Чызг-богӕлттӕ фесгуыхтысты Стъараполы

0
20

Андиаты Сосланы номыл хъӕбысхӕсты скъолайы лӕппутӕй уӕлдай уӕгъдибар хъӕбысхӕсты сусӕгдзинӕдтӕ базонынмӕ тырнынц ӕвзонг чызджытӕ дӕр. Зӕгъын хъӕуы уый, ӕмӕ нӕ чызджытӕн ацы хъуыддаджы се ‘нтыстдзинӕӕдтӕ гыццыл кӕй не сты.

Мӕнӕ та хӕрзӕрӕджы тренертӕ Осмӕнты Руслан ӕмӕ Дзагуырты Маринӕйы хъомылгӕнинӕгтӕ тынг сӕрӕн хӕcт ракодтой Стъараполы спорты мастер Михаил Бондаревы номарӕн турниры архайгӕйӕ.

Ерыстӕ цыдысты 10-11 ӕмӕ 13-15-аздзыд чызджыты ‘хсӕн. Дыууӕ кары ерысты дӕр нӕ чызджытӕ уыдысты хуыздӕртимӕ ӕмӕ ӕдӕппӕтӕй рамбылдтой дӕс хӕрзиуӕджы. Нӕ чызджытӕ фондз хатты бацахстой 1-аг бынӕттӕ, цыппар хатты рацыдысты 2-аг бынӕттӕм, иу хатт та ӕрлӕууыдысты 3-аг бынаты.

Турниры уӕлахиздзаутӕ систы: Гӕдзӕонты Олеся (32 кг), Гӕдзӕонты Алинӕ (42 кг), Дзоблаты Радӕ (50 кг), Къӕбулты Миланӕ (57 кг) ӕмӕ Горчакова Маринӕ (66 кг). 2-аг бынттӕ бацахстой: Сланты Оксанӕ, Азиаты Дианӕ, Гобеты дыууӕ хойы Иринӕ ӕмӕ Самирӕ, Малхъарты Каринӕ та рацыд 3-аг бынатмӕ.

Нӕ чызг-богӕлтты тренер Осмӕнты Руслан ерыстӕ куыд рауадысты, уый тыххӕй зӕгъы: «Стъараполӕгтӕ бацархайдтой ерыстӕн хорз уавӕртӕ саразын ӕмӕ уый сӕ къухы бафтыд. Нӕ чызджыты хӕст уым бирӕты зӕрдӕмӕ фӕцыд. Ерысты архайдтой, ацы кары ныридӕгӕн хорз ӕнтыстдзинӕдтӕ кӕмӕн бантыст, ахӕм чызджытӕ цалдӕрӕй. Зӕгъӕм, мӕ хъомылгӕнинаг Маринӕ Горчаковайӕн кӕронбӕттӕны фембӕлды йӕ ныхмӕлӕууӕг уыд, ацы аз Уӕрӕсейы 1-аг бынат чи бацахста, уыцы ростоваг чызг Алисӕ Чернишкова. Ахӕм ныхмӕлӕууӕгӕй Маринӕ рамбылдта ӕнӕдызӕрдыгӕй. Иннӕ ахӕм та уыд, 42 кг онг уӕзы кӕронбӕттӕнмӕ нӕ дыууӕ чызджы Гӕдзӕонты Алинӕ ӕмӕ Сланты Оксанӕ кӕй рацыдысты, уый. Нӕ хъомылгӕнинӕгтӕн ацы ран хорз аргъ скодтой ӕмӕ нӕ фӕхуыдтой, 19 декабры Ессентукийы цы турнир цӕудзӕн, уырдӕм. Турнир рахуыдтой «Кавказы хӕлардзинад», ӕмӕ ныр мах нӕхи цӕттӕ кӕнӕм уырдӕм. Нӕ хъомылгӕнинӕгтӕ ӕмӕ нӕ тренерты номӕй зӕрдиаг арфӕ кӕнӕм, ацы балцы нӕм ӕхцайы фӕрӕзтӕй чи фӕкаст, уыцы хӕрзаудӕнгӕнджытӕ Уаниты Хъазыбег ӕмӕ Дзагуырты Ермакӕн. Уаниты Хъазыбег нын фыццаг хатт нӕ баххуыс кодта. Хӕрзаудӕн кӕй кӕны нӕ хъомылгӕнинӕгтӕн, уый тыххӕй йӕ Уӕрӕсейы хъӕбысхӕсты федерацийы президент Михаил Мамиашвили схорзӕхджын кодта Кады грамотӕйӕ. Ахӕм адӕймӕгтӕ сты нӕ хӕрзгӕнджытӕ ӕмӕ сын мах зӕрдиагӕй зӕгъӕм стыр бузныг!»

ОСТАВЬТЕ ОТВЕТ

Please enter your comment!
Please enter your name here