Цӕгат Ирыстон — Хъырым: ӕнгом ӕмгуыстадӕн ис хорз фадӕттӕ

0
16

Хъырыммӕ кусӕг балцы рӕстӕг Цӕгат Ирыстоны Сӕргълӕууӕг Битарты Вячеславӕн фембӕлд уыд республикӕйы Сӕргълӕууӕг Сергей Аксеновимӕ. Дыууӕ регионы разамонӕджы ӕрдзырдтой ӕмгуыстады фарстытыл.

Битары-фырт йӕ раныхасы куыд фӕнысан кодта, афтӕмӕй Цӕгат Ирыстон ӕмӕ Хъырым рагӕй ӕнгом баст сты историон, экономикон ӕмӕ культурон тӕгтӕй.

— Фыццаджы-фыццагдӕр мӕ фӕнды бузныг зӕгъын, Ирыстоны минӕвӕртты хорз кӕй суазӕг кодтат, уый тыххӕй. Ӕхсызгон нын у, нӕ дыууӕ республикӕйы ‘хсӕн ӕмархайды фарстытӕм цӕттӕдзинад кӕй ӕвдисут, уый. Фондз азы размӕ Хъырым ногӕй «раздӕхт» йӕ историон Фыдыбӕстӕ — Уӕрӕсемӕ. Фондз азы размӕ цы историон цаутӕ ӕрцыд, уыдон нӕ республикӕйы цӕрджытӕ хорз сӕ зӕрдыл дарынц. Уӕдӕй нырмӕ лӕмбынӕг нӕ цӕст дарӕм, Хъырымы республикӕйы царды цы фӕрныг ивддзинӕдтӕ цӕуы, уыдонмӕ, — загъта Битарты Вячеслав.

Сергей Аксенов уӕлдай ахсджиагыл банымадта, Цӕгат Ирыстоны делегаци Хъырыммӕ официалон уагӕй фыццаг хатт кӕй ссыд, уыцы ӕууӕл. Йӕ ныхасмӕ гӕсгӕ, Ирыстоны минӕвӕрттимӕ йын рагон ӕмӕ хӕлар ахастдзинӕдтӕ ис, арӕх семӕ фембӕлы алыхуызон мадзӕлтты рӕстӕг, фӕлӕ комкоммӕ ныхас дыууӕ регионы минӕвӕртты ‘хсӕн уӕлдай хуыздӕр фадӕттӕ аразы дарддӕры ӕмгуыстады нысантыл бӕстондӕр ӕрдзурынӕн.

— Нӕ дыууӕ регионы ‘хсӕн хӕлар ахастдзинӕдтӕн бындур ӕвӕрд ӕрцыд 2014 азы. Уыимӕ, мах фӕнды, цӕмӕй нӕ экономикон, социалон ӕмӕ культурон бастдзинӕдтӕ уой ноджы ӕнгомдӕр, — бафиппайдта Хъырымы республикӕйы Сӕргълӕууӕг.

Фембӕлды архайджытӕ дарддӕр ӕрдзырдтой бирӕ ахсджиаг фарстытыл. Уыдоны нымӕцы: Хъырымы ирон ӕхсӕнады архайд, дыууӕ регионы ‘хсӕн уӕлдӕфон бастдзинад, туризм ӕмӕ ӕнӕниздзинад хъахъхъӕнынады къабӕзты иумӕйаг проекттӕ…

Хъырымы Хицауады хӕдзары фембӕлдтыты фӕстӕ фысымтӕ ӕмӕ уазджытӕ сӕ фӕндаг акодтой Симферополы паддзахадон академион музыкалон театрмӕ. Уым ацы бонты цӕуы Цӕгат Ирыстоны нывгӕнджытӕ ӕмӕ адӕмон ӕрмдӕсныты куыстыты равдыст. Равдыстӕй уӕлдай, Хъырымы цӕрджытӕн фадат уыд Адӕмон кӕфтыты паддзахадон ансамбл «Алан»-ы аивадимӕ базонгӕ уӕвынӕн.

Цӕгат Ирыстоны делегацийы уыдысты: республикӕйы культурӕйы министр Къубалты Эльбрус, РЦИ-Аланийы Ветеранты советы сӕрдар Къаболаты Солтан ӕмӕ Дзӕуджыхъӕуы нывгӕнынады училищӕйы директор Фидараты Фидар.

РЦИ-Аланийы Сӕргълӕууӕджы ӕмӕ Хицауады пресс-службӕ

ОСТАВЬТЕ ОТВЕТ

Please enter your comment!
Please enter your name here