдон саразынӕн».

Бӕрӕгбон сӕ аивадӕй срӕсугъд кодтой Ирыстоны аивадон ансамбл «Дзӕуджыхъӕуккаг алантӕ», «Хӕхты сывӕллӕттӕ», «Ирон героикон зарджыты къорд, паддзахадон ансамбл «Алантӕ» ӕмӕ нӕ зындгонд зарӕггӕнӕг Тайсауты Олег.

Ерыстӕ куыд цымыдисаг рауадысты, ууыл дзурӕг уыди, залы спортуарзджытӕн бынӕттӕ лӕууынӕн дӕр кӕй нӕ фаг кодта, уый. Бирӕтӕн мидӕмӕ бацӕуынын фадат дӕр нал уыд ӕмӕ уынджы лӕугӕйӕ баззадысты сӕдӕгай адӕймӕгтӕ.

Богӕлттӕ цы дӕс уӕзы хӕцыдысты, уыдон се ‘ппӕт дӕр гауызмӕ рацыдысты фыццаг бон ӕмӕ изӕры 21 сахатмӕ сбӕрӕг кодтой дыккаг бон ӕрдӕгкӕронбӕттӕны цы цыппӕргай богӕлттӕ хӕцдзысты, уыдон.

8 декабры ерыстӕ райдыдтой райсомы 10 сахатыл ӕмӕ ӕппӕт фембӕлдтытӕ дӕр уыдысты амӕй-ай хъазуатондӕр. 57 кг онг уӕзы кӕронбӕттӕнмӕ рацыдысты уӕрӕсейаг Ахмед Идрисов ӕмӕ монгойлаг Ерденбат Бехбайар. Сӕ фембӕлд ахицӕн 5:2 хыгъдӕй Ахмед Идрисовы пайдайӕн. Ацы уӕзы 3-аг бынӕттӕ бацахстой ирон богӕлттӕ Тускъаты Азӕмӕт ӕмӕ Сабанты Алыксандр.

61 кг онг уӕзы цыппар хӕрзиуӕджы дӕр рамбылдтой дагестайнаг богӕлттӕ: 1-аг Рамазан Ферзалиев, 2-аг Абасгадджи Магомедов, 3-аг бынӕттӕм та рацыдысты Зелимхан Абакаров ӕмӕ Шамил Омаров.

65 кг онг уӕзы ирыстойнаг спортуарзджыты зӕрдӕтӕ барухс кодта 2016 азы Олимпаг хъӕзтыты уӕлахиздзау ӕмӕ дунейы чемпион Рӕмонты Сослан. Нӕ зындгонд богалӕн, дзӕвгар рӕстӕг йӕ цӕфтӕ кӕй дзӕбӕх кодта, уый аххосӕй йе ‘ппӕт гӕнӕнтӕй спайда кӕнын йӕ къухы нал ӕфтыд. Ныр «Аланты» турниры куыд рахӕцыд, уымӕй ныфс бауагъта йӕ иузӕрдион фарсхӕцджыты зӕрдӕты, иннӕ аз ын ноджы ӕнтыстджындӕр кӕй рауайдзӕн, уымӕй. Кӕронбӕттӕны Сослан 3:0 хыгъдӕй рамбылдта тыхджын ныхмӕлӕууӕг Курбан Шираевӕй ӕмӕ бацахста 1-аг бынат. Ацы уӕзы 3-аг бынӕттӕм рацыдысты Сейун Кузурук (Уӕрӕсе) ӕмӕ Сираюдин Хасанов (Узбекистан). Рӕмонты Сосланы ерыстӕм бацӕттӕ кодта Уӕрӕсейы сгуыхт тренер Мӕргъиты Анатоли.

Ирон богӕлттӕ фесгуыхтысты 70 ӕмӕ 74 кг онг уӕзы дӕр. Тынг сӕрӕн хӕст ракодтой 70 кг онг уӕзы Дзукъаты Кахабер ӕмӕ Уалыты Чермен. Йӕ цыппар ныхмӕлӕууӕгӕй дӕр куы рамбылдта, уӕд кӕронбӕттӕны фембӕлд дагестайнаг богал Рамазан Рамазановимӕ. Сӕ хъазуатон ныхмӕлӕуд ахицӕн Чермены пайдайӕн 4:2 хыгъдӕй ӕмӕ Уалыйы-фырт ссис турниры уӕлахиздзау. 3-аг бынӕттӕм та рацыдысты Евгений Щербаев ӕмӕ Руслан Богатырев (Уӕрӕсейӕ).

Тынг цымыдисаг ӕмӕ хъазуатон тохтӕ цыди 74 кг онг уӕзы хӕцӕг богӕлтты ‘хсӕн дӕр. Ацы уӕзы дунейы чемпион Цӕболты Хетӕг ӕмӕ АИШ-ы чемпион Джеймс Грин сӕ фӕйнӕ цыппар ныхмӕлӕууӕгӕй куы рамбылдтой, уӕд кӕронбӕттӕны фембӕлдысты 1-аг бынат бацахсыныл тохы. Америкаг богал тынг фидарӕй бӕргӕ фӕлӕууыд Цӕболы-фырты ныхмӕ, фӕлӕ сӕ тох ахицӕн 7:4 хыгъдӕй Хетӕджы пайдайӕн. Сӕ уӕзы 3-аг бынӕттӕ бацахстой уӕрӕсейаг богӕлттӕ Гаджимурат Алихмаев ӕмӕ Тимур Бижоев. 79 кг онг уӕзы 1-аг бынатыл кӕронбӕттӕны ерысы бацыдысты Хуыбецты Кахабер ӕмӕ Халил Аминов. Ацы ныхмӕлӕуды дыууӕ ӕмдых богалӕй йӕ хал схауд Аминовӕн. Сӕ фембӕлд ахицӕн 8:6 хыгъдӕй йӕ пайдайӕн. Хуыбецты Кахабер бацахста 2-аг бынат. Нӕ иннӕ богал Уалыты Радик ӕмӕ Ахмед Усманов та бацахстой 3-аг бынӕттӕ.

86 кг онг уӕзы 1-2 бынӕттӕ бацахстой ирон богӕлттӕ Кцойты Сослан (Уӕрӕсе) ӕмӕ Рубайты Георги (Молдова). Сӕ дыууӕ дӕр кӕронбӕттӕны размӕ тынг сӕрӕн хӕст ракодтой сӕ ныхмӕлӕуджытимӕ, ӕмӕ сӕ куы рамбылдтой, уӕд фембӕлдысты 1-аг бынатыл тохы.

Рубайты Георги уӕндонӕй атындзыдта размӕ, фӕлӕ Кцойты Сослан тынг къӕрцхъус фӕлӕууыд ӕмӕ йӕхӕдӕг хорз спайда кодта Георгийы рӕдыдтытӕй. Сӕ фембӕлд ахицӕн Сосланы пайдайӕн ӕмӕ уый ссис турнир «Алантӕ»-йы уӕлахиздзау, Рубайты Георги та бацахста 2-аг бынат. Сӕ уӕзы 3-аг бынӕттӕм рацыдысты Уалыты Владислав ӕмӕ Магомедшариф Биакаев (дыууӕ дӕр Уӕрӕсейӕ).

Тынг цымыдисаг тохтӕ цыди 92 кг онг уӕзы. Цӕкулаты Батырбег рамбылдта цыппар ныхмӕлӕууӕгӕй, фӕлӕ ӕрдӕгкӕронбӕттӕны ирайнаг богал Мохаммад Ебрахимидзивлайӕн кӕй фӕхӕрд, уый аххосӕй ма йын уыд 3-аг бынатыл тох кӕныны гӕнӕн. Батырбег ӕмӕ Анзор Уришев бацахстой 3-аг бынӕттӕ. 1-2 бынӕттӕ та бацахстой Магомед Курбанов (Уӕрӕсе) ӕмӕ Мохаммад Ебрахимидзивлаи.

Ацы ран диссаджы амондджын рауад Магомед Курбанов. Суанг фӕстаг секунды онг разӕй цыд ирайнаг богал, фӕлӕ ма фембӕлды кӕронмӕ 2 секунды куы баззад, уӕд Курбановӕн бантыст йӕ ныхмӕлӕууӕгӕй 2 баллы рамбулын ӕмӕ 1-аг бынат бацахсын.

Спортуарзджытӕ тынг цымыдисӕй ӕнхъӕлмӕ кастысты, 97 кг онг уӕзы кӕронбӕттӕны чи хӕцыд, уыцы богӕлтты рацыдмӕ. Уыдон та уыдысты америкаг богал, Олимпаг хъӕзтыты уӕлахиздзау ӕмӕ дунейы дыууӕ хатты чемпион Кайл Снайдер ӕмӕ Уӕрӕсейы спорты сгуыхт мастер Байцаты Владислав. Сӕ ныхмӕлӕуд ахицӕн Снайдеры пайдайӕн 5:2 хыгъдӕй. Ӕрдӕгуӕззау уӕзы 3-аг бынӕттӕм рацыдысты Елизбар Одикадзе (Гуырдзыстон) ӕмӕ Александр Гуштын (Беларусь).

Ерысты кӕрон сбӕрӕг уӕззау уӕзы (125 кг) уӕлахиздзау. Ацы уӕзы цы ссӕдз богалы хӕцыди, уыдонӕй кӕронбӕттӕнмӕ рацыдысты Гӕззаты Батрадз ӕмӕ бурятаг богал Балдан Цыжипов. Уымӕй размӕ сӕ дыууӕ дӕр равдыстой хорз цӕттӕдзинад ӕмӕ ӕнӕдызӕрдыгӕй фӕуӕлахиз сты сӕ ныхмӕлӕуджытыл. Уыдоны ‘хсӕн та уыдысты тыхджын богӕлттӕ, куыд Уӕрӕсейӕ, афтӕ АИШ-ӕй, Иран ӕмӕ ӕндӕр бӕстӕтӕй.

Гӕззайы-фырт кӕронбӕттӕны тохы дӕр равдыста уӕлахизмӕ стыр тырнындзинад ӕмӕ йӕ ныхмӕлӕууӕгӕй рамбылдта 10:0 хыгъдӕй. Афтӕмӕй, Батрадз ерыстӕн скодта рӕсугъд кӕронбӕттӕн. Уӕззау уӕзы 3-аг бынӕттӕм рацыдысты Амир Хусейн Заре (Иран) ӕмӕ Магомедгаджи Нурасулов (Уӕрӕсе).

Уӕлахиздзаутӕ ӕмӕ призон бынӕттӕ бацахсджытӕн лӕвӕрд ӕрцыд майдантӕ, грамотӕтӕ ӕмӕ ӕхцайы лӕвӕрттӕ.

Ерыстӕ куыд ацыдысты, уымӕй разыйӕ баззадысты спортуарзджытӕ ӕмӕ хъӕбысхӕсты спорты кусджытӕ.

Ӕнӕмӕнг турнир «Алантӕ» у стыр фӕзынд Ирыстоны спортивон царды ӕмӕ дарддӕр дӕр не спортуарзджытӕн ӕхсызгондзинад кӕй хӕсдзӕн, уый гуырысхойаг нӕу.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here