Аивады хъомысӕй…

0
270

2019 аз у Театры азыл нымад. Афӕдзы дӕргъы нӕ бӕстӕйы театралон къордтӕ бирӕ проектты архайдтой. Театруарзджытӕ бакастысты, гастролты нӕм сыхаг республикӕтӕй чи цыдис, уыцы театралон коллективты аивадмӕ. Театры азы кӕронбӕттӕн куысты та арӕзт цыдысты адӕмон театртӕн сӕ дӕсныйад хъӕздыгдӕр кӕныны мадзӕлттӕ.

Цӕгат Ирыстоны Национ наукон библиотекӕйы нӕ республикӕйы районты адӕмон театртӕн ахуыртӕ сарӕзтой режиссер Бекъойты Розӕ, драматург Айларты Асӕхмӕт ӕмӕ РЦИ-Аланийы Театралон архайджыты цӕдисы сӕрдар Гуыбиаты Хъазыбег.

Хъазыбег куыд радзырдта, афтӕмӕй ацы аз нӕ республикӕйы Театры азы фӕлгӕты хорз куыст ацыдис. Уый загъта:

— Ӕхсызгон хъуыддаг у, Бӕхты театр дӕр йӕ къӕхтыл фӕстӕмӕ кӕй ӕрлӕууыд ӕмӕ сӕ аивадон фӕндаг уацмыстӕй хъӕздыгдӕр кӕй кӕны, Дыгурон театр дӕр йӕ куыст ног уавӕртӕм гӕсгӕ рацарӕзта. Ӕрӕджы уыдысты гастролты. Цалдӕр регионмӕ йӕ спектаклимӕ ацыд Уырыссаг театр дӕр. Оперӕ ӕмӕ балеты театры куыст та ноджы ӕнтыстджындӕрыл нымад ӕрцыд. Куыстам сидзӕр сывӕллӕтты хӕдзӕрттимӕ дӕр. Ӕххуыс кодтам адӕмон хихъӕппӕрисадон къордтӕн кӕм декорацитӕй, кӕм дзаумӕттӕй. Нӕ республикӕйы ис ӕртындӕс ахӕм театралон къорды, ӕмӕ се ‘ппӕты ӕнтыстджындӕрыл банымайӕн ис ӕрӕфы районы Цыколайы адӕмон театр. Уыдон гастролты уыдысты Мӕскуыйы ӕмӕ сӕ аивадӕй барухс кодтой ирон диаспорӕйы минӕвӕртты зӕрдӕтӕ. Ӕххуыс сын кӕны ӕрӕфы районы разамынд.

УФ-йы Театралон архайджыты цӕдисы сӕрдар Александр Калягин загъта, адӕмон театртӕм фылдӕр ӕргом здахын кӕй хъӕуы, уый тыххӕй. Дӕсныйад фӕхъӕздыгдӕр кӕныны мадзӕлтты сбӕрӕг кӕнӕм ӕппӕты курдиатджындӕрты, цӕмӕй сын дарддӕр профессионалон фӕндагмӕ цӕттӕдзинад уа. Хорз хъуыддаг у, профессионалтӕ семӕ куы кусой, уӕд. Мӕ зӕрдӕ дарын, фидӕн аз дӕр театры куыст Ирыстоны дӕлдӕр кӕй нӕ уыдзӕн, уымӕй.

Саутӕты Тамилӕ

ОСТАВЬТЕ ОТВЕТ

Please enter your comment!
Please enter your name here