Ирон чызджытӕ сӕвӕрдтой рекордтӕ

0
30

Дзӕуджыхъӕуы тхэквондойы скъолайы цӕттӕгӕнӕн хайады хъомылгӕнинаг Пухаты Мария хаст ӕрцыд Гиннесы рекордты хуызӕн Уӕрӕсейы рекордты чиныгмӕ.

Фондзаздзыд Мария у тхэквондойы скъолайы тренер Алик Бучукурийы хъомылгӕнинаг. Тренер йӕ хъомылгӕнинаджы ацы рекорды тыххӕй зӕгъы: «Мария у тынг курдиатджын сывӕллон. Ӕз рахатыдтон, ме ‘взонг хъомылгӕнинаг къахӕй тынг фидар кӕй у, уый, ӕмӕ мӕ бафӕндыд, цӕмӕй йӕ карӕнты ‘хсӕн, амӕй размӕ цы рекорд уыд, уый фӕхуыздӕр кӕна. Йӕ размӕ 5-аздзыд чызджыты рекорд иу къахыл ӕрбадт ӕмӕ сыстынӕй уыд минутмӕ 17 хатты. Пухаты Мария та сӕ ӕнцонӕй акодта 20 хатты.

Цӕмӕй рекорд официалон ӕгъдауӕй Уӕрӕсейы рекордты чиныгмӕ хаст ӕрцӕуа, уый тыххӕй йӕ хъуамӕ федтаиккой сӕрмагонд уавӕрты эксперттӕ. Мах сын се ‘ппӕт домӕнтӕ дӕр сӕххӕст кодтам, ӕмӕ Марияйы архайд ӕппӕтӕй дӕр растыл банымадтой. Кӕй зӕгъын ӕй хъӕуы, уый ӕхсызгон у махӕн.

Марияйӕн иу къахыл ӕрбадын ӕмӕ сыстын бирӕ фылдӕр ӕнтысы, фӕлӕ ацы ран ис сӕрмагонд домӕнтӕ, ӕмӕ уал мах минутмӕ 20 хатты ӕрбадыныл сразы стӕм. Нӕ хъомылгӕнинӕгтӕн Марияйы сгуыхтдзинад фыццаг нӕу. Амӕй размӕ ма 8-аздзыд чызджыты ‘хсӕн фесгуыхт нӕ иннӕ хъомылгӕнинаг Хъараты Сабинӕ. Афӕдзы ӕмбисы размӕ Сабинӕ йӕ иу къахыл 40 хатты ӕрбадт ӕмӕ сыстад иу минутмӕ ӕмӕ уый дӕр у Уӕрӕсейы рекорд.

Нӕ сӕрӕн чызджытӕн нӕ зӕрдӕ зӕгъы ноджы стырдӕр ӕнтыстдзинӕдтӕ. Сӕ уарзон спорт тхэквондойы дӕр сын бантысӕд стыр бӕрзӕндтӕм схизын».

ОСТАВЬТЕ ОТВЕТ

Please enter your comment!
Please enter your name here