Ӕгкацаты ӕфсымӕртӕ рамбылдтой ӕртӕ хӕрзиуӕджы

0
40

Ӕвзонг шахматисттӕ Ӕгкацаты цыппар ӕфсымӕры Ирыстоны кад хъахъхъӕдтой Цӕгат Кавказы федералон зылды фыццаг бынат бацахсыныл ерысты.

Хъӕрӕсе-Черкессийы республикӕйы горӕт Тебердамӕ Цӕгат Кавказы ӕппӕт регионтӕй цы ӕрыгон чызджытӕ ӕмӕ лӕппутӕ ӕрбацыдысты, уыдонимӕ ерысы сӕхи тынг хъомысджынӕй равдыстой тренер Сергей Мкртчяны хъомылгӕнинӕгтӕ Ӕгкацаты Феликс, Альберт, Артур ӕмӕ Давид.

Сӕ кармӕ гӕсгӕ шахматисттӕ дихгонд уыдысты цыппар къордыл: 9,13,15 ӕмӕ 17-аздзыдтӕ ерыс кодтой хицӕнтӕй. Сӕ фӕндонмӕ гӕсгӕ кӕстӕртӕн бар уыдис сӕхицӕй хистӕртимӕ ерыс кӕнынӕн. Уыцы бартӕй спайда кодта ӕфсымӕрты хистӕр, 2008 азы гуырд Феликс. Уый фыццаг ерысы бацыд 13-аздзыд шахматисттимӕ ӕмӕ бацахста 2-аг бынат. Уый фӕстӕ ерыс кодта 15-аздзыдты къорды, ӕмӕ та ам дӕр ӕнӕ хӕрзиуӕг нӕ баззад. Кӕд йӕ фылдӕр ныхмӕлӕуджытӕй 3-4 азы кӕстӕр уыд, уӕддӕр бацахста 3-аг бынат.

6-аздзыд ӕгкацаты Артур ерыс кодта 9-аздзыдтимӕ ӕмӕ бацахста 1-аг бынат. Ацы кары ма ерысты архайдта йӕ 7-аздзыд ӕфсымӕр Давид дӕр. Уый кӕд призон бынатмӕ не схызт, уӕддӕр йӕхи равдыста хъомысджынӕй ӕмӕ рацыд 7-8 бынатмӕ.

Уӕлдай сӕрӕндӕр хъазт акодта 10-аздзыд ӕгкацаты Альберт. Уый ерыс кодта, 17 азы онг кӕуыл цыди, уыцы шахматисттимӕ ӕмӕ рацыд 1-аг бынатмӕ.

Нӕ бон фидарӕй зӕгъын у: шахмӕттӕй нӕм рӕзы диссаджы курдиатджын кӕстӕртӕ. Ӕгкацаты ӕфсымӕртӕй уӕлдай ма нӕм ис, ныридӕгӕн хорз бӕрӕггӕнӕнтӕ чи ӕвдисы, ахӕм цалдӕр лӕппу ӕмӕ чызджы.

Уырны нӕ, тагъд рӕстӕджы нӕм спорты ацы хуызӕй дӕр гроссмейстертӕ кӕй фӕзындзӕн, уый.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here