Цӕрукъаты Алыксандры сфӕлдыстад

0
21

Зындгонд ирон поэт Цӕрукъаты Алыксандр нӕ дзырдаивадмӕ цы уӕзгӕ ӕвӕрӕн бахаста, уый амонын никӕмӕн хъӕуы. Ӕрӕджы йӕ номарӕн изӕр уыд Гӕздӕнты Гайтойы номыл фӕсивӕдон библиотекӕйы. Йӕ райдайӕны поэты цард ӕмӕ сфӕлдыстады тыххӕй радзырдта изӕр амонӕг, Цӕгат Ирыстоны Фысджыты цӕдисы поэзийы секцийы разамонӕг поэт, прозаик Хохойты Энвер. Уый фӕстӕ, Алыксандры тыххӕй куыд адӕймаг, куыд поэт-новатор, афтӕ йӕ мысинӕгтӕ радзырдта нӕ республикӕйы Фысджыты цӕдисы сӕрдар Агънаты Гӕстӕн.

Йӕ мысинӕгтӕ загъта Ирыстоны адӕмон поэт Дауыраты Зоя дӕр: “Ивгъуыд ӕнусы 50-ӕм азты Цӕрукъаты Алыксандр ахуыр кодта Мӕскуыйы, Максим Горькийы номыл литературон институты. Ӕз та уыцы азты ахуыр кодтон Щукины номыл театралон институты ирон студийы. Махӕн Алыксандр амыдта ирон ӕвзаг ӕмӕ литературӕ. Уӕд нын каст йе ‘мдзӕвгӕтӕ,  ныхасы рӕзтыл кусынӕн нын ныффыста бирӕ ирон тагъддзуринӕгтӕ. Уыдонӕй абон дӕр ӕхсызгонӕй пайда кӕнынц ирон театры ӕрыгон артисттӕ ӕмӕ театралон студиты ахуырдзаутӕ”.

Цӕрукъаты Алыксандры поэзи нӕ фӕсивӕды канд Ирыстон уарзыныл кӕй нӕ ахуыр кӕны, фӕлӕ ма йе сфӕлдыстады фӕрцы нӕ кӕстӕртӕ дунеон культурӕимӕ дӕр кӕй зонгӕ кӕнынц, ууыл уыд йӕ ныхас педагогон наукӕты кандидат Мзокты Аслӕнбегӕн. Уый ма аив бакаст Алыксандры сфӕлдыстадӕй йӕ уарзондӕр ӕмдзӕвгӕтӕ.

— Цӕрукъаты Алыксандры сфӕлдыстадӕн ӕз кӕддӕриддӕр стыр аргъ кодтон ӕмӕ кӕнын. Уый мын радта ныфс литературӕйы мӕхи сӕрмагонд фӕндаг ссарынӕн ӕмӕ хъуыды зӕгъынӕн. Уый хуызӕн поэттӕн хъуамӕ хуыздӕр кад кӕниккам, йе сфӕлдыстад ын хъӕуы бӕстондӕр ахуыр кӕнын, йӕ базонынмӕ та сфӕлдыстадон фӕсивӕды ног фӕлтӕрты разӕнгард кӕнын, — ацы хъуыдытӕ номарӕн изӕры загъта фыссӕг, Хетӕгкаты Къостайы премийы лауреат Цомартаты Изӕтбег.

Зындгонд поэты тыххӕй ма сӕ зӕрдӕагайгӕ мысинӕгтӕ радзырдтой фыссджытӕ Хуыгаты Сергей, Гусалты Барис, поэттӕ Гетъойты Виктор, журнал «Ирӕф»-ы редакторы хӕдивӕг Колыты Витали, РЦИ-Аланийы адӕмон нывгӕнӕг, скульптор Дзбойты Михал.

Номарӕн изӕры кӕрон йӕ саразджытӕн-Фысджыты цӕдисы разамындӕн ӕмӕ фӕсивӕдон библиотекӕйы кусджытӕн, мыггаджы номӕй арфӕ ракодта фӕллойы ветеран Цӕрукъаты Азӕ.

Гасанты Валери

ОСТАВЬТЕ ОТВЕТ

Please enter your comment!
Please enter your name here