«Дӕ курдиатӕй адӕмӕн хъуамӕ ӕхсызгондзинад хӕссай…»

0
58

Бӕрзонд аивад… Цас ӕнкъарӕнтӕ, цас мысинӕгтӕ хӕссынц ацы дзырдтимӕ баст хъуыдытӕ! Адӕймагӕн сты цинты уаргъау ӕмӕ дунембарынады хӕзнатӕ. Афтӕ мӕм фӕкӕсы, цыма аивадимӕ баст адӕм бынтон ӕндӕр сты сӕ удыхъӕд ӕмӕ сӕ уагӕй. Аивад куыд рӕсугъд у, афтӕ рӕсугъд вӕййынц сӕ удтӕ дӕр.

Нӕ республикӕйы цӕрджытӕ рагӕй зонынц ӕмӕ уарзынц фӕндырдзӕгъдӕг, РЦИ-Аланийы адӕмон артисткӕ Хадыхъаты Аллӕйы. Фӕлӕ фӕстаг азты уынӕм, зарынмӕ дӕр ӕм кӕй ис стыр курдиат, уый.

Аллӕйы фӕндырдзагъд иннӕтимӕ фӕхӕццӕгӕнӕн нӕй. Ис ын йӕхи ритмикӕ, йӕхи ӕрмдзӕф, йӕ алы цагъды дӕр — хӕдхуыз зӕливылӕнтӕ. Ӕвӕлмӕцгӕ, ӕнӕзивӕг, рӕдаузӕрдӕ ӕмӕ цӕстуарзон артисткӕ а фӕстаг рӕстӕг йӕ аивадӕй рухс кӕны сценӕмӕкӕсӕг адӕмы ногӕй-ногмӕ аив лирикон зарджытӕй.

— Аллӕ, бирӕтӕ дын райдайӕнты дӕ зард куы фехъуыстой, уӕд демӕ разы нӕ уыдысты, дӕ фӕндырдзагъд зардӕй аивай, ууыл. Тынг диссаджы фӕндырдзӕгъдӕг, дам, у, ӕмӕ дӕ фӕндыр куы ныууадзай, ууыл уыд сӕ мӕт.

— Раст мӕ нӕ бамбӕрстой адӕм… Куыд ис уый гӕнӕн, ӕмӕ ӕнӕ фӕндырӕй уон? Уый никуы уыдзӕн. Фӕндыр мӕнӕн мӕ уарзт у. Мӕ ныййарджыты тынг фӕндыд, цӕмӕй бацыдаин ЦИПУ-йы филологон факультетмӕ. Фӕстаг фӕлварӕн нӕ радтон ӕмӕ фӕцӕйцыдтӕн ӕрхӕндӕгӕй хӕдзармӕ Дзӕуджыхъӕуы аивӕдты училищӕйы рӕзты. Кӕй зӕгъын ӕй хъӕуы, ӕнкъард хъуыдытимӕ. Уалынмӕ кӕцӕйдӕр райхъуыстысты диссаджы музыкӕйы зӕлтӕ. Мӕ зӕрдӕ барухс, ӕмӕ хъуыдыты аныгъуылдтӕн, мӕ туджы сабибонтӕй фӕстӕмӕ фӕндыры зӕлтӕ кӕй цӕры, уый арфдӕр банкъардтон.

— Чи уыд дӕ фыццаг ахуыргӕнӕг, дӕ разӕнгардгӕнӕг?

— Мӕ мад — Иринӕ уыд фӕндырдзӕгъдӕг, арӕх ӕй хуыдтой чындзӕхсӕвтӕм, куывдтӕм. Мӕ хистӕр хо Зарӕ каст фӕцис музыкалон училищӕ, фӕндырӕй цӕгъдыныл дӕр мӕ уый сахуыр кодта. Уый та сахуыр кодта мӕ мад. Аивӕдты училищӕмӕ фӕлварӕнтӕ радтон ӕнцонӕй. Каст ӕй куы фӕдӕн, уӕд мӕ арвыстой ансамбл «Ирыстон»-мӕ. Уыцы-иу рӕстӕг куыстон Октябрыхъӕуы музыкалон скъолайы, Байаты Альбинӕйы паддзахадон кӕфтыты ансамбл «Арт»-ы ӕмӕ паддзахадон кӕфтыты ансамбл «Алан»-ы.

Мӕ къухтӕм фӕндыр куы райсын, уӕд уӕлмонцдзинад бацӕры мӕ зӕрдӕйы. Ис мын бирӕ ахуырдзаутӕ, бирӕ сӕ уарзын. Мӕ дӕсныдзинад сын цӕстуарзонӕй лӕвар кӕнын. Абон мӕ рауагъдонтӕн сӕ фылдӕр райстой уӕлдӕр музыкалон ахуырад, цалдӕрӕй та каст фесты консерваторитӕ.

— Уӕззау у фӕндыр, лӕугӕйӕ цӕгъдын ӕнцон нӕу…

— Ӕнцон нӕу, фӕлӕ бафӕразын. Аивадӕн лӕггад кӕнын ӕнцон нӕу, хъуамӕ алы хатт дӕр цӕттӕ уай адӕмы размӕ рацӕуынмӕ. Уӕлдай змӕлд, уӕлдай уынӕр, уӕлдай сыбыртт нӕу аив. Уый ӕгад кӕны артисты, стӕй нацийы цӕсгом дӕр. Ӕгъдау бӕрзонд ӕмӕ сыгъдӕг у арвы цъӕхау, сӕууон ирдгӕйау — ӕхцон цыфӕнды хъуыддаджы дӕр.

Афтӕ куы нӕ уаид, уӕд нӕм хӕлӕггӕнджытӕ дӕр нӕ уаид нӕ сыхӕгтӕй не ‘рдхӕрӕны «Симд» ӕмӕ уӕздан «Хонгӕ кафт»-мӕ, нӕ фӕндыры цагъдмӕ, нӕ арфхъуыдыджын ӕгъдӕуттӕ ӕмӕ аивӕдты иннӕ хуызты не ‘нтыстытӕм. Уый у нӕ бӕрзонд культурӕйы ӕвдисӕн.

— Аллӕ, ды фӕсарӕнты бирӕ хӕттыты уыдтӕ…

— Дыууиссӕдз хатты… Ис мын бирӕ хӕлӕрттӕ сыхаг республикӕты, Уӕрӕсейы алы горӕтты, фӕсарӕнты, суанг ма Турчы дӕр… Турчы уыдтӕн 10 хатты. Аивад тыхджын у, йӕ тӕгтӕ зӕрдӕйы тӕгтау сты, уарзын ӕмӕ ӕнгом кӕнынц адӕмыхӕттыты, нӕ бӕстӕйы цы бирӕ нацитӕ цӕрынц, уыдоны алы культурӕты. Аивады арф ӕвӕрд ис адӕмы зӕрдӕ, сӕ цин, сӕ хъыг, сӕ истори, сӕ ӕрвылбоны цардыуаг. Ӕппынфӕстаг, аивад адӕймаджы кӕны удӕй хъӕздыгдӕр, хъомысджындӕр, лӕгыл базыртӕ базайы, ӕмӕ йӕ фӕфӕнды ӕрмӕстдӕр хорздзинад тауын.

Адӕмы раз артисты архайд, йӕ куыст у стыр бӕрнон, хъуамӕ дыл адӕм ӕууӕндой, хъуамӕ дӕ алы рацыдӕй дӕр сӕ размӕ исты хорздзинад, исты ногдзинад хӕссай ӕмӕ сӕ ӕфтауа цымыдисы. Куы нӕ дӕ уарзой, де сфӕлдыстад сӕ зӕрдӕмӕ куы нӕ цӕуа, уӕд сын сӕ зӕрдӕ не ссардзынӕ, ӕмӕ дыл сӕхи атигъ кӕндзысты.

— Цавӕр хӕс ис дӕуыл концертдзауты раз?

— Адӕммӕ цӕуын, сӕ зӕрдӕтӕ сын балхӕнын хорз фӕндыры цагъдӕй, дзӕбӕх зарджытӕй. Фӕнды мӕ фылдӕр, арӕхдӕр семӕ ӕмбӕлын ӕмӕ тауын зӕрдӕйы хорзӕх, стӕй аивады хӕрзгӕнӕг, ӕвдадзы хос кӕй хонынц, уыцы бирӕвӕрсыг рухс! Мӕхӕдӕг дӕр фыссын музыкӕ, стӕй зарджытӕ дӕр…

— Афтӕ фӕзӕгъынц, алцӕмӕй ӕххӕст адӕймаг нӕй, фӕлӕ цыма уӕддӕр искуы-иу адӕймаг вӕййы алцӕмӕй ӕххӕст, цыма уыдоны нымӕцмӕ Хадыхъаты рӕсугъд, зараг, фӕндырдзӕгъдӕг чызг дӕр хауы…

— Мӕ аиппытӕн нымӕц дӕр нӕй…(худы). Дӕ зӕрдӕ дӕ ма сайӕд… Ис мын хорз бинонтӕ, мӕ цардӕмбал — Хетӕгкаты Руфат, чызг — Тамилӕ, фырт — Марат. Уыдонӕй дын раппӕлдзынӕн! Мӕ ныййарджыты фӕрцы мӕ рауад цыдӕр. Стыр бузныг сын!

— Сценӕйы ӕмӕ адӕмы ‘хсӕн дӕ алы къахдзӕф, дӕ алы фӕзынд ӕмӕ фӕзылдӕй дӕр бӕрӕг у, рӕсугъд, ӕнӕлаз уӕвын дӕ кӕй фӕнды, уый. Цӕмӕн?

— Адӕймаджы удыхъӕд диссаг кӕй у, уый ӕз нӕ раргом кодтон. Мӕ удыхъӕд мӕнӕн ӕндӕр у… Иннӕтӕй уӕлдай ӕз цӕмӕйдӕр хъуамӕ хицӕн кӕнон. Уымӕн ӕмӕ ӕз Аллӕ дӕн, уыдон та ӕндӕртӕ сты.

— Фӕндыр дӕ къухы куы вӕййы, уӕд цыма цӕгъдгӕ нӕ, фӕлӕ дзургӕ фӕкӕны ӕви йемӕ дзургӕ ды фӕкӕныс?

— Ныхас фӕцӕуы не ‘хсӕн — мӕн ӕмӕ фӕндыримӕ, цыбыр, ӕргом интервьюйау. Алцыдӕр вӕййы адӕмӕн, ӕппӕт дӕр артисты зӕрдӕйӕ цӕуы концертдзаутӕм!

— Аллӕ фӕллайын зоны?

— Уый мӕ уд, мӕ хъысмӕт зоны!.. Фӕлӕ уӕддӕр уды ӕххӕстдзинадӕн кӕрон нӕй. Архайдзынӕн!

Ныхас кодта Бызыккаты Земфирӕ

ОСТАВЬТЕ ОТВЕТ

Please enter your comment!
Please enter your name here