Культурӕ — нӕ уд хъӕздыггӕнӕг

0
44

Фӕстаг цалдӕр азы нӕ бӕстӕйы аивад ӕмӕ культурӕйы фарстытӕм  фылдӕр ӕргом здӕхт цӕуы. Нӕ республикӕйы дӕр бирӕ мадзӕлттӕ аразынц йӕ рӕзтӕн. Цӕгат Ирыстоны рӕзты агентады арӕзт ӕрцыд  программӕ. Цы нысантӕ дзы амынд ис, ӕмӕ царды куыд уагъд цӕуынц, уый тыххӕй у нӕ ныхас программӕйы разамонӕг, аивадиртасӕг Атайты Мӕдинӕимӕ:

— Мӕдинӕ, ныридӕгӕн уӕ къухы цы саразын бафтыд нӕ республикӕйы культурӕйы рӕзты хъуыддаджы?

— Хорз хабарыл банымайӕн ис, нӕ бӕстӕйы ӕмӕ нӕ республикӕйы культурӕмӕ хорз ӕргом здӕхт кӕй цӕуы, уый. Сусӕггаг нӕу, фӕстаг рӕстӕг аивад ӕмӕ культурӕйы рӕзты фарстытӕм нӕ паддзахад фаг ӕргом не здӕхта. Фӕлӕ уавӕр ныр хуыздӕр кӕнын райдыдта. Зӕгъӕм, 2014 аз Владимир Путины указӕй нӕ бӕстӕйы нымад ӕрцыд Культурӕйы азыл, уый фӕстӕ сбӕрӕг кодтам Литературӕйы, Кинойы азтӕ. Ныртӕккӕ та у Театры аз. Ацы традици ис йӕ рӕзты фӕндагыл. Уый у ӕнӕмӕнг раппӕлинаг хъуыддаг. Уымӕн ӕмӕ бӕстӕйы адӕмӕн цӕрӕн нӕй ӕнӕ аивад ӕмӕ культурӕйы рӕзтӕй. Ирыстоны адӕмӕн та культурӕ у сӕ иууыл ахсджиагдӕр сӕ царды. Ирон адӕм кӕддӕриддӕр уыдысты курдиатджын. Уымӕн ӕвдисӕн сты, нӕ аивады ӕмӕ культурӕйы нӕм цал ӕмӕ цал зындгонд архайӕджы уыд ӕмӕ ис, уыдон. Фӕлӕ рӕстӕг цӕуы, ӕмӕ ацы къабазы дӕсгай азты цы зындгонд адӕм фӕкуыста, уыдон сӕ кары бацыдысты. Уымӕ гӕсгӕ, махӕн нӕ хӕс у нӕ республикӕйы культурӕйы рӕзты бӕлвырд нысантӕ сбӕрӕг кӕнын. Ацы фарстытӕм ӕргом аздахыны хӕс нын нӕ размӕ сӕвӕрдта нӕ республикӕйы Сӕргълӕууӕг Битарты Вячеслав. Культурӕйы рӕзтӕн цы сӕрмагонд программӕ сарӕзтам, уым сӕйрагдӕр ӕргом аздӕхтам  ахуырады фарстытӕм. Аивады алы къабӕзты йӕ зонд, йӕ курдиат бахсидынмӕ чи хъавы, йӕ цард уымӕн снывонд кӕнын кӕй зӕрды ис, уыцы кӕстӕртӕн фӕндаг дӕттын, сӕ курдиаты рӕзтӕн сын алывӕрсыг уавӕртӕ аразын нымайӕм иууыл ахсджиагдӕрыл. Раздӕр азты традицитыл ӕнцайгӕйӕ, материалон хуызы культурӕйы архайджытӕн ӕххуыс кӕнын нымайӕм нӕ сӕйрагдӕр хӕсыл. Фыццаджыдӕр, курдиатджын сывӕллӕтты бӕрӕг кӕнын ӕмӕ сын сӕ ахуырадон, сфӕлдыстадон рӕзтӕн фадӕттӕ аразын. Ныртӕккӕ куыст цӕуы ахӕм программӕ царды рауадзыныл. Уымӕ гӕсгӕ, цы мониторинг сарӕзтам, уый фӕрцы сбӕрӕг кодтам, нӕ республикӕйы хъӕуты ӕмӕ горӕтты цы аивадон ӕмӕ музыкалон скъолатӕ ис, уыдон. Иу хъуыддаг у сӕ уавӕр сын теоретикон ӕгъдауӕй зонын, иннӕмӕй та сын сӕ куысты уавӕртӕ хи цӕстӕй фенын. Нӕ амонд у, йӕ рӕстӕджы уыдон арӕзт кӕй ӕрцыдысты дӕсны специалистты фӕрцы, уый.

Советон цардарӕзты фӕстӕ скъолаты материалон-техникон базӕйӕн йӕ 86% проценты у ивинаг. Нӕхи цӕстытӕй йӕ уынӕм, культурӕ ӕмӕ аивады рӕзтӕн кӕд исты хорзӕй арӕзт ӕрцыд, уӕд уый советон дуджы. Абон уыцы къабазы цы ахуыргӕнджытӕ кусы, нӕ сабиты удварн ӕмӕ курдиатыл чи ауды, уыцы специалисттӕ, астӕуккаг скъолаты ахуыргӕнджытӕй къаддӕр мызд кӕй исынц, уый сусӕггаг никӕмӕн у. Бирӕ азты размӕ нӕ бӕстӕйы хицауад ацы фарсты фӕдыл цы уынаффӕтӕ хастой, уыдон, зӕрдӕйы фӕндиаг хорз нӕ ахадыдтой йӕ рӕзтыл. Ныртӕккӕ дӕр ма музыкалон ӕмӕ хореографион скъолатӕ нымад цӕуынц, куыд уӕлӕмхасӕн ахуырады артдзӕстытӕ. Фӕлӕ советон цардарӕзты рӕстӕджы курдитджын фӕсивӕд ахуыр кодтой фыццаг музыкалон кӕнӕ нываивадон скъолайы, стӕй уый фӕстӕ та дӕсныйады сусӕгдзинӕдтӕ ӕргом кодтой астӕуккаг ӕмӕ уӕлдӕр ахуырады артдзӕстыты. Аивадыл ахуырады фыццаг къӕпхӕн сӕрмагонд скъола кӕй уыд, уый фӕрцы ахуырад цыди бӕлвырд бындурон фӕткмӕ гӕсгӕ.

Ахӕм ахуырады уаг нымад цӕуы абон дӕр дунейы ӕппӕты раззагдӕрыл ӕмӕ хуыздӕрыл. Цардхъом кӕй у, уый та иу ӕмӕ дыууӕ азы дӕргъы нӕ рабӕрӕг. Уымӕ гӕсгӕ нӕ аивадон, музыкалон, балетон, театралон астӕуккаг ӕмӕ уӕлдӕр скъолатӕм ахуыр кӕнынмӕ цӕуынц фӕсивӕд канд нӕ бӕстӕйы горӕттӕй нӕ, фӕлӕ ӕнӕхъӕн дунейӕ дӕр. Зӕгъӕм, консерваторийы студентыл йӕ сахуыргӕнӕггаг  нӕ бӕстӕйы паддзахад иу афӕдзмӕ бахардз кӕны иу милуан сомы. Уый тыххӕй та хъӕуы,  уымӕй размӕ, ӕвзонг курдиӕттӕ цы ахуырады къӕпхӕнтыл рацӕуынц, уыдон цӕмӕй уой ифтонг ӕмӕ хӕрзӕххӕст ахуырадон, методикон ӕрмӕгӕй, цалцӕггонд ӕрцӕуой сӕ бӕстыхӕйттӕ. Цы мониторинг сарӕзтам, уымӕ гӕсгӕ аивадон скъолатӕй бирӕтӕ сты цалцӕггӕнинаг, фӕкӕсинаг инструменталон, методикон ӕрмӕджытӕй. Афтӕмӕй хӕстӕгдӕр рӕстӕг  Мӕздӕджы сараздзыстӕм аивады ног скъола. Ахуыр кӕныны фадат дзы уыдзӕн 300 лӕппу ӕмӕ чызгӕн. Зонӕм ӕй, ахӕм хуызы уынаффӕтӕ иу ӕмӕ дыууӕ бонмӕ царды рауадзӕн нӕй. Фӕлӕ уыцы фарстытӕ лыг кӕнын у нӕ хӕс. Иннӕмӕй та, музыкалон ӕмӕ аивадон скъолатӕн сӕ зынгӕ хай ӕрбынат кодтой Дзӕуджыхъӕуы Ирыстойнаг зылды. Фӕлӕ сӕм горӕты иннӕ районтӕй чи цӕуы, уыцы фӕсивӕдӕн сты дӕрддзӕф. Уымӕ гӕсгӕ, горӕты арӕзтадӕн дзуапп чи дӕтты, уыцы бӕрнон адӕймӕгтӕ, ног хӕдзӕртты цӕрджытӕн сӕ цоты удварыны рӕзтыл куы батыхсиккой ӕмӕ иннӕ районты дӕр аивады ахуырадон артдзӕстытӕ дӕр арӕзт куы цӕуиккой, уӕд хорз уаид. Ныридӕгӕн цы программӕ сарӕзтам, уым ацы фарстытӕ амынд сты. Уӕдӕ уыцы скъолатӕн ахуыргӕнджыты ног фӕлтӕр цӕттӕ кӕныныл дӕр хъуыды кӕнӕм.

Курдиатджын фӕсивӕды рӕзтӕн фадӕттӕ аразыны тыххӕй, куыд фӕзминаг методикон артдзӕст, афтӕ равзӕрстам Аивӕдты республикон лицей. Куыд ӕй зонут, афтӕмӕй лицейы ис ӕртӕ хайады: музыкалон, хореографион ӕмӕ нывгӕнынадон. Кусы дзы фӕлтӕрдджын ахуыргӕнджыты коллектив. Кӕд сӕм фӕлтӕрддзинад ис, уӕд уый ӕнцайы, сӕ куысты ног гӕнӕнтӕ ӕмӕ фӕндӕгтӕ кӕй агурынц, ууыл. Лицейы мах сарӕзтам курдиатджын сывӕллӕттимӕ кусӕг центр «Арт-Перспектива». Нӕ фыццаг фӕлварӕн проект ам схуыдтам «Сфӕлдыстадон сменӕ». Уымӕ гӕсгӕ, къуырийы дӕргъы ӕппӕт республикӕйӕ курдиатджын фӕсивӕдӕн фадат уыдзӕн афӕдз цыппар хатты лицейы фӕлтӕрдджын педагогты хореографион ӕмӕ нываивадон ахуырты архайын. Уыцы ахуыртӕ цӕудзысты афӕдз ӕртӕ хатты: уалдзӕджы, сӕрды ӕмӕ фӕззӕджы. Уый фӕрцы та нӕ бон рабӕрӕг кӕнын уыдзӕн курдиатджын сывӕллӕтты, уыдонӕн та ахуыртӕ араздзыстӕм рӕвдздӕр ӕмӕ арфдӕр фӕткмӕ гӕсгӕ. Уыцы  хуызы нӕ бон рацаразын уыдзӕн нӕ куыст курдиатджын фӕсивӕдимӕ. Уый та нӕ къухы ӕфты, йӕ рӕстӕджы лицейы бындурӕвӕрӕг ӕмӕ фыццаг директор Кцойты Аллӕйы къухы кӕй бафтыд лицейы куыстхъом коллектив ӕрӕмбырд кӕнын, республикӕйы курдиатджын сывӕллӕттимӕ куысты хъомысджын ӕмӕ бирӕфадатджын фӕз дзы саразын. Мах хӕс та у лицейы бындурыл республикон интернат саразын. Фӕлӕ мӕ ам зӕгъын фӕнды стыр бузныг лицейы ныры сӕргълӕууӕг Ходы Фатимӕйӕн ӕмӕ лицейы коллективӕн, ӕппӕт районты аивӕдты скъолаты ахуыргӕнджытӕн, нӕ Ирыстоны курдиатджын фӕсивӕды рухс фидӕныл зӕрдӕйӕ кӕй тыхсынц, ӕмӕ сын сӕ уавӕртӕм гӕсгӕ фадӕттӕ кӕй аразынц, уый тыххӕй. Ацы проекты фыццаг къӕпхӕн нын фадат ратдзӕн, цӕмӕй хӕстӕгдӕр рӕстӕг фенӕм ног курдиӕтты аивад.

— Аивады йӕхи сӕрмагонд фӕндаг чи ссардта, уыцы артисттӕн, музыканттӕн, нывгӕнджытӕн та цавӕр ӕххуыс кӕндзыстут?

— Уыдонӕн ӕмӕ, цы артдзӕстыты  кусынц, уым сын комкоммӕ ӕххуыс кӕны Культурӕйы министрад. Мах хӕс та у культурӕйы ӕмӕ аивады рӕзтыл ног хуызы бакусын, ног фӕндӕгтӕ ӕмӕ тыхтӕ дзы бауадзын. Йӕ рӕзтӕн нырмӕ фадӕттӕ кӕм нӕ уыд, уым сӕ ссарын.  Нӕ республикӕйы ӕппӕт аивадон скъолатӕн дӕр балхӕдтам ног музыкалон инструменттӕ.  Ахуыргӕнджытӕн та дӕттӕм фадат, цӕмӕй райсой  арфдӕр зонындзинӕдтӕ.

Ныридӕгӕн РЦИ-Аланийы Хицауады уынаффӕмӕ гӕсгӕ нӕ республикӕйы ӕмӕ нӕ бӕстӕйы уӕлдӕр ахуырады скъолаты чи ахуыр кӕны, уыцы студенттӕй фӕзминагдӕртӕн фыст цӕуы Хъӕбӕлоты Билары номыл паддзахадон стипенди. Паддзахад ӕххуыс кӕндзӕн, нӕ республикӕйы аивадон скъолаты уӕлдӕр ахуырад чи райста, уыцы студенттӕн. Уымӕй размӕ та олимпиадӕты ӕмӕ конкурсты чи фӕуӕлахиз, уыцы фӕсивӕдӕн.

— Фӕлӕ ма культурӕйы рӕзты программӕйы уе ‘ргом цӕмӕ аздахдзыстут?

— Аивады къабазы ахуырады ӕмӕ национ аивады хуызты рӕзтмӕ. Дыккагӕй та нӕ фӕнды, цӕмӕй адӕмон ӕрмдӕсныйады къабазы чи  архайы, уыдонӕн сӕ ахадындзинад нӕ культурӕйы фӕбӕрзонддӕр кӕнын. Цӕмӕй уыцы хъуыддаджы нӕ нысантӕ нӕ къухы бафтой, уымӕн фидӕн аз республикӕйы бюджетӕй дихгонд ӕрцыд 500 мин сомы. Уыдоны фӕрцы арӕзт ӕрцӕудзӕн равдыстытӕ «Зымӕгон аргъау — 2019» ӕмӕ «Ладья».

2018 азы нӕ республикӕйы Хицауад рахаста уынаффӕ, цӕмӕй Дзӕуджыхъӕуы арӕзт ӕрцӕуа «Аивадон ӕрмдӕсныйады рӕзты центр». Йӕ бӕстыхай та уыдзӕн нӕ горӕты Сабырдзинады проспекты. Ныртӕккӕ йӕ цалцӕг кӕнӕм ӕмӕ йӕ рӕхджы байгом кӕндзыстӕм.

УФ-йы культурӕйы сгуыхт кусӕг Годжыцаты Изольдӕ йӕ ногхуыд уӕлӕдарӕсы коллекци «Рагон аивады ног рӕстӕг-2» -имӕ архайдзӕн, Италийы цы фестивал «Уырыссаг зымӕг цад Гарда» уыдзӕн, уым.

Не ‘рмдӕснытӕ архайдтой аивадон армукъаты Дзӕуджыхъӕуы, Кисловодскы, Дагестаны ӕмӕ Цӕцӕны. Алы аз Уӕлахизы ӕмӕ Уӕрӕсейы хӕдбардзинады бонты рӕстӕг нӕ республикӕйы цы бӕрӕгбонтӕ арӕзт ӕрцӕуы, уыдоны кӕддӕриддӕр фӕархайынц не ‘рмдӕснытӕ.

Адӕмон ӕрмдӕсныты центры фӕлгӕты фыццаг хатт Цӕгат Кавказы, Национ библиотекӕйы бындурыл арӕзт ӕрцыд равдыст «Куклаты дуне». Йӕ саразджытӕ та уыдысты РЦИ-Аланийы Промышленност ӕмӕ транспорты министрад ӕмӕ зындгонд нывгӕнӕг Светланӕ Пчелькова.

Нӕ республикӕйы культурӕйы министрады ӕнтыстджынӕй кусы ӕрмдӕсныты куыстытӕм цӕстдарӕг совет. Ацы аз ын цы ӕртӕ ӕмбырды уыд, уым 72 куысты хаст ӕрцыдысты аивадон ӕрмдӕсныты куыстыты номхыгъдмӕ. Уыдон сты национ мызыкалон инструменттӕ цыллӕхызтӕ, риуыгънӕджытӕ, статуеткӕтӕ, ювелирон аивгӕнӕнтӕ, бӕрцытӕ, хъисынфӕндыр, разгӕмттӕ.

Нӕ республикӕйы Хицауад ивддзинӕдтӕ бахаста адӕмон ӕрмдӕсныты аивадон куыстыты тыххӕй закъоны проектмӕ. Нӕ республикӕйы хуыздӕр ӕрмдӕснытӕн РЦИ-Аланийы Хицауады уынаффӕмӕ гӕсгӕ лӕвӕрд цӕудзӕн сӕрмагонд кадджын ном «РЦИ-Аланийы ӕрмдӕсныты куыстады сгуыхт кусӕг».

Уынаффӕтӕ ма хаст ӕрцыд Акционерон ӕхсӕнӕдтӕ «Асик» ӕмӕ «Изольдӕ»-йы архайд фӕхъомысджындӕр кӕныны тыххӕй.

— Ныртӕккӕ у информацион технологиты дуг. Ӕмӕ цӕмӕй ацы проекттӕ царды куыд уагъд цӕуынц, уый тыххӕй фылдӕр адӕм зоной, ууыл та куыд архайдзыстут?

— Бакуыстам ирон традицион аивады тыххӕй сайты ӕмӕ коммерцион фӕзы иумӕйаг концепцийыл. Уымӕ нӕм хорз фӕкаст адӕмон аивадон ӕрмдӕсныты ассоциацийы сӕргълӕууӕг Таболты Тамилӕ. Ӕнхъӕлмӕ кӕсӕм сайт ӕмӕ фӕз цӕмӕй кусын райдайой, уый тыххӕй нын ӕхца кӕд радих кӕндзысты, уымӕ.

Цӕттӕ кӕнӕм документтӕ, цӕмӕй ӕнӕххӕст бӕрнондзинады ӕхсӕнад «Фӕндыр» цы музыкалон инструменттӕ уадзы, уыдон дӕр   сбӕрӕг кӕна Культурӕйы министрады цур экспертон совет.

Кусӕг къорд РЦИ-Аланийы историйы ӕмӕ археологийы институтӕн бабар кодта, цӕмӕй адӕмон нываивады куыстыты тыххӕй информаци хаст ӕрцӕуа Уӕрӕсейы адӕмон ӕрмдӕсныты аивады энциклопедимӕ. Ныртӕккӕ уыцы информаци цӕуы редакцигонд.

Адӕмон ӕрмдӕсныты центры бындурыл царды уагъд ӕрцыд проект «Традицион культурӕйы абетӕ». Уымӕ гӕсгӕ арӕзт цӕуынц, ӕрмдӕсныты аивады рагон хуызтӕ бахъахъхъӕнынмӕ арӕзт чи у, ахӕм ахуырадон семинартӕ. Ныридӕгӕн Национ музейы арӕзт ӕрцыд 3 семинары.

— Нысанмӕ арӕзт программӕмӕ гӕсгӕ Дзӕуджыхъӕуы фӕлгонц та хуыздӕрӕрдӕм цы хуызы аивдзӕн?

— Проекттӕй иу у нӕ горӕты  Евгений Вахтанговы райгуырӕн  хӕдзар сцалцӕг кӕнын. Номдзыд режиссеры райгуырды 120 азмӕ дзы байгом кӕндзыстӕм мемориалон музей. Ӕмӕ  суыдзӕн  Мӕскуыйы йӕ номхӕссӕг  академион театры филиал.

— Бузныг, Мӕдинӕ, уӕ дарддӕры фӕндтӕ дӕр уӕ къухы бафтӕнт!

Ныхас ныффыста Гасанты Валери

ОСТАВЬТЕ ОТВЕТ

Please enter your comment!
Please enter your name here