Тох цӕудзӕн дунейы чемпионы роныл

0
23

Райсом, 13 декабры, Дзӕуджыхъӕуы Хъуылаты Бадзийы номыл Спортивон галуаны («Манеж»-ы) Ирыстоны спортуарзджытӕ ӕвдисӕн уыдзысты профессионалон боксы стыр ерыстӕн. Сӕйрагдӕр уыдзӕн дунеон, профессионалон боксы WBA-йы ассоциацийы чемпионы рон рамбулыныл тох.

Уыцы тохы фембӕлдзысты уӕрӕсейаг боксер Федор Чудинов ӕмӕ ацы ассоциацийы астӕуккаг уӕзы дунейы чемпионы ном чи хаста, уыцы францаг боксер Хасан Ндан Нжикам.

Федор Чудинов йӕ уӕзы уыди Уӕрӕсейы чемпион. Ныр афӕдзы бӕрц йӕхи цӕттӕ кӕны Дзӕуджыхъӕуы, нӕ зындгонд тренер Сланты Виталийы разамындӕй. Федор Чудинов дӕр уыди уӕлахиздзау WBA-йы фӕлгӕты арӕзт дунеон ерысты. Сланты Витали куыд зӕгъы, афтӕмӕй Федоры ныхмӕлӕууӕг у тынг тыхджын боксер, ӕмӕ сӕ тохы чи фӕразӕй уыдзӕн, уый зын зӕгъӕн у. Боксы изӕры спортуарзджытӕ фендзысты дӕс тохы. Уыдонӕй цалдӕр уыдзысты рейтингон тохтӕ ӕмӕ дзы архайдзысты Уӕрӕсе ӕмӕ фӕсарӕйнаг боксертӕ.

Ирыстонмӕ Уӕрӕсе ӕмӕ фӕсарӕнтӕй ӕрбацӕудзысты бирӕ уазджытӕ. Ахӕм бӕрнон ерыстӕ цӕмӕй ӕмбӕлгӕ уавӕрты ацӕуой, уый тыххӕй арӕзт ӕрцыд сӕрмагонд къамис. Йӕ сӕргъы РЦИ-Аланийы Парламенты Сӕрдары хӕдивӕг Кучиты Гари, афтӕмӕй къамисы уӕнгтӕ сӕ ӕмбырды лӕмбынӕг ӕрныхас кодтой, боксы изӕры ерыстӕ цӕмӕй ӕнӕкъуылымпыйӕ ацӕуой, уыимӕ баст фарстытыл.

Кучиты Гари къамисы ӕмбырдмӕ ӕрбахуыдта РЦИ-Аланийы культурӕйы министр Къубалты Эльбрусы, Мидхъуыддӕгты, ӕнӕнхъӕлӕджы уавӕрты, ӕнӕниздзинад хъахъхъӕнынады, Физикон культурӕ ӕмӕ спорты министрадты бӕрнон кусджыты. Уыдонӕй алкӕмӕн дӕр лӕвӕрд ӕрцыд сӕрмагонд хӕстӕ.

Къамисы уӕнгтӕй алчидӕр радзырдта, куыд ӕмӕ цавӕр гӕнӕнтӕй спайда кӕндзысты сӕ размӕвӕрд хӕстӕ сӕххӕст кӕныныл.

«Нӕ сӕйраг хӕс у, ахӕм дунеон ерыстӕн цы ӕмбӕлы, ахӕм ӕппӕт уавӕртӕ дӕр саразын. Ахӕм хъуыддаджы та лыстӕг фарстытӕ нӕй. Уымӕ гӕсгӕ нӕ алкӕй дӕр бацархайын хъӕуы, цӕмӕй нӕ бирӕ уазджытӕ ӕмӕ спортуарзджытӕ разыйӕ баззайой. Уырны мӕ, иууылдӕр зӕрдиагӕй кӕй бацархайдзыстӕм, ӕмӕ та ацы хатт дӕр кӕй сарӕхсдзыстӕм нӕ бӕрнон хӕс рӕсугъдӕй сӕххӕст кӕнынмӕ», — загъта Кучиты Гари.

Баскаты Уырызмӕг

ОСТАВЬТЕ ОТВЕТ

Please enter your comment!
Please enter your name here