Цӕгат Ирыстон — Севастополь: ӕнгомдӕр бастдзинӕдтӕ

0
14

Хъырымы ӕрдӕгсакъадахы кусӕг балцы уӕвгӕйӕ, Цӕгат Ирыстоны Сӕргълӕууӕг Битарты Вячеславӕн фембӕлд уыд Севастополы Губернаторы хӕстӕ рӕстӕгмӕ ӕххӕстгӕнӕг Михаил Развожаевимӕ.

Зындгонд куыд у, афтӕмӕй 2016 азы дыууӕ уӕрӕсейаг регионы бафыстой Базарадон-экономикон, наукон-техникон, социалон ӕмӕ культурон ӕмгуыстады фӕдыл бадзырд. Ӕмӕ ныр регионты разамонджытӕ ногӕй бӕстон ӕрныхас кодтой уыцы бадзырды уагӕвӕрдтӕ царды рауадзыныл, стӕй ӕмархайды пълантӕм ногдзинӕдтӕ бахӕссыныл.

Фембӕлды архайджытӕ куыд фӕнысан кодтой, афтӕмӕй ӕрӕджы горӕт Севастополы Цӕгат Ирыстоны хъӕбул, Советон Цӕдисы Хъӕбатыр Къесаты Астаны номыл сквер кӕй байгом, уыцы ӕууӕл ма иу ӕвдисӕн у, дыууӕ регионы ‘хсӕн ӕнгом ӕмӕ хӕлар ахастдзинӕдтӕн фидар бындур кӕй ис, уымӕн.

— Ныфс мӕ ис, ӕмгуыстады бадзырды ӕппӕт уагӕвӕрдтӕ дӕр кӕй сӕххӕст кӕндзыстӕм, уымӕй. Цӕгат Ирыстоны цӕрджыты номӕй севастопойлӕгтӕн бузныг зӕгъын, нӕ хъӕбатыр ӕмзӕххон Къесаты Астаны рухс ном сын табуйаг кӕй у, уый фӕдыл. Къесайы-фырты ном горӕты скъолатӕй иуӕн лӕвӕрд кӕй ӕрцыд, стӕй йӕ номыл уынг дӕр кӕй ис, уыцы хабӕрттӕ дӕр нын хорз зындгонд сты, — фӕнысан кодта Битарты Вячеслав.

Михаил Развожаев куыд загъта, афтӕмӕй дыууӕ регионы ӕмархайд фӕхъомысджындӕр кӕнынӕн хорз фадӕттӕ ис, уӕлдайдӕр та экономикӕйы, социалон къабаз ӕмӕ культурӕйы.

Битарты Вячеславы ныхасмӕ гӕсгӕ, ныронг Михаил Развожаев уыд Цӕгат Кавказы хъуыддӕгты фӕдыл министры хӕдивӕг ӕмӕ, уыцы бынаты кусгӕйӕ, стыр ӕргом здӕхта Цӕгат Ирыстоны социалон-экономикон райрӕзты фарстытӕм. Ныр та ӕнгом ӕмӕ пайдайаг ахастдзинӕдтӕ рӕзынц дыууӕ уӕрӕсейаг регионы ‘хсӕн.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here