Къесаты Астаны номыл сквер — Севастополы

0
44

Нӕ газеткӕсджытӕ куыд зонынц, афтӕмӕй ацы бонты Битарты Вячеславы разамындӕй Цӕгат Ирыстоны официалон делегаци балцы уыд Хъырымы ӕрдӕгсакъадахы. Севастополы нӕ республикӕйы минӕвӕрттӕ цы мадзӕлтты архайдтой, уыдонӕн, ӕвӕццӕгӕн, сӕ сӕйрагдӕр уыд не ‘мзӕххон, Советон Цӕдисы Хъӕбатыр Къесаты Астаны номыл сквер байгом кӕныны фӕдыл кадджын ӕмбырд.

Цӕгат Ирыстонӕй уыцы фембӕлды архайдтой республикӕйы культурӕйы министр Къубалты Эльбрус, Ветеранты советы сӕрдар Къаболаты Солтан, ӕндӕр кадджын уазджытӕ.

Битарты Вячеслав Севастополы разамынд ӕмӕ цӕрджытӕн арфӕ ракодта, Советон Цӕдисы Хъӕбатыр Къесаты Астаны рухс номӕн кад кӕй кӕнынц, уый тыххӕй. «Фыдыбӕстӕйы Стыр хӕсты рӕстӕг Цӕгат Ирыстоны хъӕбултӕй 79 систы Советон Цӕдисы Хъӕбатыртӕ. Уыдонӕй иу — Къесаты Астан. Уый йӕ хӕстон хъӕбатырдзинадӕй ӕнусон ном скодта йӕхицӕн», — фӕнысан кодта Битары-фырт.

Севастополы Губернаторы хӕстӕ рӕстӕгмӕ ӕххӕстгӕнӕг Михаил Развожаев йӕ раныхасы куыд фӕбӕрӕг кодта, афтӕмӕй Къесаты Астан алкӕддӕр уыдзӕн ӕцӕг лӕг ӕмӕ хъӕбатыр хӕстоны дӕнцӕг. «9 декабры сбӕрӕг кодтам Фыдыбӕстӕйы Хъӕбатырты бон. Ӕмӕ ныр дӕр кад кӕнӕм уыдонӕй иуӕн. Къесаты Астаны цардвӕндаг ӕмӕ йӕ хӕстон хъӕбатырдзинад ӕрыгон фӕлтӕртӕн алкӕддӕр дӕнцӕг кӕй уыдзысты, ууыл дызӕрдыг нӕ кӕнын», — загъта Губернатор.

Уый фӕстӕ кадджын ӕмбырды архайджытӕ байгом кодтой сквер ӕмӕ Къесаты Астаны номарӕн дур.

Номарӕн ӕмбырды архайдтой горӕты Хицауад ӕмӕ ӕхсӕнадон организациты минӕвӕрттӕ. Уым уыд хъӕбатыры чызг — Къесаты Ларисӕ дӕр.

Чысыл раздӕр та фысымтӕ ӕмӕ уазджытӕ дидинджытӕ сӕвӕрдтой хъӕбатыры ингӕныл Коммунарты уӕлмӕрды.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here